އައްޑޫ ސިޓީގައި ހަވާއެރުވުން އެމްއެންޑީއެފުން ފަހުވަގުތު ކެންސަލް ކުރީ ސިޔާސީ ނުފޫޒުން: ކައުންސިލް
އައްޑޫ ސިޓީގެ ހިތަދޫ ސެންޓްރަލް ޕާކު ހުޅުވުމުގެ ރަސްމިއްޔާތުގައި ހަވާ އެރުވުމަށް ހުރިހާ ތައްޔާރީތަކެއް ވެފައިވަނިކޮށް، ސިފްކޯއިން އެކަން ފަހުވަގުތު ކެންސަލް ކުރުމާ ގުޅިގެން ކައުންސިލުން ވަނީ ކަންބޮޑުވުން ފާޅު ކޮށްފައި. ޓެކްނިކަލް މައްސަލައެއް ދިމާވެގެން ކަމަށް ބުނެ ހަވާ އެރުވުން ހުއްޓާލީ ސިޔާސީ ނުފޫޒުން ކަމަށް ބައެއް ކައުންސިލަރުން ތުހުމަތު ކޮށްފައިވާއިރު، މިއީ ރައްޔިތުންގެ އުފަލަށް ސަރުކާރުން ހުރަސްއެޅުން ކަމަށް ވިދާޅުވެފައިވޭ.
އެކިއެކި ރަސްމިއްޔާތުތަކުގައި އެމްއެންޑީއެފުން ހަވާ އަރުވާ، މިއީ ވިޔަފާރީގެ އުސޫލުން ކުރާ ކަމެއް.
އައްޑޫ ސިޓީގެ ހިތަދޫ ސެންޓްރަލް ޕާކް ހުޅުވުމުގެ ރަސްމިއްޔާތުގައި ހަވާ އަރުވުމުގެ ހުރިހާ އިންތިޒާމެއް ހަމަޖެއްސުމަށްފަހު، އެކަން ފަހުވަގުތު ކެންސަލް ކޮށްފި އެވެ.
އައްޑޫ ސިޓީގެ ކައުންސިލުން ތަރައްގީ ކުރި މި ޕާކު ހުޅުވާ ރަސްމިއްޔާތާއެކު، ހަވާ އެރުވުމަށް ނިންމާފައިވަނީ ހުކުރު ދުވަހުގެ ރޭ 8:30 ގަ އެވެ.
ހަވާ އެރުވުން ފަހު ވަގުތު ކެންސަލް ކުރުމާއި ގުޅިގެން ކަންބޮޑުވުން ފާޅު ކުރައްވައި، އައްޑޫ ސިޓީ ކައުންސިލުގެ ޑެޕިއުޓީ މޭޔަރު، މުހައްމަދު ޝުއާއު ވިދާޅުވީ ހުކުރު ދުވަހުގެ ހަވީރު 5:30 ގައި ހަވާއެރުވުން ކެންސަލް ކުރިކަން ސިފައިންގެ ކުންފުނި ސިފްކޯއިން ކައުންސިލަށް އީމެއިލްއަކުން އަންގާފައިވާ ކަމަށާއި، ކެންސަލް ކުރީ ޓެކްނިކަލް މައްސަލައެއް ދިމާވެގެން ކަމަށް ބުނެފައިވާ ކަމަށެވެ.
ނަމަވެސް ހަވާ އެރުވުމަށްޓަކައި ކުރަން ޖެހޭ ހުރިހާ މަސައްކަތެއް އެމްއެންޑީއެފުން ކުރި ކަމަށާއި، ހުކުރު ދުވަހުގެ މެންދުރުފަހު 3:30 ހާއިރު ސެޓަޕް ޖަހާފައިވާ ކަމަށް އޭނާ ވިދާޅުވި އެވެ. އަދި ވިދާޅުވީ ހަވާ އެރުވުން ކެންސަލް ކުރުމާއި ގުޅިގެން އައްޑޫގައި މަސައްކަތް ކުރާ އެމްއެންޑީއެފްގެ ބޭފުޅުންނަށް ގުޅުމުން އެބޭފުޅުންނަށް ވެސް ކެންސަލް ކުރިކަން ނޭނގޭ ކަމަށް ބުނެފައިވާ ކަމަށެވެ.
މީގެ އިތުރުން ހިތަދޫ ކޮރޮވައު ދާއިރާގެ ކައުންސިލް މެންބަރު އިބްރާހިމް ޝިނާޒު ވިދާޅުވީ، ހަވާ އެރުވުން ކެންސަލް ކުރީ ސިޔާސީ ނުފޫޒާއެކު ކަމަށާއި، އެމްއެންޑީއެފްއަށް ސިޔާސީ ނުފޫޒު ވަދެފައިވާ މިންވަރު މިކަމުން އެކަނި ވެސް ހާމަވާ ކަމަށެވެ. މިއީ އައްޑޫގައި ތިބި ތަސައްވުރު ނުފުދޭ ސިޔާސީ ބައެއް ބޭފުޅުން ހިންގި ވަރަށް ނާހުޒީބީ އަމަލެއް ކަމަށް އޭނާ ވިދާޅުވި އެވެ.
ޝިނާޒު ވިދާޅުވީ ފިތުރު އީދާއެކު، ޕާކު ހުޅުވުމަށް ނިންމައި، ހަވާ އެރުވުމަށް ނިންމީ އައްޑޫގެ ރައްޔިތުންގެ އުފަލަށްޓަކައި ކަމަށާއި، ނަމަވެސް މިއަދުގެ ސަރުކާރުން އެ އުފަލަށް ހުރަސްއަޅާފައިވާ ކަަމަށެވެ.
ހިތަދޫ ސެންޓްރަލް ޕާކު ތަރައްގީ ކުރަން ކައުންސިލުން ބަޔަކާ ހަވާލުކުރީ 2024 ވަނަ އަހަރުގެ ތެރޭގަ އެވެ.
ހުކުރު ދުވަހުގެ ރޭ ބޮޑު ރަސްމިއްޔާތެއްގައި ޕާކު ހުޅުވިއިރު، 2،000ހަށްވުރެ ގިނަ މީހުންނާއި ކުޑަކުދިން ބައިވެރިވެފައިވާ ކަަމަށް ކައުންސިލުން ބުނެ އެވެ.
