ރާއްޖޭގެ ރައްޔިތުން ގޭހަށް ބޭހަށް ޖެހެމުންދާއިރު، ރައީސް މުއިއްޒުއާ ވެރިކަން ހަވާލު ކޮށްގެން ތިބެވެން ނެތް: ޝިފާޒު
ރައީސް މުއިއްޒަށް އޮތް ތާއީދު ކުޑަވެފައިވާ ކަމަށް ވިދާޅުވެ، ރައްޔިތުންގެ މަޖިލީހުން އެމަނިކުފާނު އަޒުލުކޮށް ވެރިކަމުގެ ބާރުތައް ނައިބު ރައީސްއާ ހަވާލުކުރުމަށް ޝިފާޒު ވަނީ ގޮވާލައްވާފައި. ގައުމުގެ އިގްތިސާދީ ހާލަތު ގޯސްވެ، އާސަންދަ އާއި އަސާސީ ޚިދުމަތްތައް ހޯދުމަށް ރައްޔިތުންނަށް ދަތިތަކާ ކުރިމަތިވަމުންދާކަން އޭނާ ފާހަގަކުރެއްވި. މީގެ އިތުރުން، ސުލްހަވެރި ސިޔާސީ ހަރަކާތްތަކަށް ހުރަސްނޭޅުމަށް ފުލުހުންނަށް ގޮވާލައި، ގާނޫނުއަސާސީން ލިބިދޭ އެއްވެ އުޅުމުގެ މިނިވަންކަމުގެ ބޭނުން ހިފުމަށް ޝިފާޒު ބާރުއެޅުއްވި.
ނޫސްވެރިންގެ ބައްދަލުވުމެއްގައި އެމްޑީޕީގެ ކުރީގެ ނައިބު ރައީސް މުޙައްމަދު ޝިފާޒު ވާހަކަ ދައްކަވަނީ. | ދެން އެމްވީ
ދިވެހިރާއްޖޭގެ ރައްޔިތުން ގޭހަށް ބޭހަށް ޖެހެމުންދާ ކަމަށާއި، ރައީސް ޑރ.މު ހައްމަދު މުއިއްޒުއާ ވެރިކަން ހަވާލު ކޮށްގެން ތިބެވެން ނެތް ކަމަށް އެމްޑީޕީގެ ކުރީގެ ނައިބު ރައީސް މުހައްމަދު ޝިފާޒު ވިދާޅުވެއްޖެ އެވެ.
އަންގާރަ ދުވަހުގެ ރޭ އެމްޑީޕީން ކުރިއަށް ގެންދިޔަ މުޒާހަރާގައި ރައީސް މުއިއްޒުގެ އިސްތިއުފާއަށް ގޮވާލައްވައި ޝިފާޒު ވިދާޅުވީ، އޭޕްރީލް މަހުގެ 4 ވަނަ ދުވަހު ނެގި ރައްޔިތުންގެ ހިޔާލު ހޯދުމުގެ ވޯޓު 2026 އެއީ އެމަނިކުފާނަށް ރައްޔިތުންގެ ތާއީދު އޮތް މިންވަރު ބެލުމަށްޓަކައި ކުރިއަށް ގެންދިޔަ ވޯޓެއް ކަމަށެވެ.
މި އިންތިޚާބުގައި ރައީސް މުއިއްޒަށް ލިބިވަޑައިގެންނެވީ އެންމެ 29 ޕަސެންޓު ކަމަށާއި، ރައްޔިތުންގެ ތައީދު އެމަނިކުފާނަށް ނެތް ކަމަށް އޭނާ ވިދާޅުވި އެވެ. އަދި ވިދާޅުވީ ރައްޔިތުންގެ ތާއީދު ނެތުމުން ރައްޔިތުންގެ މަޖިލީހުން ރައީސް މުއިއްޒު ވެރިކަމުން ދުރުކޮށް، ހުރިހާ ބާރެއް ނައިބު ރައީސްއާ ހަވާލު ކުރަން ޖެހޭ ކަމަށެވެ. އެއީ ރައްޔިތުން އެދޭ ގޮތް ކަމަށް އޭނާ ވިދާޅުވި އެވެ.
