ފުރަތަމަ 6 މަހުން 2.2 މިލިއަން ރުފިޔާގެ ގެއްލުން ލިބުނު ޑިވެލޮޕްމަންޓް ބޭންކްގެ ދޮރު އެންމެ ފަހުން ހުޅުވުނު ދުވަސް މިނިސްޓަރު ސައީދަކަށް ވިދާޅެއް ނުވެވުނު
ޑިވެލޮޕްމަންޓް ބޭންކް އޮފް މޯލްޑިވްސްގެ ދޮރު އެންމެ ފަހުން ހުޅުވި ދުވަހާ ގުޅޭގޮތުން މެންބަރު ނާޒިލް ކުރެއްވި ސުވާލަށް އިކޮނޮމިކް މިނިސްޓަރު މުހައްމަދު ސައީދު ސީދާ ޖަވާބެއް ދެއްވާފައެއް ނުވޭ. އޮޑިޓް ރިޕޯޓުން ހާމަވާގޮތުގައި، އެއްވެސް ވިޔަފާރި މުއާމަލާތެއް ނުހިންގި ނަމަވެސް، އޮފީސް ކުއްޔާއި މުސާރަ ފަދަ އިދާރީ ހިންގުމުގެ ޚަރަދުތަކުގެ ސަބަބުން މިދިޔަ އަހަރުގެ ފަހު ހަ މަސްދުވަހު އެ ބޭންކަށް 2.2 މިލިއަން ރުފިޔާގެ ގެއްލުން ވެފައިވޭ. މިނިސްޓަރު ވިދާޅުވީ ބޭންކު އޮޕަރޭޝަނަށް ގެނައުމަށް ބޭނުންވާ މަސައްކަތްތައް މިހާރު ކުރިއަށްދާ ކަމަށް.
ރައީސް ޑރ. މުހައްމަދު މުއިއްޒުގެ އިކޮނޮމިކް މިނިސްޓަރު މުހައްމަދު ސައީދު | ރައްޔިތުންގެ މަޖިލިސް
ފުރަތަމަ 6 މަސް ދުވަހުގެ ތެރޭގައި 2.2 މިލިއަން ރުފިޔާގެ ގެއްލުމެއް ލިބުނު، ދިވެހި ސަރުކާރުން އަލަށް އުފެއްދި ޑިވެލޮޕްމަންޓް ބޭންކް އޮފް މޯލްޑިވްސްގެ ދޮރު އެންމެ ފަހުން ހުޅުވާ މަސައްކަތް ކުރެވުނު ދުވަސް، ރައީސް ޑރ. މުހައްމަދު މުއިއްޒުގެ އިކޮނޮމިކް މިނިސްޓަރު މުހައްމަދު ސައީދަށް ވިދާޅުވެނުދެއްވުނެވެ.
ހޯމަ ދުވަހުގެ ރައްޔިތުންގެ މަޖިލީހުގެ ޖަލްސާ އަށް އިކޮނޮމިކް މިނިސްޓަރު ސައީދު ހާޒިރުވެވަޑައިގެންފައިވާ އިރު ސުވާލު ކުރެއްވުމުގެ ވަގުތުގައި ހިތަދޫ ދެކުނު ދާއިރާގެ މެންބަރު އަދި އިދިކޮޅު މޯލްޑިވިއަން ޑިމޮކްރަޓިކް ޕާޓީ (އެމްޑީޕީ) ގެ ޕާލިމެންޓަރީ ގްރޫޕްގެ ލީޑަރު އިބްރާހިމް ނާޒިލް ވަނީ ޑިވެލޮޕްމަންޓް ބޭންކް ގެ ދޮރު އެންމެ ފަހުން ހުޅުވީ ކޮން އިރަކުތޯ މިނިސްޓަރާ ސުވާލު ކުރައްވާފަ އެވެ.
އެ ސުވާލަށް ޖަވާބު ނުދެއްވާ މިނިސްޓަރު ވަނީ އެއީ މުހިއްމު ބޭންކެއް ކަމަށް ވިދާޅުވެފަ އެވެ. އަދި ބޭންކުގެ އޮޕަރޭޝަނަށް ގެނައުމަށް ކުރަން ޖެހޭ މަސައްކަތް ކުރަމުންދާ ކަމަށް ވެސް މިނިސްޓަރު ވިދާޅުވި އެވެ.
