ރައީސް މުއިއްޒާއި ސަރުކާރަށް އިތުބާރު ގެއްލިފައިވާތީ ގައުމުގެ ސަލާމަތަށްޓަކައި 12 ކަމެއް އިސްލާހު ކުރުމަށް ސަރުކާރަށް ގޮވާލާ އެމްޑީޕީ އިން މަގުމަތީ ހަރަކާތަށް ނުކުމެއްޖެ

ރައީސް ޑރ. މުހައްމަދު މުއިއްޒާއި އެމަނިކުފާނުގެ ސަރުކާރަށް އިތުބާރުގެއްލިފައިވާތީ ގައުމުގެ ސަލާމަތަށްޓަކައި 12 ކަމެއް އިސްލާހު ކުރުމަށް އިދިކޮޅު އެމްޑީޕީ އިން ސަރުކާރަށް ގޮވާލާ އިހުތިޖާޖު ކުރުމަށް އެމްޑީޕީގެ ގައުމީ ހިންގާ ކޮމިޓީން ފާސްކޮށްފި އެވެ. 

އެމްޑީޕީގެ ގައުމީ ހިންގާ ކޮމިޓީން ފާސްކުރި ގަރާރުގައި ބުނެފައިވަނީ ނިމިދިޔަ ލޯކަލް ކައުންސިލް އިންތިޚާބުގެ ވޯޓާއި ސަރުކާރުގެ ފަރާތުން ހުށަހަޅައިގެން ނެގި ފެންނަ ނުފެންނަ ވޯޓުން ވަރަށް ފާޅުކަން ބޮޑު ގޮތެއްގައި ރައްޔިތުންގެ އިތުބާރު ސަރުކާރަށް ނެތްކަން ހާމަކޮށްފައިވުމާއި، އެ ނިންމުން ދިވެހި ރައްޔިތުން ނިންމާފައިވަނީ، ދައުލަތުގެ މާލިއްޔަތުން ނުހަނު ބޮޑަށް އިސްރާފުކުރުން އިތުރުވެ، ސަރުކާރުގެ ތެރޭގައި ވައްކަމާއި، ކަރަޕްޝަން އިންތިހާ އަށް ފެތުރި، ސަރުކާރުގެ އިދާރީ ހިންގުން ބަލިކަށިވެ ދޯދިޔާވެފައިވާ ކަމަށެވެ. ގަރާރުގައި ބުނެފައިވަނީ ބާރުތައް އެކެއްގެ މުށުތެރެއަށް ޖަމާކޮށް، ޑިމޮކްރަސީގެ އަސާސްތަށް މުގުރާލަމުން ދިއުމުގެ ސަބަބުން، ގައުމު އިސްލާހީ މަގަށް ރުޖޫއަކުރުމަށްޓަކައި، މި ވަގުތު، އަވަސް، ހަރުދަނާ އިސްލާހީ ފިޔަވަޅުތައް އެޅުން މުހިންމުކަމަށް ފެންނަ ކަމަށް ގަރާރުގައި ބުނެފައިވެ އެވެ. 

އެގޮތުން ޑރ. މުހައްމަދު މުއިއްޒު އާއި އެމަނިކުފާނުގެ ސަރުކާރުގެ އިތުބާރު ގެއްލި، ތާއީދުނެތްކަމަށް ރައްޔިތުންގެ ގިނަ ބަޔަކު ނިންމާފައިވާތީ ދިވެހިރައްޔިތުންގެ ޙައްޤުގައި ގައުމުގެ މުސްތަގަބަލު ރައްކާތެރިކޮށް މި ގައުމުގެ ސަލާމަތަށްޓަކައި 12 ކަމެއް އިސްލާހު ކުރުމަށް ސަރުކާރަށް ގޮވާލާ ކަމަށެވެ. 

