ވެރިކަމުގެ ބާކީ މި އޮތް ދުވަސްތަކުގައި ރައީސް މުއިއްޒު ވެރިކަން ކުރައްވަން ބޭނުންފުޅުވާ ކަމަށްވާނަމަ ރައްޔިތުންގެ އަޑު އަހައި، މިސަރުކާރުގެ ސިޔާސަތުތައް ބަދަލު ކުރަންޖެހޭ: ކުރީގެ ރައީސް ސޯލިހު

ވެރިކަމުގެ ބާކީ މި އޮތް ދުވަސްތަކުގައި ރައީސް ޑރ.މުހައްމަދު މުއިއްޒު ވެރިކަން ކުރައްވަން ބޭނުންފުޅުވާ ކަމަށްވާނަމަ ރައްޔިތުންގެ އަޑު އަހައި، މިސަރުކާރުގެ ސިޔާސަތުތައް ބަދަލު ކުރަންޖެހޭ ކަމަށް ކުރީގެ ރައީސް އިބްރާހިމް މުހައްމަދު ސޯލިހު ވިދާޅުވެއްޖެ އެވެ. 

ހުކުރު ދުވަހުގެ ރޭ ލޯކަލް ކައުންސިލް އިންތިޚާބުގައި އެމްޑީޕީ އަށް ލިބުނު ކާމިޔާބީ ފާހަގަ ކުރުމަށް ޅ. ހިންނަވަރުގައި ބޭއްވި ޖަލްސާގައި ރައީސް ސޯލިހު ވިދާޅުވީ އޭޕްރީލް މަހުގެ 4 ވަނަ ދުވަހު ބޭއްވިގެންދިޔަ ލޯކަލް ކައުންސިލް އިންތިޚާބާއި، އަންހެނުންގެ ތަރައްގީއަށް މަސައްކަތްކުރާ ކޮމެޓީގެ އިންތިޚާބުގެ އިތުރުން ރިފެރެންޑަމް އިންތިޚާބުގައި ސަރުކާރަށް ވަރަށް ގިނަ މެސެޖްތައް ރައްޔިތުން ދީފައިވާ ކަމަށެވެ. 

ރައީސް ސޯލިހު ވިދާޅުވީ، މި ސަރުކާރުގެ މިސްރާބު ގޯސް ކަމަށާއި، ސިޔާސަތުތަކަށް ރައްޔިތުން ނޫނެކޭ ބުނެފައިވާ ކަމަށެވެ. 

އެގޮތުން މިއަދު ރައީސް މުއިއްޒު ރައްޔިތުންގެ އަޑު އަހައި، ސަރުކާރުގެ ސިޔާސަތުތައް ބަދަލު ކުރަންޖެހޭ ކަމަށް އެމަނިކުފާނު ވިދާޅުވި އެވެ. 

ރައްޔިތުން އެ ދެއްކި ވާހަކަ، ރައްޔިތުން އެ ބުނި ވާހަކަތައް ވެރިޔަކަށް ހުންނަ މީހަކު އަޑުއަހަންޖެހޭ. އަޅުގަނޑު މި ދަންނަވަނީ އެ ވާހަކަ ރައީސް ޑރ. މުއިއްޒު އެބަ ޖެހިވަޑައިގަންނަވާ، ރައްޔިތުންގެ ދެއްކި ވާހަކަތައް އަޑުއަހަން. ސިޔާސަތުތައް ބަދަލުކުރަން އެބަޖެހޭ. ސަރުކާރު ހިނގާ މިސްރާބު ބަދަލުކުރަން އެބަޖެހޭ. ސަރުކާރުން ހިފަހައްޓާފައި ހުރި ކައުންސިލުތަކުގެ ބާރުތައް ދޫކޮށްލަން އެބަޖެހޭ. ރައްޔިތުންގެ މަޖިލީހުގައި އަޅުވާފައި އޮތް ތަޅު ރައްޔިތުންގެ ދޫ ބަންދުކުރުމަށްޓަކައި ގާނޫނުއަސާސީއަށް އެ ގެނައި ބަދަލު މިހާރުން މިހާރަށް އެބަޖެހޭ ބަދަލުކޮށް. އިސްލާހު އަނބުރާ ގެންނަން އެބަޖެހޭ. މިއީ ރައްޔިތުން އެ ދެއްކި ވާހަކައަކީ. ސަރުކާރުގެ މިސްރާބު ގޯހޭ. ސިޔާސަތުތައް ކަމަކުނުދެއޭ. މިއީ އަޑުއެހުން އެކަން ވެރިކަމުގައި ހުންނަ ބޭފުޅަކު އެބަ އައްސަވަންޖެހޭ.

ކުރީގެ ރައީސް އިބްރާހިމް މުހައްމަދު ސޯލިހު 

މީގެ އިތުރުން ރައީސް ސޯލިހު ވިދާޅުވީ މިހާރު ވެސް ކަންކަން ރަނގަޅު ކުރުމުގެ ބަދަލުގައި އިންސާފުން ބޭރުން ގިނަ ބަޔަކު ވަޒީފާއިން ވަކި ކުރަމުންދާ ކަމަށާއި، ވަޒީފާގެ ބިރު ވެސް ދައްކަމުންދާ ކަމަށެވެ. މިފަދަ ކަންކަން އިތުރަށް ގޯސް ކުރަމުންދާއިރު، ކުރިއަށް އޮތް ދެ އަހަރާއި ބައިގެ މުއްދަތުގައި ވެސް ވެރިކަމުގައި ހުންނަވަން ރައީސް މުއިއްޒު ބޭނުންފުޅުވާނަމަ ރައްޔިތުން އަޑު އަހައި، ކަންކަން އިސްލާހު ކުރަން ޖެހޭ ކަމަށް އެމަނިކުފާނު ވިދާޅުވި އެވެ. 

ވަޒީފާއަކުން ނޫން އެ މީހުން ކަނޑަންވީކީ. މަނިކުފާނު އިސްލާހުވާށޭ. އެއީ، އެންމެ ގައުމަށް އޮތް ގޮތަކީ. މިނިވަން މުއައްސަސާ މިނިވަންކަމާއެކީ ހިންގުމަށް ފުރުސަތު ދެއްވާށޭ. ފަނޑިޔާރުގެއަށް ބާރު ނުފޯރުވާށޭ. މި ކަންތައްތައް ތިމަންނަމެން ރައްޔިތުން ގަބޫލެއް ނުކުރަމޭ. ވެރިކަމުގެ ބާކީ މި އޮތް ދޭއް އަހަރާއި ބައި މަނިކުފާނު ވެރިކަން ކުރައްވަން ބޭނުންފުޅުވާ ކަމަށް ވަންޏާ، މި ކަންތައްތައް އިސްލާހު ކުރައްވައިގެން ކުރިއަށް ވަޑައިގަންނަވާށޭ.

ކުރީގެ ރައީސް އިބްރާހިމް މުހައްމަދު ސޯލިހު 

ރައީސް ސޯލިހު ވިދާޅުވީ ރާއްޖޭގެ ރައްޔިތުން ވަރަށް ގާތުން ގައުމުގައި ހިނގާ ކަންކަން ބަލާ ކަމަށާއި، އެކަންކަން ހަނދާނުގައި ބަހައްޓާ ކަމަށެވެ. އެހެންކަމުން ރައްޔިތުންނަށް ހެޔޮވެރިއަކަށްވުމަށް ރައީސް ސޯލިހު އިލްތިމާސް ކުރެއްވި އެވެ.