އެމްއޭސީއެލް ގައި މަސައްކަތެއް ނެތި ބޮޑު މުސާރަ ދޭ 85 މުވައްޒަފުންގެ ނަން ހިމެނޭ ލިސްޓެއް، އޭގެ ތެރޭގައި މަޝްހޫރު ފިލްމީ ތަރިންނާއި ކުރީގެ މެންބަރުން ހިމެނޭ!
އެމްއޭސީއެލްގައި މަސައްކަތެއް ނެތި ބޮޑު މުސާރަ ލިބޭ ގޮތަށް ސިޔާސީ ފަރާތްތަކެއް ތިބިކަން ހާމަވުމާ ގުޅިގެން، ދައުލަތުގެ ޚަރަދުތައް ބޮޑުވެ އިގްތިސާދަށް ނޭދެވޭ އަސަރު ކުރަމުންދާތީ ސަރުކާރަށް ބޮޑެތި ފާޑުކިޔުންތަކެއް ވަނީ އަމާޒުވެފައި. ސިޔާސީ މަގާމުތަކުގެ އަދަދު މަދުކުރާނެ ކަމަށް ރައީސް ވައުދުވެވަޑައިގެންނެވި ނަމަވެސް، މަގާމުތަކުގެ ސައްހަ އަދަދު ސިއްރުކޮށް، ކުންފުނިތަކުގެ ތެރެއިން ސިޔާސީ ނުފޫޒު ފޯރުވަމުންދާ ކަމަށް ގިނަ ބަޔަކު ތުހުމަތު ކުރެއެވެ. އެހެންކަމުން ގާބިލު ޒުވާނުންނަށް ފުރުސަތު ނުލިބި، ޓެކްސް ފައިސާ އިސްރާފުވަމުންދާ ކަމުގެ ކަންބޮޑުވުން އާންމުން ދަނީ ފާޅުކުރަމުން.
އެމްއޭސީއެލްގެ ސީއީއޯ އަދި މެނޭޖިން ޑިރެކްޓަރު އިބްރާހިމް ޝަރީފު ނޫސްވެރިންގެ ބައްދަލުވުމެއްގައި ވާހަކަ ދައްކަވަނީ. | އެމްއޭސީއެލް
މޯލްޑިވްސް އެއަރޕޯޓްސް ކޮމްޕެނީ ލިމިޓެޑް (އެމްއޭސީއެލް) ގައި މަސައްކަތެއް ނެތި ބޮޑު މުސާރަ ދޭ 85 މުވައްޒަފުންގެ ނަން ހިމެނޭ ލިސްޓެއް އާންމު ކޮށްފި އެވެ.
އެކްސްގައި އާންމުކޮށްފައިވާ ލިސްޓުން އެނގޭ ގޮތުގައި އެމްއޭސީއެލް އިން 50،000 އިން ދަށުގެ އެކި ބޮޑު މުސާރަތައް ލިބޭ 85 މީހުން އެބަ ތިއްބެވެ. އޭގެ ތެރޭގައި މަޝްހޫރު ފިލްމީ ތަރިންނާއި ކުރީގެ މެންބަރުންނާއި ނޫސްވެރިއަކު ހިމެނެ އެވެ.
އެންމެންގެ މުސާރަ ހުރީ 20،000 ރުފިޔާއަށް ވުރެ މަތީގަ އެވެ. އޭގެ ތެރޭގައި ހިމެނޭ ހަސަން ނަޖީބުގެ އިތުރުން ޒީނާޒު އަދުނާން އަށް 50،000 ރުފިޔާ މަހު މުސާރައަށް ލިބެ އެވެ.
އެކްސްގައި އާއްމުވެފައިވާ އެ ލިސްޓާ ގުޅިގެން ގިނަ ބައެއްގެ ފާޑު ކިޔުން އެމްއޭސީއެލްގެ އިތުރުން ސަރުކާރަށް ވަނީ އަމާޒުވެފަ އެވެ.
މެދުއިރުމަތީގެ ހަނގުރާމައާ ގުޅިގެން އިގްތިސާދަށް ދަތިވެފައިވާ ދަނޑިވަޅެއްގައި ރައީސް މުއިއްޒުގެ ސަރުކާރުން ދައުލަތަށް ބުރަ ބޮޑު ކުރަމުންދާ ކަމަށާއި، ރައްޔިތުންގެ ޓެކްސް ފައިސާ އިސްރާފު ކުރަމުންދާ ކަމަށެވެ. އަދި ކިޔަވައިގެން ނުކުންނަ ޒުވާނުންނާއި ގާބިލު މީހުންނަށް ފުރުސަތު ދިނުމުގެ ބަދަލުގައި ސިޔާސީ ގޮތުން ވަކި ކަމެއް ހާސިލް ކުރުމުގެ މަގުސަދުގައި ކުންފުނިތައް ބަގުރޫޓް ކުރަމުންދާ ކަމަށެވެ.