އެމްޑީޕީ އިން ސަރުކާރަށް އިސްލާހު ކުރުމަށް ގޮވާލި 12 ކަންތައް

1. މުސްތަގިއްލު މުއައްސަސާތަކުގެ ރައީސުންނާއި ނައިބު ރައީސުން، ރައީސުލް ޖުމްހޫރިއްޔާ އައްޔަން ކުރައްވާ ގޮތަށް ގާނޫނަށް ގެނައި ބަދަލު ބާތިލުކޮށް، ޑިމޮކްރަސީގެ ހަމަތަކާއެއްގޮތަށް އެބާރު ރައްޔިތުންގެ މަޖިލީހަށް އަނބުރާ ރުޖޫޢަކުރުން.
2. ކޮރަޕްޝަނަށް މަގުފަހިވާ ގޮތަށް ދައުލަތުގެ މާލިއްޔަތު ގަވާއިދަށް ގެނެސްފައިވާ އިސްލާހުތައް މުރާޖައާކޮށް، ބިޑަކާ ނުލައި މަޝްރޫޢުތައް ހަވާލުކުރެވޭ ގޮތަށް ހުރި ކަންކަން އިސްލާހުކޮށް ނިޒާމު ހަރުދަނާކުރުން.
3. ރައްޔިތުންގެ ތާއީދާއެކު އިންތިޚާބުކޮށްފައިވާ ރައްޔިތުންގެ މަޖިލީހުގެ މެންބަރުން، ސިޔާސީ ޕާޓީތަކުގެ އެތެރޭގެ ކޮމިޓީއަކުން ނިންމާ ނިންމުމަކުން ނުވަތަ މަޖިލީހުގައި ވޯޓުދޭ ގޮތަކުން މެންބަރުކަމުން ވަކިކުރެވޭ ގޮތަށް އޮތް އޮތުން ބާތިލުކޮށް. މެންބަރުންގެ ގާނޫނީ މިނިވަންކަން ކަށަވަރުކުރުން.
4. ލާމަރުކަޒީ ނިޒާމުގެ ބާރުތައް ހަނިވާގޮތަށް މިސަރުކާރުން ގެނެސްފައިވާ ބަދަލުތައް ބާޠިލުކޮށް، ކައުންސިލްތަކަށް އިދާރީ އަދި މާލީ ފުރިހަމަ މިނިވަންކަން ލިބިދޭނޭހެން ޤާނޫނުތަކަށް އިޞްލާޙު ގެނައުން.
5. ސަރުކާރުގެ ތެރޭގައި ހިނގާފައިވާ ކޮރަޕްޝަންގެ މައްސަލަތަކުގެ ތަހުގީގުތައް އަވަސްކުރުން. މީގެ ތެރޭގައި އިންތިޚާބާ ދިމާކޮށް ސަރުކާރު ހިއްސާވާ ކުންފުނިތަކަށް އިންތިހާއަށް މީހުން އައްޔަނުކުރުމާއި، ބިޑަކާ ނުލައި ހަވާލުކޮށްފައިވާ ބޮޑެތި މަޝްރޫޢަތަކުގެ އިތުރުން، އެޗްޑީސީ މެދުވެރިކޮށް ގަވާއިދާ ޚިލާފަށް ގޯތި ދޫކޮށްފައިވާ ކަމަށް ތުހުމަތުކުރެވޭ މައްސަލަތައް ތަހުގީގުކޮށް، ވީ އެންމެ އަވަހަކަށް ޝަރީއަތަށް ފޮނުވުން.
6. ސަރުކާރުގެ ސިޔާސީ މަޤާމުތަކަށް އައްޔަނުކޮށްފައިވާ ފަރާތްތަކުގެ އަދަދު ހާމަކޮށް، ފާއިތުވި ހަ މަސްދުވަހުގެ ތެރޭގައި ސަރުކާރު ހިއްސާވާ ކުންފުނިތަކަށާއި ސިޔާސީ މަޤާމުތަކަށް އައްޔަނުކުރި މީހުންގެ އަދަދާއި، ޕްރޮމޯޝަން ދިން މީހުންގެ އަދަދާއި، އެ ފަރާތްތަކުގެ ތަފްޞީލު ހާމަކުރުން.
7. ތެލުގެ އަގުބޮޑުވުމުގެ ސަބަބުން އިޤްތިސާދީ ސިނާޔަތްތަކަށް، ޙާއްޞަކޮށް މަސްވެރިކަމުގެ ސިނާޔަތް ހުއްޓިފައިވާތީ، ރައީސުލުމްޖުމްހޫރިއްޔާ ވައުދުވެފައިވާ ގޮތަށް ތެލުގެ އަގު ސަބްސިޑައިޒްކޮށް މަސްވެރިންނަށް ލިބޭނޭގޮތް ހަމަޖެއްސުން.
