ރައީސް މުއިއްޒުގެ ސަރުކާރަކީ ވަގުތީ ސަރުކާރެއް، ބަދަލު ކުރުމުގެ މަސައްކަތްތައް މިދަނީ ކުރަމުން: ޔައުގޫބު

ރައީސުލްޖުމްހޫރިއްޔާ ޑރ.މުހައްމަދު މުއިއްޒުގެ ސަރުކާރަކީ ވަގުތީ ސަރުކާރެއް ކަމަށާއި، މިސަރުކާރު ބަދަލު ކުރަންޖެހޭ ހުރިހާ މަސައްކަތްތަކެއް ކުރަމުންދާ ކަމަށް ރައްޔިތުންގެ މަޖިލީހުގެ ދާންދޫ ދާއިރާގެ ކުރީގެ މެންބަރު ޔައުގޫބު އަބްދުﷲ ވިދާޅުވެއްޖެ އެވެ.

ރާއްޖެޓީވީގެ ފަލަސުރުހީ ޕްރޮގްރާމްގައި ޔައުގޫބު ވިދާޅުވީ މިމަހުގެ 4 ވަނަ ދުވަހު ބޭއްވިގެން ދިޔަ ލޯކަލް ކައުންސިލް އިންތިޚާބާއި، އަންހެނުންގެ ތަރައްގީއަށް މަސައްކަތްކުރާ ކޮމެޓީގެ އިންތިޚާބުގެ އިތުރުން ރިފެރެންޑަމް އިންތިޚާބުގެ ނަތީޖާއިން ސަރުކާރަށް ވަރަށް ވަރުގަދަ މެސެޖްތަކެއް ރައްޔިތުން ދީފައިވާ ކަމަށެވެ.

މި ތިން އިންތިޚާބުގެ ނަތީޖާއެކު މިއީ ވަގުތީ ސަރުކާރެއްކަން ހާމަވެފައިވާ ކަމަށާއި، ރައީސް މުއިއްޒު ވެރިކަމުގައި ހުންނަވަން ގިނަ ރައްޔިތުން ބޭނުންނުވާ ކަމަށާއި، އެއްވެސް ސިޓީއަކުން ސަރުކާރަށް އެއްވެސް ގޮނޑިއެއް ނުލިބުމުން ރައްޔިތުންނަށް ފުދިފައިވާ މިންވަރު ހާމަވާ ކަމަށް އޭނާ ވިދާޅުވި އެވެ. 

މިސަރުކާރު ބަދަލުކުރަން ޖެހޭ ވަރަށް ގިނަ ސަބަބުތައް އެބަހުރިކަން ފާހަގަކުރައްވައި ޔައުގޫބު ވިދާޅުވީ ދައުލަތް ހިންގަމުން ދަނީ ރައްޔިތުން ބޭނުންވާ ގޮތަށް ނޫން ކަމަށާއި، މާލިއްޔަތުން ކުރަމުންދާ އިސްރާފާއި، ވައްކަން ރައްޔިތުން ހުއްޓުވަން ބޭނުންވާ ކަމަށެވެ. މިސަރުކާރުން ރައްޔިތުންގެ ނަމުގައި ނަގާ ލޯނުތަކުގެ ތަފްސީލާއި، މަޝްރޫއުތައް ކުންފުނިތަކާ ހަވާލުކުރާ ގޮތް ސާފުވާން ޖެހޭ ކަމަށް އޭނާ ވިދާޅުވި އެވެ. އަދި ވިދާޅުވީ ބިޑް ކުރުމެއްނެތި ގާތް މީހުންނަށް މަޝްރޫއުތައް ބަހާބެހުމަށް ވެސް ނިމުމަކަށް ގެންނަން ޖެހޭ ކަމަށެވެ. 

