35 ދުވަހަށް ފަހު އަންނަ ހަފްތާއިން ފެށިގެން މަޖިލީހުގެ ޖަލްސާތައް އޮންނާނެ ކަމަށް ބުނެފި

ރައްޔިތުންގެ މަޖިލީހުގެ ޖަލްސާއެއް ނުބާއްވާތާ 35 ދުވަހަށް ފަހު އަންނަ ހަފްތާގެ ހޯމަ ދުވަހުން ފެށިގެން މަޖިލީހުގެ ޖަލްސާތައް އަނެއްކާ ވެސް ކުރިއަށް ދާނެ ކަމަށް މަޖިލީހުގެ އިދާރާ އިން ބުނެފި އެވެ. 

ރައްޔިތުންގެ މަޖިލީހުގެ ޖަލްސާއެއް އެންމެ ފަހުން ބާއްވާފައި ވަނީ މިދިޔަ މާޗު މަހުގެ 8 ވީ އާދިއްތަ ދުވަހުގަ އެވެ. ފެބްރުއަރީ 17 ވަނަ ދުވަހު ބޭއްވި ޖަލްސާގެ ފަހުން 18 ދުވަހަށް ފަހު ބޭއްވި އެ ޖަލްސާގައި ވެސް މާބޮޑު މަސައްކަތެއް ކޮށްފައެއް ނުވެ އެވެ. 

އެ ޖަލްސާ އާދިއްތަ ދުވަހެއްގައި ބޭއްވި އިރު އާދިއްތަ ދުވަހަކީ އާންމު ގޮތެއްގައި މަޖިލީހުގެ ޖަލްސާތައް ބާއްވާ ދުވަހެއް ނޫނެވެ. މަޖިލީހުގެ ޖަލްސާތައް އާންމުކޮށް ބާއްވަނީ ދައުރު ފެށުމަށްފަހު ކޮންމެ ހަފްތާއެއްގެ ވެސް ހޯމަ، އަންގާރަ އަދި ބުދަ ދުވަހުގަ އެވެ. 

މި ހިނގާ 2026 ވަނަ އަހަރުގެ ރައްޔިތުންގެ މަޖިލީހުގެ ފުރަތަމަ ދައުރުގައި މިހާތަނަށް ބާއްވާފައި ވަނީ އެންމެ 5 ޖަލްސާ އެވެ. 2 މަސް ދުވަހުގެ ޗުއްޓީއަކަށް ފަހު މި އަހަރަށް މަޖިލިސް ހުޅުވީ މި އަހަރުގެ ފެބްރުއަރީ މަހުގެ 5 ވަނަ ދުވަހު އެވެ. މަޖިލީހުގެ ފުރަތަމަ ދައުރު ފެށިގެން 3 މަސް ވެފައިވާއިރު ޖަލްސާތައް ނުބާއްވާ ޖަލްސާތައް ކެންސަލް ކުރަމުން ދިއަ ސަބަބު ވެސް ހާމަ ކޮށްފަ އެއް ނުވެ އެވެ.

މިކަމުގެ ކަންބޮޑުވުން އިދިކޮޅު މެންބަރުން ވަނީ އެތައް ފަހަރެއްގެ މަތިން ކޮށްފަ އެވެ. އެގޮތުން މެންބަރުންނަށް ވާނުވާ އެންގުމެއް ނެތި، ޖަލްސާ ނުބާއްވާ، މި ސަރުކާރުން ވަނީ މުޅި މަޖިލިސް ހިސޯރު ކޮށްފައި ކަމަށް ރައްޔިތުންގެ މަޖިލީހުގެ ހުޅުމާލެ ދެކުނު ދާއިރާގެ މެންބަރު ޑރ. އަހުމަދު ޝަމްހީދު ވަނީ ވިދާޅުވެފަ އެވެ. 

ޝަމްހީދު ވިދާޅުވީ ޖަލްސާ އޮންނާނެތޯ ނުވަތަ ނޫންތޯ މަޖިލިސް އޮންނަ ކޮންމެ ދުވަހަކު ވެސް ޔަގީން ނުވެފައި ތިބެން ޖެހޭ ކަމަށެވެ. ސަބަބަކީ މަޖިލީހުގެ އިދާރާ އިން ވެސް އަދި މަޖިލީހުގެ ރައީސް އަބްދުއްރަހީމް އަބްދުﷲ ވެސް މެންބަރުންނަށް ވަކި އެއްޗެއް ނާންގަވާތީ ކަމަށް މެންބަރު ވިދާޅުވި އެވެ. 

މަޖިލީހަކީ ސަރުކާރު ޖަވާބުދާރީ ކުރުވާ އެންމެ މުހިއްމު އެއް ބާރު ކަމަށާއި، ޚާއްޞަކޮށް ދުނިޔޭގައި މިވަގުތު ހިނގަމުންދާ މުހިއްމު ކަންކަމާ އޭގެ ސަބަބުން ރާއްޖެއަށް ކުރާނެ އަސަރުތަކާ ގުޅިގެން ވެސް ސަރުކާރާއި ސުވާލު ކުރަން ތިބި ރައްޔިތުންގެ މަންދޫބުން ތިބި ތަނަކީ މަޖިލިސް ކަމަށް ޝަމްހީދު ވިދާޅުވި އެވެ. ނަމަވެސް ޖަލްސާތައް ނުބާއްވާ މި ސަރުކާރު ޖަބާދާރީ ކުރުވުމުގެ ފުރުސަތު ވެސް ހުއްޓުވާފައިވާ ކަމަށް މެންބަރު ވިދާޅުވި އެވެ. 

އިދިކޮޅު މެންބަރުން އޭރު ބުނަމުން ދިޔައީ މަޖިލީހުގެ ޖަލްސާތައް ކެންސަލް ކޮށްފައިވަނީ އޭޕްރީލް 4 ވަނަ ދުވަހު އޮތް ކައުންސިލް އިންތިޚާބާ ދިމާކޮށް، އިދިކޮޅު އެމްޑީޕީ ގެ މެންބަރުން ދައްކަވާ ވާހަކަތަކާ ގުޅިގެން ސަރުކާރަށް އޭގެ ނެގެޓިވް އިމްޕެކްޓެއް އައިސް، ވޯޓު މަދުވެދާނެ ކަމުގެ ބިރަށް، އެ މެންބަރުންގެ އަޑު ކަނޑުވާލުމަށް ކަމަށެވެ. އެމްޑީޕީ މެންބަރުން ވިދާޅުވި ގޮތުގައި މެންބަރުން އަވަދި ނެތި އުޅުއްވީ ކެމްޕެއިން ދަތުރުތަކުގަ އެވެ.