8. ޖުޑީޝަލް ސަރވިސް ކޮމިޝަން (ޖޭއެސްސީ) އެކުލެވިގެންވާ ގޮތް އިޞްވާޙުކުރާނެ ކަމަށް ރައީސުލްޖުމްހޫރިއްޔާ ވެވަޑައިގެންފައިވާ ވަޢުދާ އެއްގޮތަށް ޢަމަލުކޮށް، ޝަރުޢީ ދާއިރާގެ މިނިވަންކަން ކަށަވަރުކުރުން.
9. އެންޓި-ކޮރަޕްޝަން ކޮމިޝަނާއި އިލެކްޝަންސް ކޮމިޝަންގެ ރައީސުންގެ ދައީސުންގެ މަޤާމުގައި ތިއްބެވި ފަރާތްތައް ވަކިކޮށް، އެ މުއައްސަސާތަކުގެ މިނިވަންކަމާއި އިތުބާރު ދެމެހެއްޓޭނޭ ފަދަ ޤާބިލު ފަރާތްތައް އެ މަޤާމުތަކަށް އިސްކުރުން.
10. ތަކެތީގެ އަގުތައް ބޮޑުވިޔަނުދީ ހިފަހައްޓައި، އަސާސީ ޚިދުމަތްތަކުގެ އަގުބޮޑުވިޔަނުދީ ހިފެހެއްޓުމާއެކު، ދައުލަތުގެ ޚަރަދުތައް ކުޑަކޮށް އިސްރާފު މަދުކުރުމަށް އިސްކަންދިނުން؛ އަދި މިހާރުގެ އިޤްތިޞާދީ ޙާލަތާ ގުޅޭ ޞައްޙަ މަޢުލޫމާތު ދެފުށް ފެންނަ ގޮތެއްގައި ރައްޔިތުންނަށް ފޯރުކޮށްދިނުން އަވަސްކުރުން.
11. ޤައުމުގެ އިޞްވާޙީ ދަތުރު ހަރުދަނާކުރުމަށްޓަކައި، ޤާނޫނުއަސާސިއަށް ގެންނަންޖެހޭ ބަދަލުތައް ކަނޑައެޅުމުގައި ސިޔާސީ ޕާޓީތަކާއި މަދަނީ ޖަމްޢިއްޔާތަކުގެ ބައިވެރިވުން ހިމެނޭހެން ޚާއްޞަ ކޮމިޓީއެއް އެކުލަވައިލުން؛ އަދި އެ ކޮމިޓީގެ މަޝްވަރާގެ މަތިން މެނުވީ ޤާނޫނުއަސާސީއަށް އެއްވެސް ބަދަލެއް ނުގެނެވޭނެ ގޮތަށް ނިޒާމު ތަރުތީބުކުރުން.
12. ދިވެހިރާއްޖޭގެ ނާޒުކު ތިމާވެއްޓަކީ އަންނާން އޮތް ޖީލުތަކަށްޓަކައި ރައްކާތެރިކޮށް އަމާނާތްތެރިކަމާއެކު ރައްދުކޮށްދޭންޖެހޭ ޤައުމީ ތަރިކައަކަށް ވީހިނދު، ތިމާވެއްޓަށް ކުރާނެ އަސަރުތައް އެކަށީގެންވާ ގޮތެއްގައި ވަޒަންކުރުމެއްނެތި ހިންގާ މަޝްރޫޢުތައް ވަގުތުން ހުއްޓުމަކަށް ގެނައުމާއި، ތިމާވެށީގެ އީ.އައި.އޭ ރޕޯޓުތަކަށް ރިޢާޔަތްކުރުމެއްނެތި ދޫކޮށްފައިވާ މަސްވެރިކަމުގެ ހުއްދަތައް މުރާޖަޢާކޮށް، އެންވަޔަރަންމަންޓް ޕްރޮޓެކްޝަން އެޖެންސީ (އީ.ޕީ.އޭ) ގެ މިނިވަންކަމާއި ބާރު ކެނޑޭގޮތަށް އިދާރީ ނިޒާމަށް ގެނެސްފައިވާ ބަދަލުތައް އުވާލައި، ތިމާވެށި ހިމާޔަތްކުރުމުގެ ފުރިހަމަ ޤާނޫނީ ބާރުވެރިކަން އެ މުއައްސަސާއަށް ފުރިހަމައަށް އިއާދަކޮށްދިނުން.

މި ކަންކަން އިޞްލާޙުކުރުމަށް އެކަށީގެންވާ އަވަސް ފިޔަވަޅުތައް އެޅުމަށް ގޮވާލާ، ދިވެހި ރައްޔިތުންގެ ޙައްޤުގައި އިޙްތިޖާޖުތައް ފެށުމަށް އެ ޕާޓީން ނިންމާ ކަމަށް ގަރާރުގައި ބުނެފައިވެ އެވެ.