މި ސަރުކާރުން ކިތަންމެ ވަރަކަށް ޑިފެންސަށް ކުޅުއްވިޔަސް، ރައްޔިތުންގެ އިތުބާރެއް ދެން ނުލިބޭނެ: ތަޒްމީލް
ސަރުކާރުގެ ކެބިނެޓަށް ގެނައި ބަދަލުތަކާއި އިސްލާހީ ފިޔަވަޅުތަކުގެ ސަބަބުން ރައްޔިތުންގެ އިތުބާރު އިތުރަށް ގެއްލިފައިވާ ކަމަށް އެމްޓީޑީސީގެ ކުރީގެ އެމްޑީ ތަޒްމީލް އަބްދުއްސަމަދު ވިދާޅުވެއްޖެ. އެންމެ ފަހުން ބޭއްވި ބައި-އިލެކްޝަންތަކުގެ ނަތީޖާއިން ސަރުކާރަށް އޮތް ތާއީދު ކުޑަކަން ހާމަވެފައިވާތީ، ރައީސް މުއިއްޒު މަގާމުން އެއްފަރާތްވުމަށް އޭނާ ވަނީ ގޮވާލައްވާފަ. ސަރުކާރުން ދޮގު ހަދަމުންދާ ކަމަށް ތުހުމަތުކުރައްވައި، ރައްޔިތުން މިހާރު ތިބީ ވޯޓުން ސަރުކާރަށް ނޫނެކޭ ބުނަން ތައްޔާރަށް ކަމަށްވެސް އޭނާ ފާހަގަކުރެއްވި.
އެމްޓީޑީސީ ގެ ކުރީގެ އެމްޑީ ތަޒްމީލް އަބްދުއްސަމަދު ރާއްޖެޓީވީ ގެ ފަލަސުރުހީ ޕްރޮގްރާމްގައި ވާހަކަ ދައްކަވަނީ | ރާއްޖެ އެމްވީ
ރައީސް މުއިއްޒުގެ ސަރުކާރާ ދޭތެރޭގައި ރައްޔިތުން މާޔޫސްވެފައިވާ މާޔޫސްކަމަކީ ބަދަލުވާނެ ކަމެއް ނޫންކަމަށް އެމްޓީޑީސީގެ ކުރީގެ މެނޭޖިން ޑިރެކްޓަރު ތަޒްމީލް އަބްދުއްސަމަދު ވިދާޅުވެއްޖެ އެވެ.
ސަރުކާރުން ކިތަންމެ ވަރަކަށް ޑިފެންސަށް ކުޅެން މަސައްކަތް ކުރިކަމުގައި ވީނަމަވެސް ރައްޔިތުންގެ އިތުބާރު އަލުން ހޯދުމަކީ ހިސާބުކިތާބުން ބަލާއިރު ފެންނަން ނެތް ކަމެއްކަމަށް އޭނާ ވިދާޅުވި އެވެ.
ރާއްޖެ ޓީވީގެ ފަލަސުރުހީ ޕްރޮގްރާމްގައި ވާހަކަދައްކަވަމުން ތަޒްމީލް ވިދާޅުވީ ރައީސް މުއިއްޒުގެ ސަރުކާރުގައި ތިއްބެވި ހިކުމަތްތެރި ވަޒީރުން މިއަދު އަމިއްލައަށް މަގާމުން ވަކިވުމަށް މަޖުބޫރުކުރައްވައި، ބައެއް ބޭފުޅުން އިސްތިއުފާދެއްވައި، އިސްތިއުފާ ނުދެއްވި ބޭފުޅުން މަގާމުން ވަކިކުރައްވަމުން ދާކަމަށެވެ. މިއަދު އެކުޅުއްވި ޑްރާމާގެ ނަތީޖާ އަކީ ރައްޔިތުންގެ އިތުބާރު މި ސަރުކާރަށް އިތުރަށް ގެއްލުންކަމަށް އޭނާ ވިދާޅުވި އެވެ.