ގައުމުގެ ހާލަތަށް އިޝާރާތް ކުރައްވައި ޝިފާޒު ވިދާޅުވީ، އާސަންދަ، އެންސްޕާގެ ޚިދުމަތް ނުލިބި ރައްޔިތުން ބޭސްފަރުވާ އަށް ޖެހިފައިވާ ކަމަށެވެ. އަދި ތެލާއި، ގޭހަށް ޖެހި ކެއްކޭނެ ގޮތެއް ނެތެމުންދާ ކަމަށާއި، ރައްޔިތުން ބިކަވަމުންދާ ކަމަށް އޭނާ ވިދާޅުވި އެވެ. އަދި ވިދާޅުވީ މިހާލަތަށް ގައުމުދާއިރު، ރައީސް މުއިއްޒު ވެރިކަމުގައި ނުބެހެއްޓޭނެ ކަމަށެވެ.
ސާފުކޮށް އެނގެން އޮތް ހަގީގަތަކީ ރާއްޖޭގައި އެބައޮތް ރައްޔިތުންގެ މަޖިލީހެއް. އެމަޖިލީހުގައި އެބަހުރި ރައްޔިތުންގެ މަޖިލީހުގެ ރައީސްއެއް. މަޖިލީހުގެ ޖަލްސާއެއް ބާއްވަވައި ވެރިމީހާ އިންޕީޗު ކުރައްވައި ނައިބު ރައީސްއާ ދައުލަތުގެ ބާރުތައް ހަވާލު ކުރައްވައި. ގާނޫނޫގެ ދުސްތޫރުން ތަން ދޭ އުސޫލުން މިކަން ކުރާ ކަމަށްވަނީ ނަމަ ނައިބު ރައީސްއާ ބާރުތައް ހަވާލު ކުރައްވައި އެބޭފުޅާ ދުރަށް ޖެހިވަޑައިގަންނަވާ. މިރާއްޖޭގައި ސިޔާސީ މަސައްކަތް ކުރައްވަމުން ގެންދެވި އެތައް ބޭފުޅުންނެއް މިރާއްޖެއާ ދޭތެރޭގައި ބަސް ވިދާޅުވޭ. ތިބޭފުޅުންނަކީ އަޅުގަނޑުމެން، މިތިއްބެވީ ރާއްޖޭގެ ރައްޔިތުން. މި ރައްޔިތުންގެ ޓެކްސް ފައިސާއިން މުސާރަ ދޭ ބޭފުޅުން. ތިބޭފުޅުންގެ ޔުނީފޯމް. ތިބޭފުޅުންގެ އާއިލީ ހަރަދު، ބޯހިޔާވަހިކަން ، ތިބޭފުޅުންގެ ބޭސްފަރުވާ، އަދި ކިޔުންބުއިމުގެ ހުރިހާ ހަރަދެއް އަޅުގަނޑުމެން ބަލަހައްޓަނީ. އަޅުގަނޑުމެން ބަލަހައްޓަނީ. އެހެންވީމަ އަޅުގަނޑުމެން ހިންގާ ސިޔާސީ ސުލްހަވެރި ހަރަކާތަކަށް ހުރަސް އެޅުމުގެ އެއްވެސް ޖާގައެއް ތިބޭފުޅުންނަށް ނޯންނާނެ. ވަރަށް ސާފުކޮށް މިދަންނަވަނީ އެ ހައްގެއް ތިބޭފުޅުންނަށް ނޯންނާނެ.އެމްޑީޕީގެ ކުރީގެ ނައިބު ރައީސް މުހައްމަދު ޝިފާޒު
މީގެ އިތުރުން ޝިފާޒު ވަނީ ފެހި ގާނޫނު އަސާސީން ރައްޔިތުން ގިނަ ހައްގުތަކެއް ކަަވަރުކޮށްފައިވާކަން ފާހަގަކުރައްވައި، އެ ހައްގުތަކުގެ ބޭނުން ހިފުމަށް ގޮވާލައްވާފަ އެވެ.
ޝިފާޒު ވިދާޅުވީ ސުލްހަވެރި ސިޔާސީ ހަރަކާތް ހިންގުމާއި، ހިޔާލު ފާޅު ކުރުމާއި، އެއްވެ އުޅުމުގެ މިނިވަންކަން ގާނޫނުން ރައްޔިތުންނަށް ކަށަވަރުކޮށްދީފައިވާ ކަމަށާއި، މި ހަރަކާތްތަކަށް އެއްވެސް ބަޔަކަށް ހުރަސްނޭޅޭނެ ކަމަށެވެ. އަދި ވިދާޅުވީ ސުލްހަވެރި ސިޔާސީ ހަރަކާތް ހިންގުމުގެ ފުރުސަތު ފުލުހުންގެ ޚިދުމަތުން ރައްޔިތުންނަށް ދޭން ޖެހޭ ކަމަށެވެ.
