އައްޑޫ ސިޓީގެ ހިތަދޫގައި ހިއްކި ސަރަހައްދުގައި ހިނގި އެކްސިޑެންޓުގައި އަނިޔާވި ޑްރައިވަރަށް ފަރުވާ ދެމުންދަނީ ވެންޓިލޭޓަރުގައި
އައްޑޫ ސިޓީ ހިތަދޫގައި ބާރު ސްޕީޑުގައި ދުއްވި ކާރެއް ފުރޮޅާލައި ހިނގި ނުރައްކާތެރި އެކްސިޑެންޓުގައި އަނިޔާވި ޑްރައިވަރުގެ ހާލު ސީރިއަސްވެ، ވެންޓިލޭޓަރުގައި ދަނީ ފަރުވާ ދެމުން. މި ހާދިސާގައި ކާރުގައި ތިބި އަނެއް ތިން މީހުންނަށް އައްޑޫ އިކުއެޓޯރިއަލް ހޮސްޕިޓަލުން ފަރުވާ ދީފައިވޭ. އަދި ފުލުހުން ދަނީ މި މައްސަލަ އިތުރަށް ތަހުގީގު ކުރަމުން.
އައްޑޫ ސިޓީ ހިތަދޫ ހިއްކި ސަރަހައްދުގައި ހިނގި މި އެކްސިޑެންޓްގައި ކާރަށް ވެސް ވަނީ ބޮޑެތި ގެއްލުންތަކެއް ލިބިފައި. | ސޯޝަލް މީޑިއާ
އައްޑޫ ސިޓީގެ ހިތަދޫގައި ހިއްކި ސަރަހައްދުގައި ހިނގި ނުރައްކާތެރި އެކްސިޑެންޓުގައި ސީރިއަސް އަނިޔާތަކެއް ލިބުނު ޑްރައިވަރަށް ފަރުވާ ދެމުންދަނީ ވެންޓިލޭޓަރުގައި ކަމަށް އައިޖީއެމްއެޗުން ބުނެފި އެވެ.
މި ހިނގާ މަރޗް މަހުގެ 21 ވަނަ ދުވަހުގެ 16:50 އެހާކަންހާއިރު، މި އެކްސިޑެންޓް ހިނގީ ބާރު ސްޕީޑްގައި ދުއްވުމުގެ ސަބަބުން ކާރު ފުރޮޅާލައިގެން ކަމަށް ފުލުހުން ބުނެ އެވެ. މި ކާރުގައި ތިބި ހަތަރު މީހުންނަށް އެކިވަރުގެ އަނިޔާ ލިބިފައިވާއިރު، ކާރު ދުއްވި ޑްރައިވަރަށް ސީރިއަސް އަނިޔާތަކެއް ލިބިފައިވެ އެވެ.
ޑްރައިވަރަށް ސީރިއަސް އަނިޔާތަކެއް ލިބިފައިވާތީ، އިތުރު ފަރުވާ އަށް ހޮނިހިރު ދުވަހުގެ ހެނދުނުގެ ވަގުތެއްގައި ވަނީ އައިޖީއެމްއެޗަށް ގެނެސްފަ އެވެ.
ރާއްޖެއެމްވީއަށް އައިޖީއެމްއެޗްގެ މިޑީއާ އޮފިޝަލް ވިދާޅުވީ، އެކްސިޑެންޓްގައި އަނިޔާވި 42 އަހަރުގެ ދިވެހި ފިރިހެނަކަށް ފަރުވާ ދެމުންދާ ކަމަށާއި، އޭނާ އަށް ފަރުވާ ދެމުންދަނީ ވެންޓިލޭޓަރުގައި ކަަމަށެވެ.
އޭނާގެ ހާލު ސީރިއަސް ވެފައިވާއިރު، ކާރުގައި ތިބި އަނެއް 3 މީހުންނަށް އައްޑޫ އިކުއެޓޯރިއަލް ހޮސްޕިޓަލުގައި ފަރުވާ ދީފައިވެ އެވެ. ނަމަވެސް އެމީހުންގެ ހާލަތާ ގުޅޭގޮތުން އެ ހޮސްޕިޓަލުގެ ބަހެއް ވަނީ ލިބޭ ގޮތް ނުވެފަ އެވެ. މައުލޫމާތު ލިބިފައިވާ ގޮތުގައި އެ 3 މީހުންނަށް ސީރިއަސް އަނިޔާއެއް ނުލިބެ އެވެ.
މި އެކްސިޑެންޓުގެ މައްސަލަ ފުލުހުން އިތުރަށް ތަހުގީގު ކުރަމުންދާއިރު، މީގެ ކުރިން ވެސް އައްޑޫ ސިޓީގައި ނުރައްތެރި އެކްސިޑެންޓްތައް ހިނގައި މީހުންގެ ފުރާނަ ގެއްލިފައިވެ އެވެ.