މިސަރުކާރުގައި އެމްއޭސީލްގެ މެންޑިޑޭޓުން ބޭރުން މަޝްރޫއުތައް ވެސް ދަނީ ހަވާލު ކުރަމުންނެވެ. އެގޮތުން އެމްބިއުލާންސް ގެނައުން ފަދަ މަސައްކަތްތައް އެ ކުންފުނިން ކުރެ އެވެ.
އެމްއޭސީއެލްގައި މަސައްކަތެއް ނެތި ބޮޑު މުސާރަ ދޭ 85 މުވައްޒަފުންގެ ނަން ހިމެނޭ ލިސްޓެއް އާންމުވެފައިވާއިރު، މި ސަރުކާރުގައި ސިޔާސީ މުވައްޒަފުންގެ އަދަދު 700 އަށްވުރެ ގިނަ ނުކުރާނެ ކަމަށް ރައީސް މުއިއްޒު ވައުދުވެވަޑައިގެންފައިވެ އެވެ. ސިޔާސީ މަގާމުތަކުގެ ޖުމްލަ އަދަދު ސިއްރު ކުރުމަށް ދަނީ ވަރަށް ބޮޑަށް މަސައްކަތް ކުރަމުންނެވެ.
އާއްމު ރައްޔިތުންގެ ފާޑުކިޔުންތަކާއި، ނޫސްވެރިންގެ ސުވާލުތަކާ ގުޅިގެން 15 ޖުލައި 2025 ގައި ރައީސް އޮފީހުން ނެރުނު ބަޔާނެއްގައި ބުނީ އެ ވަގުތު ސިޔާސީ މަގާމުތަކުގައި 922 މުވައްޒަފުން ތިބި ކަމަށެވެ. އަދި ސިޔާސީ މުވައްޒަފުންގެ މައުލޫމާތު ސިއްރު ކުރަން އެތައް މަސައްކަތްތަކެއް ކުރުމަށް ފަހު އެންމެ ފަހުން މި މައުލޫމާތު ހާމަ ކުރި އިރު، ސަރުކާރުގެ ޚަރަދުތައް ކުޑަކުރަން ކަމަށް ބުނެ 2024 ވަނަ އަހަރުގެ ނޮވެމްބަރު މަހު، ސަރުކާރުން ވަކިި ކުރި ކަމަށް ބުނި 248 މުވައްޒަފުންގެ މައުލޫމާތު ހާމަ ކުރަން ވެސް ރައީސް އޮފީހުން ވަނީ ދެކޮޅު ހަދާފަ އެވެ.
އޭގެފަހުން މިއަދާ ހަމައަށް އަދި މިފަހުން ބޭއްވި ލޯކަލް ކައުންސިލް އިންތިޚާބާއި، އަންހެނުންގެ ތަރައްގީއަށް މަސައްކަތްކުރާ ކޮމެޓީގެ އިންތިޚާބުގެ އިތުރުން ރިފެރެންޑަމް އިންތިޚާބާ ގުޅިގެން ވެސް ގިނަ ބަޔަކަށް ސިޔާސީ ގޮތުން ވަޒީފާ ދީފައިވެ އެވެ. ނަމަވެސް ޖުމްލަ އަދަދެއް ނޭނގޭ އެވެ.
ސަރުކާރުގެ ސިޔާސީ މަގާމުތަކުގައި ތިބި ބައެއް މީހުންނަކީ ކުރާނެ މަސައްކަތެއް އަދި އިށީންނާނެ ގޮނޑިމޭޒު ވެސް އޮފީހުގައި ނުހުންނަ، އަދި ބައެއް މީހުންނަކީ އޮފީހަށް ހަމަ އެކަނި ސޮއި ކޮށްލަން އަންނަ ބައެއް ކަމަށް މައުލޫމާތު ލިބެ އެވެ. އަދި މިސަރުކާރުގެ ސިޔާސީ މަގާމުތައް 2500ށް ވުރެ އިތުރުވާނެ ކަމަށް މައުލޫމާތު ލިބެ އެވެ.
