ޝަރުއީ އަދި ސިއްހީ ހަމަތަކުގެ މަތީން ލޭ ހަދިޔާކުރުމަށް ޝަރުތުހަމަވާ އެންމެން ލޭ ހަދިޔާ ކުރުމަށް ޚުތުބާ ގައި ގޮވާލައިފި

ޝަރުއީ އަދި ސިއްހީ ހަމަތަކުގެ މަތީން ލޭ ހަދިޔާކުރުމަށް ޝަރުތުހަމަވާ އެންމެން ލޭ ހަދިޔާ ކުރުމަށް ހުކުރު ޚުތުބާ ގައި ގޮވާލައިފި އެވެ. 

''ލޭ ހަދިޔާކުރުމަކީ ސަދަގާތެއް'' މިމައުޟޫއަށް ރާއްޖޭގެ އެކިކަންކޮޅުތަކަށް އިއްވި ޚުތުބާ ގައި ބުނީ، މާތް اللهގެ އަޅުތަކުންނަށް އެހީތެރިވުމާއި، ފައިސާއާއި މުދަލުން ހޭދަކުރުމާއި ސަދަގާތްކުރުމަކީ، ދަރުމަހުރި ކަންކަން ކަމަަށާއި،އެންމެ ކުޑަމިނުން އުފާވެރި މޫނަކާއިގެން ބައްދަލުކޮށް، ހެޔޮ ބަހެއް ބުނުމީ ވެސް ކުރެވޭ ސަދަގާތެއް ކަމަށެވެ. ބައެއް ހެޔޮ އަމަލުތަކުގެ ސަވާބު އެތައް ގުނައަކަށް އިތުރުވާ ކަމަށާއި، އޭގެ ތެރޭގައި މީހެއްގެ ފުރާނަ ސަލާމަތްކުރުމަށް އަމިއްލަ ހަށިގަނޑުގައި ހުރި ލޭ ހަދިޔާކުރުމަކީ ސަދަގާތެއް ކަމަށެވެ.

ޚުތުބާގައި ބުނީ، މާތް اللهގެ އަޅުތަކުންނަށް ޖެހޭ ބޭނުންތައް ފުއްދައިދީ، އެއުރެންނަށް ޖެހޭ ބޮޑެތި ކަންކަމުގައި މިއަދު އެހީތެރިވުމަކީ އާޚިރަތް ދުވަހުން ތިޔަބައިމީހުން އުފުލާންޖެހޭ ބޮޑެތި މުޞީބާތްތަކުން ދިންނަވާނޭ ކަމެއް ކަމަށެވެ. ލޭ އަޅާން ބޭނުންވާ ހާލަތް ތަކުގައި، ބަލި މީހަކަށް އަޅާން ބޭނުންވާ ލޭ ހަދިޔާކޮށް ދިނުމަކީ، އޭނާ ގެ ފުރާނަ ސަލާމަތްކޮށް ދިނުން ފަދަ ކަމެއްކަން ފާހަގަކޮށް ޚުތުބާގައި ބުނީ، ހައްގަކާ ނުލައި އެންމެ މީހަކު މެރުމަކީ، ދުނިޔޭގައި ވާހައި ބަޔަކު މެރުން ފަދަ ނުބައިކަމެއް ކަމަށާއި، ހަމަ އެ ފަދައިން އެންމެ މީހެއްގެ ފުރާނަ ސަލާމަތްކޮށްދިނުމަކީ، އެ އެންމެން ނުމަރައި ދިރިތިބޭން ދޫކޮށްލުން ފަދަ ހެޔޮ ކަމެއް ކަމަށެވެ.

މާތް ﷲ ވަހީކުރައްވައިފައި ވެ އެވެ. މާނައީ: "ހަމަކަށަވަރުން ނަފުސެއް މަރައިގެން، ނުވަތަ ބިމުގައި ފަސާދައެއް އުފައްދައިގެން ނޫން ގޮތަކަށް، ނަފުސެއް މަރައިފި މީހަކު، އެންމެހައި މީސްތަކުން މެރި ފަދައެވެ. އަދި އެ ނަފުސު ދިރުވައިފި މީހާ (އެބަހީ: ނުމަރައި ދުނިޔޭގައި ބަހައްޓައިފި މީހާ) އެންމެހައި މީސްތަކުން ދިރުވި ފަދައެވެ." ބަލިމީހެއްގެ ހަށިގަނޑަށް އަޅާންޖެހޭ ލޭ ނުލިބުމަކީ އޭނާ ދުނިޔެ ދޫކޮށްފާނޭ ކަމެކެވެ. އަދި އޭނާ ގެ ހަށިގަނޑަށް އަޅާން ބޭނުންވާ ލޭ ހަދިޔާކުރުމަކީ އޭނާއަށް ދުނިޔޭގައި ދިރިހުރުމުގެ ފުރުޞަތު ހޯދައިދިނުމަށް ޓަކައި ކުރެވޭ ހެޔޮ ކަމަކަށްނޫނީ ނުވާނެއެވެ. ވީ އިރު އެއީ ކިޔެވިދިއަ އާޔަތުގައިވާ ފަދައިން މަތިވެރި ސަވާބާއި ގިނަގުނަ އަޖުރު ލިބޭނޭކަމެކެވެ.

ހުކުރު ޚުތުބާ 

މީގެ އިތުރުން ރާއްޖޭގެ ބުލަޑުބޭންކުތަކަށް ލޭ ހަދިޔާ ކުރާނެ މީހުންނަށް ބޭނުންވެފައިވާކަން ފާހަގަކޮށް ޚުތުބާ ގައި ބުނީ، އެންމެ މީހެއްގެ ފުރާނަ ސަލާމަތްކޮށްދިނުމަކީ އެތައްބަޔެއްގެ ފުރާނަ ސަލާމަތްކޮށްދިނުން ކަމަށާއި، މިއީ ދެމިގެންވާ ސަދަގާތެއްކަމުގައި އިލްމުވެރީން ދެކެވަޑައިގަންވާ ކަމަށެވެ.

އެހެންކަމުން ޝަރުއީ އަދި ސިއްހީ ހަމަތަކުގެ މަތީން ލޭ ހަދިޔާކުރުމަށް ޝަރުތުހަމަވާ އެންމެން ލޭ ހަދިޔާ ކުރުމަށް ޚުތުބާގައި ވަނީ ގޮވާލާފަ އެވެ.