ކެބިނެޓް ބަދަލުކުރީ ރަށްރަށުގައި ބިންގާ އެޅި ގޮތަށް، ބަދަލުކޮށްލީ ބޭރު ފޮތިގަނޑު އެކަނި: ޒިޔާދު

ސަރުކާރުގެ ކެބިނެޓަށް ދާދިފަހުން ގެނައި ބަދަލުތަކަކީ އެއްވެސް އިޚުލާސްތެރި ނިޔަތެއް އޮވެގެން ގެނައި ބަދަލުތަކެއް ނޫން ކަމަށާއި، އެއީ ރަށްރަށުގައި މަޝްރޫއުތަކުގެ ބިންގާ އަޅާއިރު ބޭރުން އޮޅާލާފައި އޮންނަ ފޮތިގަނޑު ބަދަލުކޮށްލުން ކަހަލަ ކަމެއްގެ ގޮތުގައި ރައްޔިތުންގެ މަޖިލީހުގެ ވައިކަރަދޫ ދާއިރާގެ މެންބަރު ހުސައިން ޒިޔާދު ސިފަކުރައްވައިފި އެވެ.

ޒިޔާދު މިހެން ވިދާޅުވީ ރާއްޖެޓީވީގެ ފަލަސުރުހީ ޕްރޮގްރާމުގައި ވާހަކަދައްކަވަމުންނެވެ.

ޒިޔާދު ވިދާޅުވީ ކެބިނެޓަށް ބަދަލު ގެނައި ނަމަވެސް ސަރުކާރުގެ ސިޔާސަތުތަކަށް އެއްވެސް ބަދަލެއް ނާންނަ ކަމަށެވެ. ރަށްރަށުގައި ބިންގާ އަޅާއިރު ކަންކަން ކުރާ އުސޫލުން، ހަމައެކަނި ބޭރު ފޮތިގަނޑު ބަދަލުކޮށްލުމުން ދުރަށް ފެންނައިރު ރީތިވެދާނެ ކަމަށާއި، ނަމަވެސް އެތެރޭގެ ހާލަތު އޮތީ ހަމަ އޮތް ގޮތަށް ކަމަށް އޭނާ ވިދާޅުވި އެވެ. އަދި މި ބަދަލަށް ފަހު މާދަމާ ފެންނަ ނުފެންނަ ވޯޓެއް ނެގި ނަމަވެސް، ސަރުކާރާ ދެކޮޅަށް ވޯޓުދޭ މީހުންގެ ނިސްބަތް 80 އިންސައްތައަށް އަރާނެ ކަމަށް ޒިޔާދު ތުހުމަތު ކުރެއްވި އެވެ.

ނިމިދިޔަ ލޯކަލް ކައުންސިލްތަކުގެ ބައި-އިލެކްޝަންތަކުގެ ނަތީޖާއަށް އަލިއަޅުވާލައްވަމުން ޒިޔާދު ވިދާޅުވީ، ކައުންސިލް އިންތިޚާބަކީ އާންމުކޮށް އާއިލީ އަދި ރައްޓެހިކަމުގެ ގުޅުންތަކަށް ބުރަވާ އިންތިޚާބަކަށް ވީނަމަވެސް، މިފަހަރުގެ ނަތީޖާއިން ފެނުނީ ރައްޔިތުން ސަރުކާރަށް "ނޫނެކޭ" ބުނި މަންޒަރު ކަމަށެވެ. އިދިކޮޅު ފަރާތްތަކުން އިންތިޚާބާ ކުރިމަތިލީ 60 ގޮނޑީގެ ފަހަތުގައި ތިބެގެން ކަމަށާއި، ނަމަވެސް ފަހަތުން އަރައި ރަނގަޅު ނަތީޖާއެއް ހޯދާފައިވާކަން އޭނާ ފާހަގަކުރެއްވި އެވެ.

