ހުސްވެފައިވާ ހިތަދޫ އުތުރު ދާއިރާގެ އެމްޑީޕީ ކެންޑިޑޭޓަކަށް ސޯބެ
19 އެޕްރީލު 2026 | އާދީއްތަ 16:19ރައްޔިތުންގެ މަޖިލީހުގެ ހިތަދޫ އުތުރު ދާއިރާގެ ބައި-އިލެކްޝަންގައި އެމްޑީޕީގެ ފަރާތުން ވާދަކުރާނީ އައްޑޫ ސިޓީގެ ކުރީގެ މޭޔަރު އަބްދުﷲ ސާދިގު (ސޯބެ) ކަމަށް އެ ޕާޓީން ކަނޑައަޅައިފި. މި ދާއިރާގެ ޕްރައިމަރީއަށް ކުރިމަތިލުމަށް ހުޅުވާލި މުއްދަތު ހަމަވިއިރު ސޯބެ ފިޔަވައި އިތުރު މީހަކު ކުރިމަތިލާފައި ނުވާތީ، އޭނާއަށް ވަނީ ޕްރައިމަރީއަކާ ނުލައި ޓިކެޓް ކަށަވަރުވެފައި. މުހައްމަދު ސިނާންގެ ގޮނޑި ގެއްލުމާ ގުޅިގެން ބާއްވާ މި އިންތިޚާބު އޮންނާނީ އަންނަ ޖޫން މަހުގެ 6 ވަނަ ދުވަހުއެ.
އައްޑޫ ސިޓީގެ ކުރީގެ މޭޔަރު އަބްދުﷲ ސާދިގު (ސޯބެ). | އައްޑޫ ސިޓީ ކައުންސިލް
ރައްޔިތުންގެ މަޖިލީހުގެ ހިތަދޫ އުތުރު ދާއިރާގެ ބައި-އިލެކްޝަންގައި އެމްޑީޕީގެ ޓިކެޓުގައި ވާދަކުރާނީ އައްޑޫ ސިޓީގެ ކުރީގެ މޭޔަރު އަބްދުﷲ ސާދިގު (ސޯބެ) ކަމަށް އެމްޑީޕީ އިން އިއުލާން ކޮށްފި އެވެ.
ރައްޔިތުންގެ މަޖިލީހުގައި ހުސްވެފައިވާ ހިތަދޫ އުތުރު ދާއިރާގެ ގޮނޑިއަށް ބާއްވާ ބައި-އިލެކްޝަނުގެ ޕްރައިމަރީއަށް ކުރިމަތިލުމުގެ ފުރުޞަތު 13 އެޕްރީލް އިން ފެށިގެން އާދީއްތަ ދުވަހުގެ މެންދުރު 2:00 އާ ހަމައަށް ހުޅުވާލި އެވެ. ނަމަވެސް ކުރިމަތިލާފައި ވަނީ ސޯބެ އެކަންޏެވެ.
މިކަމާ ގުޅިގެން އެމްޑީޕީ އިން ބުނީ ރައްޔިތުންގެ މަޖިލިހުން ހުސްވެފައިވާ ހިތަދޫ އުތުރު ދާއިރާގެ ގޮނޑީގެ ބައި-އިލެކްޝަންގެ ޕްރައިމަރީ އަށް ކުރިމަތިލުމުގެ މުއްދަތު ހަމަވިއިރު ކުރިމަތިލާފަ ވާނީ އެންމެ މެންބަރަކަށްވާތީ، ޢަބްދުﷲ ޞާދިޤު، ކައުސަރު / ސ. ހިތަދޫ އަކީ އެ ޕާޓީގެ ހިތަދޫ އުތުރު ދާއިރާގެ މަޖިލިސް ކެންޑިޑޭޓްކަމަށް އާއްމުކޮށް އަންގާ އިއުލާންކުރާ ކަމަށެވެ.
ސޯބެ އަކީ މީގެ ކުރިން އައްޑޫ ސިޓީގެ މޭޔަރުކަން 2014 އިން 2019 އަށް ކުރައްވާފައިވާ ބޭފުޅެކެވެ.
ހިތަދޫ އުތުރު ދާއިރާގެ ގޮނޑި ހުސްވީ، އެ ދާއިރާގެ ކުރީގެ މެންބަރު މުހައްމަދު ސިނާނުގެ ސާބިތު ދަރަންޏަކަށް، ހުކުމާ އެއްގޮތަށް ފައިސާ ދައްކާފައި ނުވާތީ އެވެ. ސިނާންގެ ގޮނޑި ގެއްލުނު ނަމަވެސް، ޕީއެންސީގެ ޕްރައިމަރީގައި އެ ގޮނޑިއަށް އަލުން ވާދަކުރަން ނިންމާފައިވާ ކަމަށް ސިނާން ވަނީ ހާމަ ކުރައްވާފަ އެވެ.
ހިތަދޫ އުތުރު ދާއިރާގެ މަޖިލިސް މެންބަރަކު ހޮވުމަށް ބާއްވާ ބައި-އިލެކްޝަން އޮންނާނީ ޖޫން މަހުގެ 6 ވަނަ ދުވަހު އެވެ.
