ދަގަނޑު ކެނޑޭނީ ދަގަނޑުން، އިށީންދެ ތިބެގެން ރައީސް މުއިއްޒު ބަލި ނުކުރެވޭނެ: ޝާތިރު

ދަގަނޑު ކެނޑޭނީ ދަގަނޑުން ކަމަށާއި، އިށީންދެ ތިބެގެން ރައީސް ޑރ. މުހައްމަދު މުއިއްޒު ބަލި ނުކުރެވޭނެ ކަމަށް އެމްޑީޕީ ގައުމީ މަޖިލީހުގެ މެންބަރު ޝާތިރު އަބްދުއްރަހްމާން ވިދާޅުވެއްޖެ އެވެ.

އަންގާރަ ދުވަހުގެ ރޭ ކުރިއަށް ގެންދިޔަ ހަރުގެ ޖަލްސާގައި ޝާތިރު ވަނީ ރައީސް މުއިއްޒު ކެބިނެޓަށް ކުއްލިއަކަށް ގެންނެވި ބަދަލުތަކަށް އިޝާރާތް ކުރައްވައި ވަރަށް ބޮޑަށް ފާޑު ވިދާޅުވެފަ އެވެ. ޝާތިރު ވިދާޅުވީ ކެބިނެޓުން ބައެއް ވަޒީރުން ދުރުކުރައްވައި، އައު ބޭފުޅުން އައްޔަން ކުރެއްވީ ގައުމާއި ރައްޔިތުންނަށް ހެޔޮ އެދިގެން ނޫން ކަމަށެވެ.  އަދި އެގޮތަށް ރައްޔިތުން އުންމީދު ކޮށްގެން ވެސް ނުވާނެ ކަމަށް އޭނާ ވިދާޅުވި އެވެ. 

ޝާތިރު ވިދާޅުވީ ހީނާ ވަލީދު ކެބިނެޓަށް އައްޔަން ކުރެއްވިއިރު، އެއީ ރައްޔިތުންނަށް އަނިޔާވެރިވެ، ކުޑަ ކުދީންގެ ހައްގުތައް ނިގުޅައި ގަނެފައިވާ މީހެއް ކަމަށާއި، ހޮޅި ކޮޅެއް ނުލިބިގެން ކުޑަ ކުއްޖެއްގެ މަރުގެ ތުހުމަތު ވެސް ކުރެވޭ މީހެއް ކަމަށެވެ. އަދި އެންސްޕާގެ ފައިސާއަށް ހިޔާނާތްތެރިވެ، ބޮޑު ޓީވީ ޗެނަލްއެއް ހުޅުވި މީހެއް ކަމަށް ތުހުމަތުކޮށް އެންސްޕާގެ ސީއީއޯގެ މަގާމުން ވެސް ހީނާ އިސްތިއުފާ ދެއްވުމަށް ގިނަ ރައްޔިތުން ގޮވާލާފައިވާ ކަމަށް އޭނާ ވިދާޅުވި އެވެ. 

ޝާތިރު ވިދާޅުވީ ހީނާގެ މައްޗަށް ރައްޔިތުންގެ އިތުބާރު ނެތް ކަމަށާއި، މިފަދަ ބޭފުޅަކަށް ވަޒީރުކަން ދޭން ހެޔޮނުވާނެ ކަމަށެވެ.

އެހެންކަމުން ރައްޔިތުން މަޖިލީހުގެ މެންބަރުން ވެސް ހީނާއަށް ރުހުން ނުދިނުމަށް އޭނާ ގޮވާލެއްވި އެވެ.  

މީގެ އިތުރުން ރައީސް މުއިއްޒަށް އިޝާރާތް ކުރައްވައި ޝާތިރު ވިދާޅުވީ، ދަގަނޑު ކެނޑޭނީ ދަގަނޑުން ކަމަށާއި، އީށީދެ ތިބެގެން އެމަނިކުފާނު ބަލި ނުކުރެވޭނެ ކަމަށެވެ. އެގޮތުން ރައީސް މުއިއްޒު ގެއަށް ފޮނުވާލުމަށްޓަކައި ރައްޔިތުން މަގު މައްޗަށް ނުކުންނަން ޖެހޭ ކަމަށް އޭނާ ވިދާޅުވި އެވެ. 

ކެބިނެޓަށް ކުއްލިއަކަށް ބަދަލުތަކެއް ގެނައީމަ ރައްޔިތުން ހީކޮށްފާނެ ރައީސް މުއިއްޒު އެބައުޅޭ ގައުމު ރަނގަޅު ކުރަން. މިއަދު ވެސް މިރާއްޖޭގެ ރައްޔިތުންނަށް އެދިނީ އަނިޔާ. ކެބިނެޓް އެބަދަލުކުރިއިރު މިރާއްޖޭގެ ވަރަށް ގިނަ ނިކަމެތިންނަށް އެންމެ ބޮޑެތި އަނިޔާތައް ދިން މީހާ އަނެއްކާ ކެބިނެޓަށް އެލީ. ދަގަނޑު ކެނޑޭނީ ދަގަނޑުން މިތާގައި އިށީދެގެން ތިބެގެން މި މުއިއްޒެއް ބައްޔެއް ނުކުރެވޭނެ. ތިބޭފުޅުން މިތަނަކަށް ނޫން ނުކުންނަންވީ މަގުމައްޗަށް. މިތަނަކަށް ނޫން އަންނަންވީ އެއް. މަގުމައްޗަށް ނުކުމެ މަގުމަތީގައި މީނަ ސައިޒު ކުރަން އަޅުގަނޑުމެން މަސައްކަތް ކުރަންވީ.

އެމްޑީޕީ ގައުމީ މަޖިލީހުގެ މެންބަރު ޝާތިރު އަބްދުއްރަހްމާން 

ޝާތިރު ވިދާޅުވީ އެމްޑީޕީން ރިފެރެންޑަމް އިންތިޚާބާ ގުޅިގެން ކުރިއަށް ގެންދިޔަ ނޫނެކޭ ކެންޕޭންއާ އެއްގޮތަށް ރައީސް މުއިއްޒު ގެއަށް ފޮނުވާލުމުގެ މަސައްކަތް ކުރާނެ ކަމަށެވެ. އަދި މި ކެންޕޭނަށް ރައްޔިތުން އެއްބާރުލުން ދިނުމަށް ވެސް އޭނާ ގޮވާލެއްވި އެވެ.