މި ޒަމާނުގައި ނުޖެހޭ ކަޑައެއް ޖަހާކަށް ކުރިން ޖަހާހެން. މިހާރު ކޮންނަނީ ބޮޑެތި ވަޅުވަޅު. ބޮޑެތި ބިންގާ އަޅައިގެން. އެހެން ބައެއް ރަށްރަށުގައި އެބަހުރި ތިން ބިންގާ، ހަތަރު ބިންގާ އެއް މިނިސްޓަރަކު ވަޑައިގެން އަޅާފައި. މި ތަންތަން ރައްޔިތުންނަށް ފެނޭ ހަމަ ރައްޔިތުންނަށް ވާނުވާ ރަނގަޅަށް އެނގިގެން ނޫނެކޭ އެ ބުނީ. މުޅި ޖުމުލަކޮށް ޤާނޫނުއަސާސީއަށް ގެނައި ބަދަލަށް، އަތޮޅު ކައުންސިލު އުވާލުމަށް، ރައްޔިތުންނަކަށް ނުދެވޭ ޖާގައެއް ނޫނެކޭ ބުނާކަށް. ރައްޔިތުންގެ މެންބަރެއް މަޖިލީހަކު ނެތް. އެހެންވީމާ، މަޖިލީހުގެ މެންބަރުން މެދުވެރިކޮށް ރައްޔިތުންނަކަށް އެ މެސެޖެއް ނުދެވުނު. ޤާނޫނުއަސާސީއަށް ގެނައި ބަދަލަށް ލާމަރުކަޒީ ގާނޫނަށް ގެނައި ބަދަލުތައް ރައްޔިތުން ދެކޮޅު، އެކަމަކުވެސް ބުނާނެ ފުރުޞަތެއް ނުލިބުނު. މިހެން ރައްޔިތުން ތިއްބާ ފަސްވަނަ އަހަރު އަންނާނީ ތިމަންނަމެންގެ ނަން އޮންނަ ނަކަރުދާސްކޮޅެކޭ ބުނީމާ، އޭގެ ޖަހަން އޮތް ނޫނެކޭ ދެ އަހަރު ބައި ކުރިން މި އައީ. 

ރައްޔިތުންގެ މަޖިލީހުގެ ވައިކަރަދޫ ދާއިރާގެ މެންބަރު ހުސައިން ޒިޔާދު

ރައީސުލްޖުމްހޫރިއްޔާގެ މަސައްކަތްޕުޅުތަކަށް ފާޑުވިދާޅުވަމުން ޒިޔާދު ވިދާޅުވީ، ރައީސަކީ އެއްވެސް ވަރަކަށް މަޝްވަރާކޮށްގެން ކަންކަން ކުރައްވާ ބޭފުޅެއް ނޫން ކަމަށެވެ. އަދި މަޖިލީހުގެ ބާރުތައް ކަނޑުވާލައި، ގާނޫނުތަކުގެ ތެރެއިން މަޖިލިސް އަޅުވެތިކުރަން މަސައްކަތް ކުރަނީ މަޝްވަރާގެ ފުރުސަތު ބަންދުކުރުމަށް ކަމަށްވެސް އޭނާ ވިދާޅުވި އެވެ. މީގެ އިތުރުން، އިންތިޚާބާ ދިމާކޮށް ވަޒީފާ ނުދޭނެ ކަމަށް ވިދާޅުވި ނަމަވެސް، އަމަލީ ގޮތުން ފެންނަނީ ތަފާތު މަންޒަރެއް ކަމަށް ޒިޔާދު ވިދާޅުވި އެވެ.

ސަރުކާރުގެ ކުންފުނިތަކުގެ ހާލަތާ ގުޅޭގޮތުން ވާހަކަދައްކަވަމުން ޒިޔާދު ވިދާޅުވީ، އެމްއޭސީއެލް ފަދަ ކުންފުނިތަކުގެ މުވައްޒަފުން ކުރާ ބުރަ މަސައްކަތާ އަޅާބަލާއިރު، އެއްވެސް މަސައްކަތެއް ނުކޮށް ސިޔާސީ ގޮތުން ނަގާފައި ތިބޭ މީހުންނަށް ބޮޑެތި މުސާރަދޭ މައްސަލާގައި މުވައްޒަފުންގެ ނުރުހުން އޮތް ކަމަށެވެ. ފަތިހު ހަތަރެއް ޖަހާއިރު ވަޒީފާއަށް ނުކުމެ ބުރަ މަސައްކަތްކުރާ މުވައްޒަފަށް ލިބޭ އާމްދަނީއަށްވުރެ، އޮފީހަށް ނުގޮސް ތިބޭ މީހުންނަށް ލިބޭ މުސާރަ ބޮޑުވުމަކީ ރައްޔިތުން ސަރުކާރަށް ނޫނެކޭ ބުނާ ސަބަބެއް ކަމަށް އޭނާ ފާހަގަކުރެއްވި އެވެ.

ޒިޔާދު އިތުރަށް ވިދާޅުވީ ގާނޫނުއަސާސީއަށާއި ލާމަރުކަޒީ ގާނޫނަށް ގެނައި ބަދަލުތަކާ މެދު ރައްޔިތުންގެ މެސެޖު ސަރުކާރަށް ދިނުމުގެ ފުރުސަތު މަޖިލިސް މެދުވެރިކޮށް ގެއްލިފައިވާ ކަމަށެވެ. އެހެންކަމުން، ރައްޔިތުން ތިބީ އިންތިޚާބެއްގައި ސަރުކާރަށް ޖަވާބުދޭން ކެތްމަދުވެފައި ކަމަށާއި، މިހާރު ފެންނަ ނަތީޖާތަކަކީ ދެ އަހަރު ބައި ކުރިން ރައްޔިތުން ސަރުކާރަށް ދޭން އޮތް "ނޫނެކޭ" ގެ މެސެޖު ކަމަށް ޒިޔާދު ވިދާޅުވި އެވެ.