މީގެ އިތުރުން ޔައުގޫބް ވިދާޅުވީ މިޑްޓާމް އިލެކްޝަންގައި ގިނަ ރައްޔިތުން ރައީސް މުއިއްޒަށް ނޫނެކޭ ބުނެފައިވާ ކަމަށާއި، މިހާރު މިސަރުކާރަށް އިތުރުބާރު ކުރާނެ އަދި އުންމީދު ކުރާނެ އެއްވެސް ރައްޔިތެއް ނެތް ކަމަށެވެ. އަދި މިއީ މިސަރުކާރު ބަދަލުކުރަން ޖެހޭ މައިގަނޑު އެންމެ ބޮޑު ސަބަބު ކަމަށް ވެސް އޭނާ ވިދާޅުވި އެވެ. 

އެކަމަކު މިއަދާ ހަމައަށް އައިއިރު ރައީސުލްޖުމްހޫރިއްޔާ ފަރާތުން އެއްވެސް ގެންނަން އުޅެނީ ކޮންބަދަލެއް ކަމެއް، ބަދަލެއް ގެންނާނެ ކަމެއް، ކޮން ދިމާލަކަށް ކަމެއް ބަދަލުގެންނަނީ. މިއިން އެއްވެސް ކަމެއް އަދިވެސް އިނގެނީއެއް ނޫން. ދެން މިސާލަކަށް ތި ފާހަގަކުރި ގޮތަށް. ތިން ބިލިއަން ރުފިޔާ ޗާޕުކުރުމާ، އަދި އޭގެއިތުރަށް އަޅުގަނޑުމެންނަށް ފެނިގެންދިޔައެއް ނޫންތޯ؟ މިދިޔައީ ޑިސެންބަރު މަހު 2.7 ބިލިއަން ރުފިޔާގެ ޕްރޮޖެކްޓްސް ބޭންކް އޮފް މޯލްޑްވިސް މެދުވެރިކޮށް އެކިއެކި ގާތްފަރާތްތަކާއި، ޚާއްސަކޮށް މެންބަރުންނާއި މެންބަރުން، ސަރުކާރާއި ގާތްފަރާތްތަކާ އެއްވެސް ބިޑުކުރުމެއް ނެތި، ހަމަ ބަހާލި ތަން. ކޮބައިތޯ އެ ފައިސާ؟ ކޮބައިތޯ އެ ފައިސާ ވީކީނެއްތޯ؟ އޭގެއިން ކޮންރަށެއްގެ ކޮންކަމެއްތޯ ކުރީ؟ އަޅުގަނޑުމެން މި އައީ މިދިޔަ ދެތިން މަސްދުވަސް ތެރޭގައި ރާއްޖޭގައި ހުރިހާ ރަށެއް ކަވަރުކޮށްފަ. އަޅުގަނޑުމެން އެމް.ޑީ.ޕީގެ މި ކެމްޕެއިން ޓީމުން ނާރާ އެއްވެސް ރަށެއް ނޯންނާނެ. މި ކެމްޕެއިން ޓީމު އެކީ ކޮންމެވެސް ބަޔަކު ކޮންމެވެސް ދިމާލަކަށް ހުންނާނީ ގޮސްފައި. އަޅުގަނޑުމެންނަށް އެއްވެސް ބަޔަކަށް ނުފެނޭ، އެއީ މި ރާއްޖޭގެ އެންމެ ރަށެއްގައި ވެސް ކުރަމުންދާ މަސައްކަތެއް.

ރައްޔިތުންގެ މަޖިލީހުގެ ދާންދޫ ދާއިރާގެ ކުރީގެ މެންބަރު ޔައުގޫބު އަބްދުﷲ

ޔައުގޫބު ވިދާޅުވީ މަޝްރޫއުތައް ހަވާލު ކުރަމުންދަނީ ސަރުކާރުގެ ގާތް ބޭފުޅުންނަށް ކަމަށެވެ. އަދި ހުރިހާ ކަމަކުން ނާޖާއިޒް މަންފާ މިސަރުކާރުން ހޯދާއިރު، އެކަން ހުއްޓުވަން ރައްޔިތުން ބޭނުންވާ ކަމަށާއި، މިސަރުކާރު ބަދަލު ކުރުމަށް އެންމެން ގުޅިގެން މަސައްކަތް ކުރާނެ ކަމަށް އޭނާ ވިދާޅުވި އެވެ.