ވަކިކުރި 10 ވަޒީރުން ނުހިމަނާ، އައު ހަތަރު ބޭފުޅުންނާއެކު ރައީސް މުއިއްޒުގެ އާ ކެބިނެޓް ހުވާކުރައްވައިފި
ސަރުކާރުގެ ހިންގުން ހަރުދަނާކޮށް ރައްޔިތުންގެ ވިންދާ އެއްގޮތަށް ޚިދުމަތް ދިނުމަށްޓަކައި، ކެބިނެޓުގެ ދެބައިކުޅަ އެއްބައި ވަޒީރުން އިސްތިއުފާ ދެއްވުމާ ގުޅިގެން ރައީސުލްޖުމްހޫރިއްޔާ ވަނީ ވަޒީރުންގެ މަޖިލީހަށް ބޮޑެތި ބަދަލުތަކެއް ގެންނަވައިފި. މި ބަދަލުތަކުގެ ދަށުން 4 އާ ބޭފުޅަކު ކެބިނެޓަށް އައްޔަނުކުރައްވައި، ބައެއް ވަޒީރުންގެ ވުޒާރާތައް ބަދަލުކުރައްވާފައިވާއިރު، މިއީ އިންތިޚާބުތަކުގައި ލިބުނު ނަތީޖާއަށް ބައްލަވައި ސަރުކާރުގެ މަސައްކަތްތައް ހަލުވިކުރުމަށް ނިންމެވި ނިންމެވުމެއް ކަމަށް ސަރުކާރުން ބުނޭ.
ރައީސް މުއިއްޒުގެ އާ ކެބިނެޓް ހުވާ ކުރެއްވުމަށް ރައީސް އޮފީހުގަ ބޭއްވި ރަސްމިއްޔާތުގެ ތެރެއިން | ރާއްޖެ އެމްވީ
ކައުންސިލް އިންތިހާބާއި ފެންނަ ނުފެންނަ ވޯޓުގައި ސަރުކާރަށް ލިބުނު ނާކާމިޔާބީއާ ގުޅިގެން، ސަރުކާރުގެ ހިންގުމަށް ބޮޑެތި ބަދަލުތަކެއް ގެންނެވުމުގެ ގޮތުން ރައީސުލްޖުމްހޫރިއްޔާ ޑރ. މުހައްމަދު މުއިއްޒު އެކުލަވައިލެއްވި އާ ކެބިނެޓް އަންގާރަ ދުވަހުގެރޭ ހުވާކުރައްވައިފި އެވެ.
ރައީސުލްޖުމްހޫރިއްޔާގެ އޮފީހުގައި ކުއްލި ގޮތަކަށް ބޭއްވި މި ރަސްމިއްޔާތުގައި، ވަޒީރުންނަށް ހުވާލައިދެއްވީ ދިވެހިރާއްޖޭގެ އުއްތަމަ ފަނޑިޔާރު އަލްއުސްތާޛު ޢަބްދުލްޣަނީ މުޙައްމަދު އެވެ. މި ރަސްމިއްޔާތުގައި ވަޒީރުންނަށް މަގާމުގެ ފަތްކޮޅު ހަވާލުކޮށްދެއްވީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒެވެ.
އާ ކެބިނެޓް އެކުލަވައިލެއްވިއިރު، ކުރިން ވަޒީރުކަމުގައި ތިއްބެވި ބައެއް ބޭފުޅުން ވަނީ އެހެން ވުޒާރާތަކަށް ބަދަލުކުރައްވާފަ އެވެ. އަދި މުޅިން އަލަށް ހަތަރު ބޭފުޅަކު ވަނީ ކެބިނެޓަށް އައްޔަނުކުރައްވާފަ އެވެ. އެ ބޭފުޅުންނަކީ ހީނާ ވަލީދު، ގީލާ އަލީ، އިރުތިޝާމް އާދަމް އަދި އަލީ ޝަރީފް އެވެ. މީގެ އިތުރުން، އެޓާނީ ޖެނެރަލް އަހުމަދު އުޝާމް އާއި ފިޝަރީޒް މިނިސްޓަރު އަހުމަދު ޝިޔާމް ވަނީ އާ ކެބިނެޓުގައި ވެސް ހިމަނުއްވާފަ އެވެ. ނަމަވެސް، މިހާތަނަށް ހުސްކޮށް އޮތް ޑިފެންސް މިނިސްޓަރުކަމުގެ މަގާމަށް މި ރަސްމިއްޔާތުގައި ބޭފުޅަކު އައްޔަނުކުރައްވާފައެއް ނުވެ އެވެ.
