ތަކުރާރުކޮށް އެދުމުން ވެސް އޮޑިޓަރ ޖެނެރަލްގެ އޮފީހުން މާލޭ ސިޓީ ކައުންސިލް އޮޑިޓް ކޮށް ނުދީ ވަނިކޮށް އެ މައްސަލަ މަޖިލީހަށް
18 އެޕްރީލު 2026 | ހޮނިހިރު 15:03ސިޓީ ކައުންސިލުން ވަނީ އެ އިދާރާ އޮޑިޓްކޮށްދިނުމަށް އޮޑިޓަރ ޖެނެރަލްގެ އޮފީހުގައި އެދިފަ. މަޖިލީހަށް މައްސަލަ އެއް ހުށަހަޅާފައި މި ވަނީ އެކަމަށް އިޖާބަ ނުދީ ވަނިކޮށް.
މާލޭ ސިޓީ ކައުންސިލް އިދާރާ | މާލެ ސިޓީ ކައުންސިލް
ތަކުރާރުކޮށް އެދުމުން ވެސް އޮޑިޓަރ ޖެނެރަލްގެ އޮފީހުން މާލޭ ސިޓީ ކައުންސިލް އޮޑިޓް ކޮށް ނުދީ ވަނިކޮށް އެ މައްސަލަ މަޖިލީހަށް ހުށަހަޅައިފި އެވެ.
ރައްޔިތުންގެ މަޖިލީހުގެ ގަލޮޅު އުތުރު ދާއިރާގެ މެންބަރު މުހައްމަދު އިބްރާހިމް ކުޑޫ ރައްޔިތުންގެ މަޖިލީހުގެ ރައީސް އޮނަރަބަލް ޢަބްދުއްރަޙީމް ޢަބްދުﷲ އަށް ފޮނުއްވާފައިވާ ސިޓީ އެއްގައި ވަނީ މާލޭ ސިޓީ ކައުންސިލް އޮޑިޓް ނުކޮށް ގިނަ ދުވަސްތަކެއް ފާއިތުވަމުންދާ މައްސަލަ އެ މަޖިލީހުގެ ސަމާލުކަމަށް ގެނެސްފަ އެވެ.
ކުޑޫ ފޮނުއްވި ސިޓީގައި ވަނީ ދިވެހިރާއްޖޭގެ ވެރިރަށް މާލޭގެ ތަންތަނާއި، ބިންތަކާއި އަދި އާއްމު ވަސީލަތްތަކުގެ މާލީ ނަފާ ލިބެމުންދާ އިދާރާ ކަމުގައިވާ މާލޭ ސިޓީ ކައުންސިލް ފާއިތުވި ދިހަ ވަރަކަށް އަހަރުގެ ތެރޭގައި ދައުލަތުން އެއްވެސް އޮޑިޓެއް ކޮށްފައި ނެތްކަން ނުވަތަ ރިޕޯޓްތައް ހާމަކޮށްފައިނުވާކަން ވަނީ ފާހަގަކޮށްފަ އެވެ. އަދި، ދައުލަތުގެ އެންމެހައި އިދާރާތައް އޮޑިޓްކުރުމަށް، ޤާނޫނު ނަންބަރު 4/2007 (އޮޑިޓް ޤާނޫނު) އިން ލާޒިމުކޮށްފައިވާ ފަދައިން އެ އިދާރާ އޮޑިޓްކުރުމަށް، އޮޑިޓަރ ޖެނެރަލް މަސައްކަތް ނުކޮށް ވާކަމަށް ވަނީ ބުނެފަ އެވެ.
މިހެންކަމުން، މާލޭ ސިޓީ ކައުންސިލް މިހައިތަނަށް އޮޑިޓްކޮށްފައި ނުވަނީ ކީއްވެކަން ސާފުކޮށް، އަޅަންޖެހޭ ފިޔަވަޅުތައް އަވަހަށް އެޅުމަކީ ރައްޔިތުންގެ މަޖިލީހުގެ ޒިންމާއެއް ކަމަށް ކުޑޫ ވަނީ ފާހަގަކުރައްވާފަ އެވެ. ވީމާ، މާލޭ ސިޓީ ކައުންސިލް އޮޑިޓްކޮށްފައި ނުވަނީ ކީއްވެކަން ސާފުކުރުމަށާއި، އެކަން ނުކޮށް މިހައި ގިނަދުވަސް ވެގެންދިޔަ ސަބަބު ރައްޔިތުންގެ މަޖިލީހުން އިތުރަށް ދެނެގަތުމާއެކު، އަވަހަށް އޮޑިޓްކުރުމަށްފަހު ރިޕޯޓްތައް އާއްމުކުރުމަށް ބާރުއެޅުމުގެ ގޮތުން، މާލިއްޔަތު ކޮމިޓީގެ ބައްދަލުވުމެއް ވަރަށް އަވަހަށް އިންތިޒާމުކޮށްދެއްވުން ކުޑޫ ވަނީ އެދިވަޑައިގަންނަވާފަ އެވެ.
މީގެ އިތުރުން މި މައްސަލަ ކުރިއަށް ދާއިރު، ޤާނޫނުއަސާސީގެ 99 މާއްދާއިން ރައްޔިތުންގެ މަޖިލީހަށް ލިބިދޭ ބާރުގެ ދަށުން، މާލޭ ސިޓީ ކައުންސިލް އަދި އޮޑިޓަރ ޖެނެރަލް އެ ކޮމިޓީއަށް ހާޒިރުކޮށްދެއްވުމަށް އެދިވަޑައިގަންނަވާފައިވެ އެވެ.
ސިޓީ ކައުންސިލުން ވަނީ އެ އިދާރާ އޮޑިޓްކޮށްދިނުމަށް އޮޑިޓަރ ޖެނެރަލްގެ އޮފީހުގައި އެދިފަ އެވެ. މަޖިލީހަށް މައްސަލަ އެއް ހުށަހަޅާފައި މި ވަނީ އެކަމަށް އިޖާބަ ނުދީ ވަނިކޮށެވެ.
