މައިމުޅަވާ ދަރިންނަށް ބަންޑާރަ ބިމުން ބައެއް ލިބޭ ގޮތަށް ހުށަހެޅި އިސްލާހު ބަލަ އެއް ނުގަތް
ބަންޑާރަ ގޯއްޗެއް ލިބިފައިވާ މީހަކު މަރުވުމުން، ބިމުގެ ތަނަވަސްކަން ނެތް މައިމުޅަވާ ދަރިންނަށް އެ ބިމުން ބައެއް ލިބޭގޮތަށް ބިމާބެހޭ ގާނޫނަށް, ގަލޮޅު އުތުރު ދާއިރާގެ މެމްބަރު ހުށަހެޅުއްވި އސިްލާހު ބަލައި ނުގަންނަން ފާސްކުރީ ސަރުކާރު ހިންގާ ޕާޓީގެ މެޖޯރިޓީއާއެކު 49 މެމްބަރުންގެ ވޯޓުން.
ރައްޔިތުންގެ މަޖިލީހުގެ ގަލޮޅު އުތުރު ދާއިރާގެ މެންބަރު މުޙައްމަދު އިބްރާހިމް (ކުޑޫ) ރައްޔިތުންގެ މަޖިލީހުގެ ޖަލްސާގައި ވާހަކަދައްކަވަނީ | މަޖިލިސް
މައިމުޅަވާ ދަރިންނަށް ބަންޑާރަ ބިމުން ބައެއް ލިބޭ ގޮތަށް ހުށަހެޅި އިސްލާހު ބަލައިނުގަންނަން ރައްޔިތުންގެ މަޖިލީހުން ނިންމައިފި އެވެ.
1/2002 ދިވެހިރާއްޖޭގެ ބިމާއި ބެހޭ ޤާނޫނަސް އިސްލާހު ގެނައުމާއި ގުޅޭ ގޮތުން ހުށަހަޅާފައިވާ ބިލް ބަލައިގަތުމާއި މެދު ނެގި ވޯޓުގައި ބައިވެރިވަޑައިގެންނެވި 59 މެމްބަރުންގެ ތެރެއިން 49 މެމްބަރުން ވޯޓުދެއްވީ ބިލު ބަލައިގަންނަން ނުފެންނަ ކަމަށެވެ. ބިލު ބަލައިގަތުމަށް ފެންނަ ކަމަށް 9 މެމްބަރުން ވޯޓުދެއްވާފައި ވާއިރު ވަކިކޮޅަކަށް ވޯޓު ދޭން ބޭނުން ނުވި މެމްބަރަކު ނެތެވެ.
އެ ބިލު ހުށަހަޅުއްވާފައި ވަނީ ގަލޮޅު އުތުރު ދާއިރާގެ މެމްބަރު މުހައްމަދު އިބްރާހިމް އެވެ.
އެ ބިލަށް ހުށަހަޅާފައިވާ އިސްލާހުގައި ވަނީ ބަންޑާރަ ގޯއްޗެއް ދޫކުރެވިފައިވަނިކޮށް އެ މީހަކު މަރުވާ ހާލަތުގައި، އެ ގޯއްޗެއްގައިވާ އިމާރާތާއި ނުއުފުލޭ މުދާ، ބިމުގެ ތަނަވަސްކަން ލިބިފައިނުވާ މައިމުޅަވާ ދަރިންގެ މެދުގައި ބިމުން ބައެއް ލިބޭ ގޮތަށް ހަމަޖެއްސުމަށެވެ.
މައިމުޅަވުމަކީ އަންހެން ދަރިންނަށް ވާރުތަ މުދާ ނުލިބޭ ފަދަ ހާލަތެއް ދިމާވުމެވެ. އެ ހާލަތު ދިމާވަނީ ބައްޕަ ނުވަތަ މަންމަ ދުނިޔޭގައި ހުއްޓާ އަންހެން ދަރިފުޅު މަރުވާ އިރު އޭނާގެ ދަރިން ތިބުމުންނެވެ. މިގޮތަށް ދިމާވުމުން ކާފަ ނުވަތަ މާމަގެ މުދަލުން އެ ކުދިން މަހުރޫމު ވެ އެވެ.
މި ބިލަށް ބަހުސް ކުރި އިރު ސަރުކާރު މެމްބަރުން ވަނީ މި ބިލުގެ މަގްސަދާއި މެދު ސުވާލު އުފައްދާފަ އެވެ. ބިލު ބޭރުކޮށްލީ ވެސް މަޖިލީހުގައި އޮތް ސަރުކާރުގެ މެޖޯރިޓީ ބޭނުންކޮށްގެންނެވެ.
