ސަރުކާރަށް ލިބުނު ބޮޑު ނާކާމިޔާބީ އާއި އެކު ރައީސްގެ "ފަސްޓް ކަޒިން" މިނިސްޓަރު އަލީ އާރިފް ވެސް އިސްތިއުފާ ދެއްވައިފި
އެޕްރީލް 4 ވަނަ ދުވަހު ބޭއްވި އިންތިހާބު ތަކުން ސަރުކާރަށް ލިބުނު ނާކާމިޔާބީއާ ގުޅިގެން، ސަރުކާރުގެ އިސް މަގާމުތަކަށް ބޮޑެތި ބަދަލުތަކެއް ވަނީ އަންނަން ފަށާފައި. މި ބަދަލުތަކުގެ ތެރެއިން މިފްކޯ، އެމް.ޑަބްލިއު.އެސް.ސީ އަދި ފެނަކަ ފަދަ މުހިންމު ކުންފުނިތަކުގެ އިސްވެރިން މަގާމުން ވަކިކޮށްފަވޭ. ސަރުކާރުގެ ކުންފުނިތަކުގެ އިތުރުން ރައީސް އޮފީހުގެ މިނިސްޓަރުގެ މަގާމުން އަލީ އާރިފް އިސްތިއުފާ ދެއްވުމަކީ ސަރުކާރުގެ އެތެރޭގައި ބޮޑެތި ލޮޅުންތަކެއް ހުރިކަން ހާމަވާ ކަމެއް.
އަލީ އާރިފް އަދި ރައީސް މުއިއްޒު: ރައީސް އޮފީހުގެ ވަޒީރުކަމުގައި ހުންނެވި އިރު އަލީ އާރިފް އެންމެ ބޮޑަށް ރައްޔިތުންގެ ސަމާލުކަން ހޯދާފައިވަނީ، ހަރަދުކުޑަކުރުމަށް ރައްޔިތުން ގަރުދިޔަ ކާން ކުރެއްވި އިލްތިމާސް އާ ގުޅިގެން. | ރައީސް އޮފީސް
ރައީސުލްޖުމްހޫރިއްޔާގެ އޮފީހުގެ މިނިސްޓަރުގެ މަގާމުގައި ހުންނެވި އަލީ އާރިފް ކުއްލި ގޮތަކަށް މަގާމުން އިސްތިއުފާ ދެއްވައިފި އެވެ.
ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ދެބެންގެދަރި ބޭފުޅެއް ކަމަށްވާ އަލީ އާރިފް އިސްތިއުފާ ދެއްވާފައިވަނީ ހޯމަ ދުވަހުގެ ވަގުތެއްގަ އެވެ.
މިނިސްޓާ އެޓް ދަ ޕްރެޒިޑެންޓްސް އޮފީސް ފޯ ޕްރެޒިޑެންޝަލް އެފެއާޒްގެ މަގާމުން އަލީ އާރިފް އިސްތިއުފާ ދެއްވި ނަމަވެސް، އޭނާ މަގާމުން ވަކިވެވަޑައިގަތީ ކޮން ސަބަބަކާ ހުރެކަން ސަރުކާރުންނާއި އޭނާ ވެސް މިހާތަނަށް ހާމަކޮށްފައެއް ނުވެ އެވެ. ނަމަވެސް މި ބަދަލަކީ ނިމިދިޔަ ހޮނިހިރު ދުވަހު ބޭއްވި ފެންނަ ނުފެންނަ ވޯޓުގައި ސަރުކާރަށް ލިބުނު ބޮޑު ނާކާމިޔާބީއާ ގުޅިގެން ސަރުކާރުގެ ހިންގުމަށް ގެންނަން ފަށާފައިވާ ބަދަލުތަކުގެ ތެރެއިން ހިނގި ކަމެއް ކަމަށް ބެލެވެ އެވެ.
ކައުންސިލް އިންތިހާބުގެ އިތުރުން ރިޔާސީ އިންތިޚާބާއި ރައްޔިތުންގެ މަޖިލީހުގެ އިންތިޚާބު އެއް ދުވަހެއްގައި ބޭއްވުމާ މެދު ރައްޔިތުންގެ ޚިޔާލު ހޯދުމަށް ބޭއްވި ވޯޓުގައި ރައީސް މުއިއްޒުގެ ސަރުކާރު ވަނީ ބޮޑު ތަފާތަކުން ބަލިވެފަ އެވެ. މި ނާކާމިޔާބީއަށްފަހު، ސަރުކާރުގެ އެކި ކުންފުނިތަކުގެ އިސްވެރިން މަގާމުތަކުން ވަކިކުރުމާއި އިސްތިއުފާ ދިނުން ވަނީ ވަރަށް ބޮޑަށް އިތުރުވެފަ އެވެ.
އެގޮތުން އާދީއްތަ ދުވަހު ވަނީ ސަރުކާރުގެ މަސް ކުންފުނި، މިފްކޯގެ ސީއީއޯ ފަރުހަތު ޝަހީރާއި، ފެން ކުންފުނި އެމްޑަބްލިއުއެސްސީ ގެ މެނޭޖިންގ ޑިރެކްޓަރު އަބްދުލް މަތީން ވެސް ކުއްލި ގޮތަކަށް މަގާމުން އިސްތިއުފާ ދެއްވާފަ އެވެ. މީގެ އިތުރުން ފެނަކަ ކޯޕަރޭޝަންގެ އެމްޑީ މުހައްމަދު ނަޖާހު އާއި، އެގްރޯނެޓްގެ އެމްޑީ ހުސައިން ދީދީގެ އިތުރުން، އެމްޕީއެލްގެ އެމްޑީ ރިޝްވާން ވެސް ވަނީ ސަރުކާރުން އަންގައިގެން މަގާމުން އިސްތިއުފާ ދެއްވާފަ އެވެ.
ސިޔާސީ މަސްރަހު ދިރާސާކުރާ ފަރާތްތަކުން ބުނާ ގޮތުގައި، ރައީސްގެ އާއިލީ ބޭފުޅެއް ކަމަށްވާ އަލީ އާރިފް އިސްތިއުފާ ދެއްވުމަކީ ސަރުކާރުގެ އެތެރޭގައި ބޮޑެތި ލޮޅުންތަކެއް ހުރިކަން ހާމަވާ ކަމެކެވެ.
