އިންތިޚާބާއި ދިމާކޮށް އެމްޑީޕީގައި އުފެދިފައި އޮތީ ވަރަށް ރަނގަޅު ވައިބެއް: ރައީސް ސޯލިިިހް
ކުރިއަށް އޮތް އިންތިޚާބުތަކަށް އެމްޑީޕީން ކުރަމުންދާ ކެމްޕެއިން ދަތުރުތަކުން، ސަރުކާރަށް "ނޫނެކޭ" ބުނުމަށް ރައްޔިތުން ތިބީ ކެތްމަދުވެފައިކަން ހާމަވާކަމަށް ކުރީގެ ރައީސް އިބްރާހިމް މުހައްމަދު ސޯލިހު ވިދާޅުވި. ޚާއްސަކޮށް އައްޑޫ، ފުވައްމުލައް އަދި ކުޅުދުއްފުށި ސިޓީން ފެންނަ ރޫހު ތަފާތުކަން ފާހަގަކުރައްވައި، މިފަހަރުގެ އިންތިޚާބުތަކުގައި އެމްޑީޕީއަށް ބޮޑު ކާމިޔާބީއެއް ލިބޭނެކަމުގެ އުންމީދު އެމަނިކުފާނު ފާޅުކުރެއްވި.
މާފަންނު ދެކުނު ދާއިރާގެ ދޮރުން ދޮރަށް ހަރަކާތުގެ ތެރެއިން ކުރީގެ ރައީސް އިބްރާހިމް މުހައްމަދު ސޯލިހު ރާއްޖެ އެމްވީ އަށް މައުލޫމާތު ދެއްވަނީ 04.02.2026 | ރާއްޖެ އެމްވީ
ކުރިއަށް އޮތް ކައުންސިލް އިންތިޚާބާއި ޑަބްލިއުޑީސީ އިންތިޚާބު އަދި ރެފަރެންޑަމް އާއި ދިމާކޮށް އިދިކޮޅު މޯލްޑިވިއަން ޑިމޮކްރެޓިކް ޕާޓީ, އެމްޑީޕީގައި އުފެދިފައި އޮތީ ވަރަށް ރަނގަޅު ވައިބެއް ކަމަށް ކުރީގެ ރައީސް އިބްރާހިމް މުހައްމަދު ސޯލިހު ވިިދާޅުވެއްޖެ އެވެ.
ރައީސް އެފަދައިން ވިދާޅުވީ ދާދިފަހުން އަތޮޅުތެރޭގެ ބައެއް ރަށްތަކާއި ބައެއް ސިޓީތަކަށް ކުރެއްވި ޒިޔާރަތުން ފާހަގަކުރެވުނު ބައެއް ކަންކަން ރާއްޖެ އެމްވީ އާއި ހިއްސާކުރައްވަމުންނެވެ.
މި އިންތިޚާބުތަކަށް ކެމްޕެއިން ފެށީ، ރަށްރަށުގައި އެފަދަ ސިޔާސީ ހަރަކާތްތަކެއް ކުރިއަށް ނުދާތާ ދުވަސް ކޮޅެއް ވީފަހުން ކަމަށާއި އޭރު ރައްޔިތުންގެ ކިބައިގައި އޮތް ރޫހާއި މިހާރުގެ ރޫހާއި ވަރަށް ތަފާތު ކަމަށް ރައީސް ވަނީ ވިދާޅުވެފަ އެވެ. އެހެންނަމަ ވެސް މި ފަހުން ކުރި ކެމްޕެއިން ދަތުރުތަކުން ފާހަގަކުރެވުނު ގޮތުގައި ސަރުކާރަށް ނޫނެކޭ ބުނުމަށް ރައްޔިތުން ތިބީ ކެތް މަދުވެފައި ކަމަށް ވެސް އެ މަނިކުފާނު ވިދާޅުވި އެވެ. ޚާއްޞަކޮށް އައްޑޫ ސިޓީ، ފުވައްމުލައް ސިޓީ އަދި ކުޅުދުއްފުށި ސިޓީ އިން އެ ކަން ފާހަގަކުރެވުނު ކަމަށް އެ މަނިކުފާނު ވަނީ ވިދާޅުވެފަ އެވެ.
"ވައިބެއް އުފެދިއްޖެ. އޭގެ އިތުރުން ފާހަގަކުރެވުނު ރައްޔިތުން ތިބީ ސަރުކާރަށް ނޫނެކޭ ބުނުމަށް ކެތް މަދުވެފައި ކަން. އަމިއްލަ ކަމެއްގެ ގޮތުގައި ދެކިގެން ގާނޫނުއަސާސީން ލިބޭ ހައްގުގެ ބޭނުން ކުރަންވީ ވަގުތު އައިސް ޖެހިއްޖެ ކަމަށް ގަބޫލުކޮށްގެން އާއްމުން ތިބީ." ރައީސް ސޯލިހު ވިދާޅުވި އެވެ.
މިފަހަރު ވީހާވެސް އަވަހަށް ނުކުމެ ވޯޓުލާން ޖެހޭ ކަމަށް ވެސް އެމަނިކުފާނު ވިދާޅުވި އެވެ. މިފަހަރުގެ އިންތިޚާބު އިންތިޒާމްކޮށްފައި އޮތީ ވީހާވެސް ބޮޑަށް އާއްމުންނަށް ވޯޓު ނުލެވޭނެ ގޮތަށް ވިސްނައިގެން ކަމަށް ވެސް އެ މަނިކުފާނު ވަނީ ވިދާޅުވެފަ އެވެ.
ރައީސް ސޯލިހު ވަނީ މިވަގުތަކީ އެކުގައި މަސައްކަތް ކޮށް ކުރި ހޯދަން ވީ ވަގުތު ކަމަށް ވިދާޅުވެފަ އެވެ. އަދި ކުރިއަށް އޮތް ކައުންސިލް އިންތިޚާބާއި ޑަބްލިއުޑީސީ އިންތިޚާބުގައި ވަރަށް ރަނގަޅު ނަތީޖާ އެއް އެމްޑީޕީ އަށް ލިބޭނެ ކަމަށް އުންމީދު ކުރެވޭ ކަމަށް ވެސް އެ މަނިކުފާނު ވަނީ ވިދާޅުވެފަ އެވެ.
