ރަމަޟާންމަހަކީ ހެޔޮކަމާއި ބަރަކާތާއި ފާފަފުއްސެވުމުގެ މޫސުން، ދުއާ ކުރުން ގިނަ ކުރޭ: ޚުތުބާ

ރަމަޟާންމަހަކީ ހެޔޮކަމާއި ބަރަކާތާއި ފާފަފުއްސެވުމުގެ މޫސުން ކަމަށާއި، ދުއާ ކުރުން ގިނަ ކުރުމަށް ހުކުރު ޚުތުބާގައި ގޮވާލައިފި އެވެ. 

'' ތަގުވާވެރިވުމާއި ތައުބާގެ މައްސަރު '' މިމައުޟޫއަށް ރާއްޖޭގެ އެކިކަންކޮޅުތަކަށް އިއްވި ޚުތުބާގައި ވަނީ މިއީ ގުރުއާން ބާއްވާލެއްވުނު މަސް ކަމާއި، ރަމާޟަން މަހުގެ މާތް ކަމަށް އަލިއަޅުވާލާފަ އެވެ. 

ޚުތުބާގައި ބުނީ، ރަމަޟާން މަހަކީ ހެޔޮކަމާއި ބަރަކާތާއި ފާފަފުއްސެވުމުގެ މޫސުން ކަމަށާއި، މުސްލިމު މުޖުތަމައުތަކުގައި ރަމަޟާން މަހުގެ މަތިވެރިކަމާއި މާތްކަން ދަމަހައްޓާން ޖެހޭ ކަމަށެވެ. އަދި ކުށްފާފަތަކުން ތައުބާވުން ގިނަ ކުރުމަށް ޚުތުބާގައި ނަސޭހަތްތެރިވެފައިވެ އެވެ. 

ތައުބާވުމަކީ ކޮންމެ މީހަކު ވެސް އެ މީހަކަށް ކުރެވިފައިވާ އެންމެހައި ފާފައިން އެއްކިބާވެ، އެ ކަންކަން ކުރެވުނު ކަމާ މެދު ދެރަވެ ހިތާމަކޮށް، އެ ކަމަށް އަރައިނުގަތުމަށް އަޒުމު ކަނޑައަޅައި ފާފަފުއްސެވުން އެދި އިޚުލާސްތެރިކަމާއެކު މާތް اللهގެ ހަސުރަތުގައި ދުއާދެންނެވުންކަން ފާހަގަކޮށް ޚުތުބާގައި ބުނީ، މީހެއްގެ ހައްގަކަށް އަރައިގަނެވިފައިވާ ނަމަ އެ ހައްގު އަދާކުރަން ޖެހޭ ކަމަށެވެ. އަދި ކުރެވުނު ފާފައަކީ ކުޑަ ފާފައަކަށް ވިއަސް ނުވަތަ ބޮޑުފާފައަކަށް ވިއަސް އެ ފާފައަކުން ތައުބާވާން ޖެހޭ ކަމަށެވެ.

ފާފައިން ތައުބާވުމަށް އިރުޝާދުދެއްވައި މާތް الله ވަޙީކުރައްވައިފައި ވެ އެވެ. މާނައީ: "ކަލޭގެފާނު ވިދާޅުވާށެވެ! އެއުރެންގެ އަމިއްލަ نفسތަކުގެ މައްޗަށް ފާފައިން إسرافކޮށްފައިވާ، ތިމަންރަސްކަލާނގެ އަޅުތަކުންނޭވެ! ތިޔަބައިމީހުން اللهގެ رحمةން އުންމީދު ކަނޑައިނުލާށެވެ! ހަމަކަށަވަރުން، اللهއީ، އެންމެހައި ފާފަތައްފުއްސަވާ ރަސްކަލާނގެއެވެ. ހަމަކަށަވަރުން، އެކަލާނގެއީ، ގިނަގިނައިން ފާފަފުއްސަވާ، رحيمވަންތަ ރަސްކަލާނގެއެވެ." ތިމާއަށް ކުރެވިފައިވާ އެންމެހައި ފާފައިން ތައުބާވުމަކީ މުހިންމުކަމެކެވެ. އެހެންކަމުން އަހުރެންގެ އަމިއްލަ ނަފުސަށާއި ތިޔަ އެންމެން މާތް ﷲގެ ޙަޟުރަތަށް ރުޖޫޢަވެ ތައުބާވުމަށް ގޮވައިލަމެވެ!

ހުކުރު ޚުތުބާ 

ޚުތުބާގައި ބުނީ، ތައުބާވުމަކީ ތަގުވާވެރިކަމުގެ މަތީގައި ދެމިހުރުމަށް މަގުފަހިވާނޭ ކަމެއް ކަމަށާއި، ތަގުވާވެރިވުމަކީ ކޮންމެ ކަމެއްގައި ވެސް މާތް ﷲގެ އަމުރުފުޅުތަކަށް ކިޔަމަންވެ، އެކަލާނގެ ނަހީކުރެއްވި ކަންކަމުން ދުރުހެލިވުން ކަމަށެވެ. 

މީގެ އިތުރުން ޚުތުބާގައި ބުނީ، މި މައްސަރުގެ މަތިވެރިކަމާއި ދަރުމަ އެދޭކަމުގައިވާ ނަމަ މާތް ނަބިއްޔާ مُحَمَّدُ رَسُوْلُ اللهِ صَلَّى اللهُ عَلَيْهِ وَسَلَّمَ މި މައްސަރުގައި ކަންކުރެއްވި ގޮތް ދަސް ކުރަން ޖެހޭ ކަމަށެވެ. އަދި އެކަލޭގެފާނުގެ ސީރަތަށް ބަލާ އިރު ރަމަޟާން މަހު އެހެން މައްސަރުތަކަށް ވުރެ އަޅުކަމުގައި ހޭދަކުރައްވާ ވަގުތު އިތުރު ކަމަށެވެ.

އެހެންކަމުން މި މަތިވެރި މައްސަރުގައި ލިބިފައިވާ ފުރުސަތުގެ ބޭނުންހިފައި އަޅުކަން ކުރުމުގައި ގިނަ ވަގުތު ހޭދަކޮށް، މާތް ﷲ ގެ ހަޟްރަތުގައި ދުއާ ކުރުން ގިނަ ކުރުމަށް ޚުތުބާގައި ގޮވާލާފައިވެ އެވެ. އަދި މާތް ﷲ މި މައްސަރުގައި ނަރަކައިން މިންޖުކުރައްވާ އަޅުންގެތެރެއިން ލެއްވުން އެދި ދުއާ ކުރުމަށް ވެސް ހަނދާން ކޮށްދީފައިވެ އެވެ.