މެދުއިރުމަތީގެ ހަމަނުޖެހުންތަކާއި ގުޅިގެން ރައީސް މުއިއްޒު އުފެއްދެވި ކޮމެޓީއަށް ބަދަލުތަކެއް
މެދުއިރުމަތީގެ މަސްރަހަށް އަންނަ ބަދަލުތަކާ ގުޅިގެން ރާއްޖެއަށް ކުރިމަތިވެދާނެ ގޮންޖެހުންތަކުން ސަލާމަތްވުމަށް އުފައްދާފައިވާ ވަޒީރުންގެ ކޮމިޓީގެ މެންބަރުންގެ އަދަދު ފަހަކަށް މަދުކޮށް، އެ ކޮމިޓީގެ މުގައްރިރަކަށް މާލީ ވަޒީރު މޫސާ ޒަމީރު ހަމަޖައްސަވައިފި.
މެދުއިރުމަތީގެ ހަމަނުޖެހުންތަކާ ގުޅިގެން، ރައީސުލްޖުމްހޫރިއްޔާ އުފެއްދެވި ވަޒީރުންގެ ޚާއްޞަ ކޮމެޓީއަށް ބަދަލުގެންނަވައިފި | ރައީސް އޮފީސް
މެދުއިރުމަތީގައި އީރާނާއި އިސްރާއިލާއި އެމެރިކާއާ ދެމެދު ހިނގަމުންދާ ހަމަނުޖެހުންތަކާއި ހަނގުރާމައިގެ ސަބަބުން ރާއްޖެއަށް ކުރިމަތިވެދާނެ ދަތިތަކުން ސަލާމަތްވުމަށްޓަކައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އުފައްދަވާފައިވާ ވަޒީރުންގެ ކޮމިޓީގެ މެންބަރުންގެ އަދަދު މަދުކުރައްވައި، އެ ކޮމިޓީއަށް ބޮޑެތި ބަދަލުތަކެއް ގެންނަވައިފި އެވެ.
މި ބަދަލާއެކު ކުރިން ނުވަ ވަޒީރުން ތިއްބެވި މި ކޮމިޓީގެ މެންބަރުންގެ އަދަދު މިހާރު ވަނީ ފަހަކަށް މަދުކުރައްވާފަ އެވެ.
މި ކޮމިޓީ އެކުލަވައިލުމަށް ބަދަލު ގެނެސްފައިވަނީ، ވަޒީރުންގެ މަޖިލީހަށް ގެނައި ބަދަލުތަކާ ގުޅިގެން 2026 އެޕްރީލް 15 ވީ ބުދަ ދުވަހު ބޭއްވި ވަޒީރުންގެ މަޖިލީހުގެ ޖަލްސާގަ އެވެ.
އަލަށް އެކުލަވައިލި މި ކޮމިޓީގެ މުގައްރިރަކަށް ހަމަޖައްސަވާފައިވަނީ މާލީ ކަންކަމާއި ސަރުކާރު ކުންފުނިތަކާ ބެހޭ ވަޒީރު މޫސާ ޒަމީރު އެވެ. މީގެ އިތުރުން ކޮމިޓީގައި ދެން ހިމެނިވަޑައިގަންނަވަނީ ޚާރިޖީ ވަޒީރު އިރުތިޝާމް އާދަމް އާއި، އިޤްތިޞާދީ ތަރައްޤީއާއި ދަތުރުފަތުރާއި ވިޔަފާރިއާއި ބެހޭ ވަޒީރު މުޙައްމަދު ސަޢީދު އެވެ.
މި ކޮމިޓީގައި ދެން ހިމެނިވަޑައިގަންނަވާ މެންބަރުންނަކީ މަސްވެރިކަމާއި ދަނޑުވެރިކަމާއި ކަނޑުގެ ވަސީލަތްތަކާ ބެހޭ ވަޒީރު އަޙްމަދު ޝިޔާމްގެ އިތުރުން ފަތުރުވެރިކަމާއި މަދަނީ އުދުހުންތަކާ ބެހޭ ވަޒީރު މުޙައްމަދު އަމީން އެވެ.
މި ބަދަލާއެކު، މީގެ ކުރިން ކޮމިޓީގައި ހިމެނިވަޑައިގެންނެވި ބައެއް ވަޒީރުން ވަނީ ކޮމިޓީން އުނިކުރައްވާފަ އެވެ.
ކޮމިޓީން އުނިކުރެއްވި ވަޒީރުންގެ ތެރޭގައި ޑިފެންސް މިނިސްޓަރާއި، އިސްލާމިކް މިނިސްޓަރާއި، އެޑިއުކޭޝަން މިނިސްޓަރުގެ އިތުރުން ހޯމް މިނިސްޓަރު ހިމެނިވަޑައިގަންނަވަ އެވެ.
