ރައީސް މުއިއްޒުގެ ސިޔާސަތާއެކު ކުރިއަށް އޮތް ދެ މަހު ރައްޔިތުންނަށް ވަރަށް ބޮޑަށް ދަތިވާނެ: އަމްރު

ރައީސް ޑރ. މުހައްމަދު މުއިއްޒުގެ ސިޔާސަތާއެކު ކުރިއަށް އޮތް ދެ މަހު ރައްޔިތުންނަށް ވަރަށް ބޮޑަށް ދަތިވާނެ ކަމަށް އެސްޓީއޯގެ ކުރީގެ މެނޭޖިންގ ޑިރެކްޓަރު ހުސައިން އަމްރު ވިދާޅުވެއްޖެ އެވެ.

ރާއްޖެޓީވީގެ ފަލަސުރުހީ ޕްރޮގްރާމުގައި ވާހަކަ ދައްކަވަމުން އަމްރު ވިދާޅުވީ، މެދުއިރުމަތީގެ ހަނގުރާމައާ ގުޅިގެން ހަރަދު ކުޑަ ކުރުމަށްޓަކައި މިސަރުކާރުން ހަރުދަނާ ފިޔަވަޅެއް ނާޅާ ކަމަށާއި، ކުރިއަށް އޮތް ދެ މަހު ރާއްޖޭގެ ރައްޔިތުންނަށް ވަރަށް ބޮޑަށް ދަތިވާނެ ކަމަށެވެ. 

އެގޮތުން ތަކެތީގެ އަގު އުފުލެމުންދާ ކަމަށާއި، ކުރިން 35 ރުފިޔާ އާއި 45 ރުފިޔާ އަށް ލިބުނު ކުކުޅު ކިލޯއެއް މިއަދު ލިބެން ހުރީ 75 ރުފިޔާއަށްވުރެ މަތިން ކަމަށް އޭނާ ވިދާޅުވި އެވެ. 

މީގެ އިތުރުން އަމްރު ވިދާޅުވީ ރާއްޖެއަށް އެންމެ ގިނައިން ޑޮލަރު ވައްދާ ސިނާއަތަކީ ފަތުރުވެރިކަމުގެ ސިނާއަތް ކަމަށާއި، ނަމަވެސް ހަނގުރާމައާ ގުޅިގެން ޑޮލަރު ނުވަންނަ ކަމަށެވެ. އަދި މިކަމުގެ ނުދޭވޭ އަސަރު މުޅި ގައުމަށް ކުރާނެ ކަމަށް އޭނާ ވިދާޅުވި އެވެ. 

ރާއްޖޭގައި ޑޮލަރު، ޑޮލަރު ހުރިހާ ކަމެއް މި ކުރަނީ. އަޅުގަނޑުމެން ކޮންމެ އެއްޗެއް ގަތަސް، ކޮންމެ އެއްޗެއް އިމްޕޯޓްކުރިޔަސް، ކައިގެންބޮއިގެން ކާޑަށް ދަންދެން، ހަނޑޫ، ހަކުރު، ފުއްވެސް މި ގަންނަންޖެހެނީ ޑޮލަރު ދީފަ. އެ ޑޮލަރު ނެތް ވާހަކަ މި ދައްކަނީ. އެހެންވީމާ، އެ ޑޮލަރު ހޯދާނެ ގޮތަކަށް ނޫނިއްޔާ ޑޮލަރު މި ބޭކާރު ގޮތުގައި ޚަރަދުކުރާ ވަރަށް ކުޑަކުރުމަށްޓަކައި ނޫންތޯ މަސައްކަތްކުރަންވީ. މި ވަގުތު ޑީ.އެމް.ޑީ.އިންނެއް ނޫންތޯ ކަނޑަން ވީކީ. މި ވަގުތު ބަންދު ކުރަންވީ ރާއްޖޭން ބޭރުގައި މިހުރި ހުރިހާ އެމްބަސީއެއް ނޫންތޯ. ކީއްކުރާ ތަނެއްތޯ؟ އޭގެ ކޮންމެ އެމްބަސީއެއްގައި އެބަތިބި 70 އިން 100 އިން މީހުން. އަޅުގަނޑުމެން ޑޮލަރުން މި ޕޭ ކުރަނީ އެ މީހުންގެ މުސާރައަށާއި، އެ މީހުންގެ އާއިލާއަށާއި، އެ މީހުންގެ ކުދިން ސްކޫލަށް ވެއްދުމަށާ ހުރިހާ ކަމަކަށް. 

އެސްޓީއޯގެ ކުރީގެ މެނޭޖިންގ ޑިރެކްޓަރު ހުސައިން އަމްރު

އަމްރު ވިދާޅުވީ މިސަރުކާރާއެކު ސިޔާސަތާއެކު އިގްތިސާދު ރަނގަޅު ނުވާނެ ކަމަށާއި، މިސިޔާސަތުތަކާއެކު ރައްޔިތުން ހަނާވަމުންދާ ކަމަށެވެ. 

އެގޮތުން މިއަދު އެއްބަސްވުމެއްގެ ދަށުން ތެޔޮ ލިބުނު ނަމަވެސް ކުރިއަށް އޮތް ދުވަސްތަކުގައި ތެޔޮ ބިލުތަކަށް ފައިސާ ދައްކާނެ ގޮތާމެދު ސުވާލު އުފެދިފައިވާ ކަަމަށް އަމްރު ވިދާޅުވި އެވެ. އަމްރު ވިދާޅުވީ މިއަދު ރައްޔިތުންގެ ޖީބަށް ފައިސާ އާއި ޑޮލަރު ވަންނަ މިންވަރު މަދުވާ ކަމަށާއި، ހަރަދު ކުރަންޖެހޭވަރު އިތުރުވާ ކަމަށެވެ. އަދި ރާއްޖެއަށް ޑޮލަރު ވަންނަވަރު މަދުވާއިރު، ރާއްޖެއިން ޑޮލަރު ހަރަދު ކުރާވަރު އިތުރުވާ ކަމަށެވެ.

އެހެންކަމުން ރާއްޖެ މިދަނީ ވަރަށް ނުރައްކާތެރި ހާލަތަކަށް ކަމަށް އޭނާ ވިދާޅުވި އެވެ.