ޑިވެލޮޕްމަންޓް ބޭންކަކީ މުހިއްމު ބޭންކެއް. އެ ބޭންކު އޮޕަރޭޝަނަލައިޒް ކުރުމަށްޓަކައި ކުރަން ޖެހޭ މަސައްކަތްތައް މިދަނީ ކުރަމުން. އަޅުގަނޑު ހަމަ އިއްޒަތްތެރި މެންބަރު މި ސުވާލު ކުރެއްވީމަ ހަމަ ހިތަށް އަރާ މިއީ ހަމަ މުޅިން އައު ކަންތަކުގެ ވާހަކަ މި ދައްކަނީރައީސް ޑރ. މުހައްމަދު މުއިއްޒުގެ އިކޮނޮމިކް މިނިސްޓަރު މުހައްމަދު ސައީދު
އެއަށްފަހު މިނިސްޓަރު ވަނީ ނިމުނު އެމްޑީޕީ ސަރުކާރުގެ ވާހަކަ ދައްކަވައި، ކުރީ ސަރުކާރަށް ވަރަށް ބޮޑަށް ފާޑުވިދާޅުވެފަ އެވެ. ނަމަވެސް މިނިސްޓަރު ގެ ވާހަކައިގައި މެންބަރު ކުރެއްވި ސުވާލަށް ޖަވާބުދެއްވާފައެއް ނުވެ އެވެ.
ޑިވެލޮޕްމަންޓް ބޭންކް އޮފް މޯލްޑިވްސް ލިމިޓެޑްގެ ފުރަތަމަ މާލީ ބަޔާންތަކުން ދައްކާގޮތުގައި، އެ ބޭންކަށް ފުރަތަމަ 6 މަސް ދުވަހުގެ ތެރޭގައި 2.2 މިލިއަން ރުފިޔާގެ ބޮޑު ގެއްލުމަކާ ކުރިމަތިލާން ވަނީ ޖެހިފަ އެވެ.
އޮޑިޓަރ ޖެނެރަލްގެ އޮފީހުން ނެރުނު އޮޑިޓް ރިޕޯޓުގައިވާ ގޮތުން، 21 ޖުލައި 2024 އިން 31 ޑިސެމްބަރު 2024 ގެ ނިޔަލަށް އެ ބޭންކަށް ޖުމްލަ 2،263،804 ރުފިޔާގެ ގެއްލުން ވެފައިވެ އެވެ. މި މުއްދަތުގެ ތެރޭގައި ބޭންކުގެ އެއްވެސް ވިޔަފާރި މުއާމަލާތެއް ހިންގާފައި ނުވާއިރު، އާމްދަނީގެ ގޮތުގައި އެއްވެސް ފައިސާއެއް ލިބިފައެއް ނުވެ އެވެ.
ބޭންކަށް ލިބުނު މި ބޮޑު ގެއްލުމުގެ މައިގަނޑު ސަބަބަކީ ބޭންކުގެ ހިންގުމުގެ ޚަރަދުތައް ބޮޑުވުމެވެ. އެގޮތުން މި މުއްދަތުގެ ތެރޭގައި ހިންގުމުގެ ޚަރަދުގެ ގޮތުގައި 3،018،405 ރުފިޔާ ހޭދަކޮށްފައިވެ އެވެ. މީގެ ތެރެއިން އެންމެ ބޮޑު ހޭދައެއް ކޮށްފައިވަނީ އިދާރީ އެކި ޚަރަދުތަކަށެވެ. އެގޮތުން އޮފީސް ކުއްޔަށް 1،130،597 ރުފިޔާ ހޭދަކޮށްފައިވާއިރު، މުވައްޒަފުންގެ މުސާރައާއި އިނާޔަތްތަކަށް 843،336 ރުފިޔާ ހޭދަކޮށްފައިވެ އެވެ. މީގެ އިތުރުން ބޭންކުގެ ޑިރެކްޓަރުންގެ ފީގެ ގޮތުގައި 311،300 ރުފިޔާ ހޭދަކޮށްފައިވާކަން ރިޕޯޓުން ހާމަވެ އެވެ.
