ރަމަޟާން މަހު ފަތުރުވެރީންނަށް އާންމުންގެ ކުރިމަތީގައި ކެއިންބުއިމުގެ ޚިދުމަތް ދިނުމަކީ ހުއްދަ ކަމެއް ނޫން: ޚުތުބާ

ރަމަޟާން މަހު ފަތުރުވެރީންނަށް އާންމުންގެ ކުރިމަތީގައި ކެއިންބުއިމުގެ ޚިދުމަތް ދިނުމަކީ ހުއްދަ ކަމެއް ނޫން ކަމަށް ހުކުރު ޚުތުބާގައި ބުނެފި އެވެ.

'' ރުއްސެވުމާއި ފުއްސެވުމުގެ މަހަށް މަރުހަބާ '' މިމައުޟޫއަށް ރާއްޖޭގެ އެކިކަންކޮޅުތަކަށް އިއްވި ޚުތުބާ ގައި ބުނީ، ރަމަޟާން މަހަކީ ހެޔޮކަމާއި ބަރަކާތާއި ފާފަފުއްސެވުމުގެ މޫސުން ކަމަށާއި، މުސްލިމު މުޖުތަމައުތަކުގައި ރަމަޟާން މަހުގެ މަތިވެރިކަމާއި މާތްކަން ދަމަހައްޓާން ޖެހޭ ކަމަށެވެ. ވަކީން ޚާއްސަކޮށް މީހުން ދިރިއުޅޭ ރަށްތަކުގައި ފަތުރުވެރީންނަށް ޚިދުމަތްދޭ ފަރާތްތަކުން މިކަމަށް ސަމާލުކަންދޭން ޖެހޭ ކަމަށް ޚުތުބާގައި ބުނެފައިވެ އެވެ.

އެގޮތުން ހާމަކަން ބޮޑު ގޮތުގައި ރޯދަމަހުގެ ދުވާލު، މީހުން ދިރިއުޅޭ ރަށްތަކުގައި ރެސްޓޯރެންޓު ފަދަ ތަންތަން ހުޅުވައިގެން އާންމުންގެ ކުރިމަތީގައި ކެއިންބުއިމުގެ ޚިދުމަތް ދިނުމަކީ ހުއްދަ ކަމެއް ނޫން ކަމަށް ޚުތުބާގައި ބުނެފައިވެ އެވެ.

ޚުތުބާގައި ބުނީ، މީހުން ދިރިއުޅޭ ރަށްރަށުގައި މިފަދަ ޚިދުމަތެއް ފަތުރުވެރީންނަށް ފޯރުކޮށްދޭ ފަރާތްތަކުން އެ ޚިދުމަތެއް ފޯރުކޮށް ދިނުމަށް ޚާއްސަ އިންތިޒާމުތަކެއް ހަމަޖައްސަން ޖެހޭ ކަމަށެވެ. އަދި ޝަރުއީ އުޒުރަކާ ހުރެ ރޯދަ ދޫކޮށްލާ އުޒުރުވެރީން ވެސް ރޯދަމަހުގެ ހުރުމަތް ދެމެހެއްޓުމަށް ޚުތުބާގައި ވަނީ ނަސޭހަތްތެރިވެފަ އެވެ. 

މީގެ އިތުރުން ޚުތުބާގައި ބުނީ، ފަރުޟުތައް އަދާކުރުމަށް ފަހު، ގޭތެރޭގައި ކުރާން ހުންނަ މަސައްކަތުގައި އެހީތެރިވާން ޖެހޭ ކަމަށާއި، ވަކީން ޚާއްސަކޮށް ރޯދަމަހު ވަކި ބަޔަކަށް ގޭތެރޭގެ މަސައްކަތް ދޫކޮށްލައި، ތިމާ އަޅުކަމުގައި ވަގުތު ހޭދަކުރުމަކީ ދީނުގައި އޮތް ގޮތް ނޫން ކަމަށެވެ.

ގިނަގުނަ ދަރުމަހުރީ އެކަކު އަނެކަކަށް އެހީވުމުގައެވެ. މާތް الله ވަޙީކުރައްވައިފައިވެ އެވެ. މާނަައީ، "އަދި ހެޔޮ ކަންތައް ކުޅައުމާއި ތަގުވާވެރިވުމުގެ މައްޗަށް ތިޔަބައިމީހުން އެކަކު އަނެކަކަށް އެހީވެ، ވާގިވެރިވާށެވެ! އަދި ފާފަވެރިވުމާއި އަދާވާތްތެރިވުމުގެ މައްޗަށް ތިޔަބައިމީހުން އެކަކު އަނެކަކަށް އެހީވެ، ވާގިވެރިނުވާށެވެ!"

ހުކުރު ޚުތުބާ 

މީގެ އިތުރުން ޚުތުބާގައި ވަނީ ފަރުޟު ރޯދަޔާ ބެހޭ މުހިންމު ބައެއް ހުކުމްތައް ދެނެގަތުމަށް ނަސޭހަތްތެރިވެފަ އެވެ. އަދި ރަމަޟާން މަހުގެ ވަގުތުތައް ބޭކާރު ނުކުރުމަށް އިލްތިމާސްކޮށް ޚުތުބާގައި ބުނީ، އެ މަހުގެ ރޭތައް އިހުޔާކުރާން ޖެހޭ ކަމަށާއި، އަޅުކަމުގައި ގިނަ ވަގުތު ހޭދަ ކުރާން ޖެހޭ ކަމަށެވެ.

ޚުތުބާގައި ބުނީ، ޝަރުއީ އުޒުރެއްނެތި ރޯދަމަހު ގަސްތުގައި ރޯދައެއް ދޫކޮށްފި މީހާ އެ ކުރީ ބޮޑުވެގެންވާ ފާފައެއް ކަމަށާއި، އެ މީހަކަށް އޮތީ އެ ކަމުން ތައުބާވުމާ އެކު އެ ރޯދަ ގަޟާ ކުރުން ކަމަށެވެ.