ރަމަޟާން މަހަކީ ޗުއްޓީ ނެގުމާއި ނިދުމުގެ މައްސަރެއް ނޫން: ޚުތުބާ

ރަމަޟާން މަހަކީ މަސައްކަތްތައް ހުއްޓައިލައި ޗުއްޓީ ނެގުމާއި ނިދުމުގެ މައްސަރެއް ނޫން ކަމަށް ހުކުރު ޚުތުބާގައި ބުނެފި އެވެ. 

'' ނަޞްރާއި ކާމިޔާބުގެ މައްސަރު '' މި މައުޟޫއުއަށް ރާއްޖޭގެ އެކިކަންކޮޅުތަކަށް އިއްވި ޚުތުބާގައި ބުނީ،  ރަމަޟާން މަހަކީ ހަމައެކަނި ކެއުމާއި ބުއިމުން ދުރުހެލިވުމުގެ މަހެއް ނޫން ކަމަށާއި، މިއީ ޖިހާދުގެ މައްސަރު ކަމަށެވެ. އިންސާނާގެ ހަށިގަނޑުންކުރެވޭ ޖިހާދުގެ އިތުރަށް އޭނާ ގެ ހަވާނަފުސާ ދެކޮޅަށް އެންމެ ފުރިހަމަ މާނައިގައި ޖިހާދުކުރެވޭ މައްސަރު ކަމަށާއި، މި މައްސަރުގައި ހިފާ ރޯދައިގެ ސަބަބުން އޭނާ ގެ ހަވާނަފުސުގެ އެދުންތަކުގެ މައްޗަށް ގަދަވެގަނެ، ނަފުސު ތަހުޒީބުކުރުމަށް ބާރުއަޅާ ކަމަށެވެ. 

ރަމަޟާން މަހަކީ ނަފުސުގެ ޖިހާދުގެ އިތުރަށް އިސްލާމްދީނުގެ އަދުއްވުންނާ ދެކޮޅަށް މުސްލިމުން އެންމެ ބޮޑެތި ނަސްރާއި ކާމިޔާބީތައް ހާސިލުކުރި މައްސަރުކަން ފާހަގަކޮށް ޚުތުބާގައި ވަނީ އިސްލާމީ ތާރީޚު ބަދަލުކޮށްލި މަޝްހޫރު ބަދުރު ހަނގުރާމައަށް އަލިއަޅުވާލާފަ އެވެ.

ޚުތުބާގައި ބުނީ، ހަގީގީ ކާމިޔާބަކީ ބާރު ލިބޭއިރު، އަނިޔާވެރި ނުވުން ކަމަށާއި، އެކަން މިހާދިސާއިން އެނގޭ ކަމަށެވެ. އަދި ރޯދަވެރިޔާގެ ހަގީގީ ކާމިޔާބު އޮތީ ރިވެތި އަހުލާގުން އޭނާ ގެ ނަފުސު ތަހުޒީބު ކުރުމުގައި ކަމަށެވެ. 

އެ ހަނގުރާމައާ ބެހޭ ގޮތުން الله سُبْحَانَهُ وَتَعَالَى ވަޙީކުރައްވައިފައި ވާ އާޔަތުގެ މާނާގައި ވަނީ: "ހަމަކަށަވަރުން، ތިޔަބައިމީހުން ނިކަމެތީން ކަމުގައިވަނިކޮށް، بدر ހަނގުރާމައިގައި الله، ތިޔަބައިމީހުންނަށް نصرދެއްވިއެވެ. ފަހެ، ތިޔަބައިމީހުން اللهއަށް تقوىވެރިވާށެވެ! (އެއީ) ތިޔަބައިމީހުން شكرވެރިވުމަށް ޓަކައެވެ." މި ކަމުން އެނގެނީ ނަސްރު ލިބޭނީ ހަމައެކަނި ބާރުގެ ގޮތުންނޫން ކަމާއި الله سُبْحَانَهُ وَتَعَالَى އަށް އޮންނަ އިތުބާރާއި އީމާންކަމުގެ ވަރުގަދަކަމުންނާއި އެކަލާނގެ ރަޙުމަތުގެ ސަބަބުންކަމެވެ. އަދި މުސްލިމުންނަށް ލިބުނު އެންމެ ބޮޑު އެއް ފަތަހަކަމުގައިވާ މައްކާ ފަތަހަ ކުރެވުނީ ހިޖުރައިން އަށްވަނަ އަހަރުގެ ބަރަކާތްތެރި ރަމަޟާންމަހުގެ ވިހިވަނަ ދުވަހެވެ. އެ ފަތަހައެއްގެ ސަބަބުން މުޅި އަރަބިކަރަ ފަތަހަވި އެވެ. މުސްލިމުންގެ ދިހަ ހާސް މުޖާހިދުންނާ އެކު މާތް ނަބިއްޔާ مُحَمَّدُ رَسُوْلُ اللهِ صَلَّى اللهُ عَلَيْهِ وَسَلَّمَ މައްކާއަށް ވެދެވަޑައިގަތީ ތަވާޟުޢުވެރިކަމާއި މަޑުމައިތިރިކަންމަތީގަ އެވެ. 

