އައްޑޫގައި އެފްއެސްއެމް. މެދުވެރިކޮށް ތެޔޮ އަގުހެޔޮކޮށް ލިބޭނެ އިންތިޒާމް ހަމަޖެއްސުމަށް އައްޑޫސިޓީ ކައުންސިލުން ގޮވާލައިފި

 އައްޑޫ ސިޓީގައި ތެލުގެ އަގު ބޮޑުވުމާއި ގުޅިގެން ފިއުލް ސަޕްލައި މޯލްޑިވްސް (އެފްއެސްއެމް.) މެދުވެރިކޮށް އަގުހެޔޮކޮށް ތެޔޮ ލިބޭނެ އިންތިޒާމް ހަމަޖެއްސުމަށް އައްޑޫސިޓީ ކައުންސިލުން ގޮވާލައިފި އެވެ.

އައްޑޫސިޓީ ކައުންސިލުން އަދިއްތަ ދުވަހު ނެރެފައިވާ ބަޔާނެއްގައި ބުނެފައި ވަނީ އައްޑޫސިޓީގެ ރައްޔިތުންނަށް ބޭނުންވާ ތެލުގެ ޚިދުމަތްތައް ހޯދުމުގައި މިހާރު ކުރިމަތިވާ ދަތިތަކާއި ތެލުގެ އަގު އިންތިހާ އަށް ކަންބޮޑުވެފައިވާތީ އެކަމާ މެދު އެ ކައުންސިލުން ނުހަނު ބޮޑަށް ކަންބޮޑުވާ ކަމަށެވެ.

މީގެ އިތުރުން އައްޑޫ ސިޓީގެ ގަމުގައި ހުންނަ އެފްއެސްއެމްގެ ތެޔޮ އަޅާ މެޝިނަކީ ދުވަސްވެ ބާވެފައިވާ މެޝިނަކަށް ވުމާއި އެކު ޚިދުމަތްތައް ހޯދުމަށް ރައްޔިތުން ގިނަ ވަގުތުތަކެއް ކިއުގައި ހޭދަކުރަން ޖެހުމުގެ ޝަކުވާ ކައުންސިލަށް ލިބެމުންދާ ކަމަށް ވެސް އެ ބަޔާނުގައި ވެއެވެ. އެކަމުގެ ސަބަބުން އާއްމުންގެ ވަގުތު ގެއްލި ދިރިއުޅުމުގެ އާއްމު ހާލަތަށް އަސަރު ކުރާ ކަމަށް އެ ކައުންސިލުން ބުނެ އެވެ.

 ފިއުލް ސަޕްލައި މޯލްޑިވްސް (އެފްއެސްއެމް.)ގެ ޚިދުމަތް އައްޑޫ ސިޓީގައި މި ވަގުތު އެއްވެސް ވަރަކަށް ލިބެން ނެތްކަން ފާހަގަކޮށް ކައުންސިލުން ބުނީ އައްޑޫގައި ތެލުގެ ޚިދުމަތް ދެނީ އަމިއްލަ ކުންފުނިތަކުން ކަމަށެވެ. ކުރިން އެފްއެސްއެމް އިން އަގު ހެޔޮކޮށް ތެޔޮ ސަޕްލައި ކޮށްދިން ނަމަވެސް އެ އިންތިޒާމް ބަދަލުވުމާއި ގުޅިގެން އައްޑޫގެ ރައްޔިތުންނަށް ތެޔޮ ގަންނަން ލިބެނީ ވަަރަށް ބޮޑު އަގުގައި ކަމަށް ކައުންސިލުން ބުނެ އެވެ.

އެފްއެސްއެމް. އިން ޕެޓްރޯލް ވިއްކަނީ ލީޓަރެއް 18.56 ރުފިޔާ އަށް އަދި ޑީސެލް ލީޓަރެއް 18.68 ރުފިޔާ އަށެވެ. އައްޑޫގެ ޕެޓްރޯލް ޝެޑްތަކުން ޑީސެލް ލީޓަރެއް 31.34 ރުފިޔާ އަށް ވިއްކާ އިރު ޕެޓްރޯލް ލީޓަރެއް ވިއްކަނީ 24.22 ރުފިޔާ އަށެވެ. ކުންފުނިތަކުން ވެސް ވަނީ އެފްއެސްއެމް. އިން ވިއްކާ އަގުގައި ތެޔޮ ވިއްކޭނެ އިންތިޒާމް ހަމަޖެއްސުމަށް އެދިފަ އެވެ. ނަމަވެސް އެ ކަން އެގޮތަށް ހަމަ ނުޖެހުމަކީ ވަރަށް ބޮޑަށް ކަންބޮޑުވާ ކަމެއް ކަމަށް ކައުންސިލުން ވަނީ ބުނެފަ އެވެ.