ރާއްޖޭގެ އިއްޒަތްތެރި ރައީސުލްޖުމްހޫރިއްޔާ އެ މަނިކުފާނުގެ ކެބިނެޓުގެ އެންމެ މުހިންމު ވަޒީރުން އެއް ފަހަރާ އިސްތިޢުފާދެއްވައި، ވުޒާރާތަކުގެ ނަންތައް ބަދަލުކުރައްވައި، އަދި ސަރުކާރުގެ އޮނިގަނޑަށް ތިމަންމަނިކުފާނު އިޞްލާޙީ ބަދަލު ގެންނަވާނެ ކަމަށް ވިދާޅުވެ އިޢުލާންކުރައްވައި، ރައްޔިތުންނަށް އެ އުއްމީދު ދެއްވައި، މި ކުރެއްވި ކަންތަކާ ދޭތެރޭގައި އަޅުގަނޑުމެން ވިސްނާލާ އިރު، މި ސަރުކާރު ކިތަންމެ ވަރަކަށް ޑިފެންސަށް ކުޅެން މަސައްކަތްކުރިކަމުގައި ވީނަމަވެސް، ރައްޔިތުން މިއަދު މި ސަރުކާރާ ދޭތެރޭގައި މާޔޫސްވެފައިވާ މާޔޫސްވުމަކީ، އަލުން އަނބުރާ ކިތަންމެ ވަރަކަށް ޑިފެންސަށް ކުޅުނުކަމުގައި ވީނަމަވެސް، ދެން އެނބުރި ތެދުވެ ތަފާތުތަކެއް ގެނެވިދާނެކަން އަޅުގަނޑުމެންނަށް އެއްވެސް ހިސާބު ކިތާބަކުން ބަލައިލީމަ ފެންނަން ނެތް ނެއްކަމެއް ކަމުގައި މި އޮތީ ވަރަށް ސާފުކޮށް ފެންނަން.އެމްޓީޑީސީގެ ކުރީގެ މެނޭޖިން ޑިރެކްޓަރު ތަޒްމީލް އަބްދުއްސަމަދު
ދިވެހިރާއްޖޭގެ ރައްޔިތުން ދައުރުގެ މެދުތެރެއިން ވަރަށް ބޮޑަށް ސަރުކާރާ ދޭތެރޭގައި މާޔޫސް ވެފައިވާ މަންޒަރު ފެނުނީ މިފަހަރު ލޯކަލް ކައުންސިލް އިންތިޚާބުން ކަމަށް ތަޒްމީލް ވިދާޅުވި އެވެ. ދިވެހި ރައްޔިތުން ދެ އަހަރާއި ބައިވަންދެން ކެތް ކުރި ކަމަށާއި، ރައްޔިތުންނަށް ފެނުނީ ރައީސުލްޖުމްހޫރިއްޔާ ރެޔާ ދުވާލު ދިވެހިރާއްޖޭގެ ނޫސްވެރިން ރައީސް އޮފީހުގައި ތަކުރާރުކޮށް ސުވާލު ކުރެއްވުމުން ވެސް ޖެހިލުމެއް ނެތި ދޮގުހެއްދެވި މަންޒަރުކަމަށް ތަޒްމީލް ވިދާޅުވި އެވެ. އަދި ދިވެހި ރައްޔިތުންގެ ޓެކްސް ފައިސާއިން ރައީސް މުއިއްޒުގެ ޕާޓީ އަދި ރައީސް މުއިއްޒުގެ ސިޔާސީ ޖާހަތާއި މަންޒަރު ބޮޑުކުރަން ކުރެއްވި މަސައްކަތުގެ ނަތީޖާ އަކީ، ރައްޔިތުން މި ސަރުކާރަށް ބޮޑުތަނުން ނޫނެކޭ ބުނުން ކަމަށް ތަޒްމީލް ވިދާޅުވި އެވެ.
ދިވެހި ރައްޔިތުންނަކީ ވަރަށް ކިޔަމަންތެރި ބައެއްކަމަށާއި ރައްޔިތުންނާ ހިސާބަށް ވޯޓު ކަރުދާސް އަންނަންދެން ރައްޔިތުން ތިބީ މަޑުކޮށްގެންކަމަށް އޭނާ ވިދާޅުވި އެވެ. ނަތީޖާގައި ދިވެހި ރައްޔިތުން ބުނީ ރައީސް މުއިއްޒު ކިޔާ ބޭފުޅަކު ދިވެހިރާއްޖޭގެ ވަލިއްޔުލްއަމުރުކަމުގެ މަގާމުގައި ހުންނާކަށް ދެން ބޭނުމެއް ނޫންކަމަށް ތަޒްމީލް ވިދާޅުވި އެވެ. އެހެން ކަމުން ދިވެހި ރައްޔިތުންނާއި ޤައުމު ހަވާލުކޮށްލުމަށް ފަހު ރައީސް މަޑުމަޑުން އެއްފަރާތް ވެލުމަށް ތަޒްމީލް ގޮވާލެއްވި އެވެ.