ހުކުރު ޚުތުބާ 

ރަމަޟާން މަހަކީ ކަންނެތްކަން އިޚުތިޔާރުކޮށް، މަސައްކަތްތައް ހުއްޓައިލައި ޗުއްޓީ ނެގުމާއި ނިދުމުގެ މައްސަރެއް ނޫންކަން ފާހަގަކޮށް ޚުތުބާގައި ބުނީ، އެއީ އަޅުކަމުގައި ހީވާގިވެ ކުރިއަރައިދާންވީ މައްސަރު ކަމަށެވެ. ޚާއްސަކޮށް އެ މަހުގެ ފަހު ދިހައިގައި އިތުރަށް ހީވާގިވެ އަޅުކަމުގައި ހޭދަ ކުރުމަށް ޚުތުބާގައި ގޮވާލާފައިވެ އެވެ. އަދި ރޯދަމަހުގެ ކާމިޔާބީ ހޯދާން ބޭނުން މީހާ ލައިލަތުލްޤަދުރި ހޯދިމަށް ގަދައަޅައި މަސައްކަތް ކުރުމަށް ވެސް ނަސޭހަތްތެރިވެފައިވެ އެވެ.

ރަމަޟާންމަހު ރޯދައަށް ހުންނައިރު، ކުރެވޭ ކުށްތަކުންނާއި ދެކެވޭ ބޭކާރު ވާހަކަތަކުގެ ކައްފާރާއެއްގެ ގޮތުގައި ރޯދައިގެ އަޅުކަން ފުރިހަމަކުރުމަށާއި އީދުގެ އުފަލުގައި ފަގީރުންނާއި ޔަތީމުން ވެސް ބައިވެރިވާ ބަޔަކަށް ހެދުމަށްޓަކައި ފިތުރު ޒަކާތް ލައްވާފައިވާ ކަމަށާއި، ޒަކާތް ދެއްކުމަށް ވެސް ޚުތުބާގައި ހަނދާން ކޮށްދީފައިވެ އެވެ.  

މީގެ އިތުރުން ޚުތުބާގައި ވަނީ  މުސްލިމު މުޖުތަމައުތަކުގައި ރަމަޟާން މަހުގެ މަތިވެރިކަމާއި މާތްކަން ދެމެހެއްޓުމަށް ވެސް އެދިފަ އެވެ. 

އެގޮތުން ލޯކަލް ޓޫރިޒަމް ހިންގާ ރަށްރަށުގައި، ފަތުރުވެރީން ވެސް އާންމުންގެ ތެރެއަށް ނުކުމެއުޅޭ އިރު، އިޖުތިމާއީ މިންގަޑަށް ފެތޭ ގޮތަށް އުޅުމަށް އެ މީހުންނަށް އިރުޝާދު ދިނުމަށް ފަތުރުވެރީންނަށް ޚިދުމަތްދޭ ފަރާތްތަކާއި ކައުންސިލުތަކަށް އިލްތިމާސް ކޮށްފައިވެ އެވެ.