އަލަށް އެކުލަވައިލި ކެބިނެޓުގައި ހިމެނިވަޑައިގަންނަވާ ވަޒީރުންނާއި އެ ބޭފުޅުންގެ ވުޒާރާތަކަށް ބަލާއިރު: ފިނޭންސް އެންޑް ޕަބްލިކް އެންޓަޕްރައިޒެސް މިނިސްޓަރުގެ މަގާމަށް މޫސާ ޒަމީރު، ހޯމްލޭންޑް ސެކިއުރިޓީ ލޭބަރ އެންޑް ޓެކްނޮލޮޖީ މިނިސްޓަރުގެ މަގާމަށް ޢަލީ އިޙުސާން، އަދި ފޮރިން އެފެއާޒް މިނިސްޓަރުގެ މަގާމަށް އިރުތިޝާމް އާދަމް ވަނީ އައްޔަނުކުރައްވާފަ އެވެ. އެޑިއުކޭޝަން، ހަޔަރ އެޑިއުކޭޝަން އެންޑް ސްކިލް ޑިވޮލޮޕްމެންޓް މިނިސްޓަރުގެ މަގާމަށް ޑރ. އިސްމާޢީލް ޝަފީޢު އައްޔަނުކުރެއްވިއިރު، ހެލްތް ފެމިލީ އެންޑް ވެލްފެއަރ މިނިސްޓަރުގެ މަގާމަށް އައްޔަނުކުރެއްވީ ޤީލާ އަލީ އެވެ.
މީގެ އިތުރުން، އިކޮނޮމިކް ޑިވެލޮޕްމަންޓް ޓްރާންސްޕޯޓް އެންޑް ޓްރޭޑް މިނިސްޓަރުގެ މަގާމަށް މުޙައްމަދު ސަޢީދު، އިސްލާމިކް އެފެއާޒް އެންޑަވަމަންޓްސް މިނިސްޓަރުގެ މަގާމަށް ޑރ. މުޙައްމަދު ޝަހީމް ޢަލީ ސަޢީދު، އަދި ޓުރިޒަމް އެންޑް ސިވިލް އެވިއޭޝަން މިނިސްޓަރުގެ މަގާމަށް މުޙައްމަދު އަމީން ވަނީ އައްޔަނުކުރައްވާފަ އެވެ. ޔޫތް އެމްޕަވަރމަންޓް، ސްޕޯޓްސް އެންޑް ފިޓްނެސް މިނިސްޓަރުގެ މަގާމަށް ޢަބްދުﷲ ރާފިޢު، އާޓްސް ކަލްޗަރ އެންޑް ހެރިޓޭޖް މިނިސްޓަރުގެ މަގާމަށް ހީނާ ވަލީދު، އިންފްރާސްޓްރަކްޗަރ ހައުސިންގ އެންޑް އަރބަން ޑިވެލޮޕްމަންޓް މިނިސްޓަރުގެ މަގާމަށް ޢަބްދުﷲ މުއްޠަލިބް، އަދި ކްލައިމެޓް ޗޭންޖް، އެންވަޔަރަމަންޓް އެންޑް އެނަރޖީ މިނިސްޓަރުގެ މަގާމަށް ޢަލީ ޝަރީފް ވަނީ އައްޔަނުކުރައްވާފަ އެވެ.
މި ބަދަލުތަކަކީ ސަރުކާރުގެ ކެބިނެޓުގައި ކުރިން ހިމެނިވަޑައިގެންނެވި 10 ވަޒީރަކު މަގާމުން އިސްތިއުފާ ދެއްވުމާ ގުޅިގެން ގެންނެވި ބަދަލުތަކެކެވެ. ރައީސް އޮފީހުން ހާމަކުރި ގޮތުގައި، 20 ވަޒީރުން ތިއްބަވާ ކެބިނެޓުގެ ދެބައިކުޅަ އެއްބައި ވަޒީރުން އިސްތިއުފާ ދެއްވީ ރައްޔިތުންގެ ވިންދާ އެއްގޮތަށް ސަރުކާރު ހިންގެވުމަށް ރައީސުލްޖުމްހޫރިއްޔާ ގެންނަވަން ބޭނުންފުޅުވާ ހެޔޮ ބަދަލުތަކަށް ފުރުޞަތު ދެއްވުމުގެ ގޮތުންނެވެ. މި ބަދަލުތަކަކީ ސަރުކާރުގެ ހިންގުން ހަރުދަނާކޮށް، ރައްޔިތުންނަށް ވެފައިވާ ވައުދުތައް ފުއްދުމުގައި އިތުރު ހަލުވިކަމެއް ގެނައުމަށް ރައީސުލްޖުމްހޫރިއްޔާ ނިންމެވި ނިންމެވުމެއް ކަމަށްވެސް އެ އޮފީހުން ބުނެފައިވެ އެވެ.
