ބަތް ކައްކާ ކުޅޭ އުސޫލުން ހިނގާ، ޕީއެންސީ އިން ކޮންޓްރޯލް ކުރާ 20 ވަނަ މަޖިލީސް ފަށަނީ، މިފަހަރު މަސައްކަތް ކުރާނީ ކިތަށް ދުވަހަށް؟

ދިވެހިރާއްޖޭގެ ޤާނޫނުއަސާސީގެ ދަށުން ދައުލަތް ހިންގުމުގެ އެންމެ މުހިންމު އެއް ބާރަކީ ރައްޔިތުންގެ މަޖިލީހެވެ. އެއީ ރައްޔިތުންގެ އަޑު އިއްވައި، ސަރުކާރު ޖަވާބުދާރީކުރުވައި، ގައުމުގެ ކުރިމަގަށް ބޭނުންވާ ޤާނޫނުތައް ހަދާ މަރުކަޒެވެ.ރައްޔިތުންގެ މަޖިލީހަކީ ދައުލަތުގެ ތިން ބާރުގެ ތެރެއިން ރައްޔިތުންނާ އެންމެ ގާތުން ގުޅިފައިވާ ބާރެވެ. ނަމަވެސް، މިއަދު މަޖިލީހުން ފެންނަ މަންޒަރަކީ މުޅިން ތަފާތު މަންޒަރެކެވެ. މިއަދު މަޖިލީހަކީ ހަމައެކަނި "ނަމަކަށް" ހިންގާ، ސިޔާސީ ބޭނުންތަކަށް ބޭނުންކުރާ ހަތިޔާރަކަށް ވަނީ ވެފަ އެވެ.

މަޖިލީހުގެ ސުޕަ މެޖޯރިޓީ ސަރުކާރު ހިންގާ ޕީއެންސީ އަށް އޮތް އިރު، މަޖިލީހުގެ ޖަލްސާތައް ބޭއްވުން މިއަދު މިވަނީ ފޫހިވީމާ ބާއްވާލާ ޖަލްސާތަކަކަށް ވެފަ އެވެ. 2026 ވަނަ އަހަރުގެ ރައްޔިތުންގެ މަޖިލީހުގެ ފުރަތަމަ ދައުރުގައި މިހާތަނަށް ބާއްވާފައި ވަނީ އެންމެ 5 ޖަލްސާ އެވެ. 2 މަސް ދުވަހުގެ ޗުއްޓީއަކަށް ފަހު މި އަހަރަށް މަޖިލިސް ހުޅުވީ މި އަހަރުގެ ފެބްރުއަރީ މަހުގެ 5 ވަނަ ދުވަހު އެވެ. މަޖިލީހުގެ ފުރަތަމަ ދައުރު ފެށިގެން 3 މަސް ވެފައިވާއިރު ޖަލްސާތައް ނުބާއްވާ ޖަލްސާތައް ކެންސަލް ކުރަމުން ދިއަ ސަބަބު ވެސް ހާމަ ކޮށްފަ އެއް ނުވެ އެވެ.  މި އަހަރުގެ ފުރަތަމަ ދައުރުގައި މިދިޔަ ފެބްރުއަރީ މަހުގެ 17 ވަނަ ދުވަހު ޖަލްސާއެއް ބޭއްވުމަށްފަހު، ދެން ޖަލްސާއެއް ބޭއްވީ ގާތްގަނޑަކަށް ތިން ހަފުތާގެ މެދުކެނޑުމަކަށްފަހު މާރިޗު 8 ގަ އެވެ. އޭގެ ފަހުން މިއަދާ ހަމައަށް މަޖިލީހުގެ ތަޅުމުން ފެންނަނީ ހުސް ގޮނޑިތަކެވެ. 

ގައުމުގެ އިގްތިސާދީ ހާލަތު ދަށްވެ، ތަކެތީގެ އަގު އުފުލި، ރައްޔިތުންގެ ކަންބޮޑުވުންތައް އިންތިހާއަށް ގޮސްފައިވާއިރު، މަޖިލިސް މަރުތަޅު އެޅުވުމަކީ ރައްޔިތުންގެ ހައްގުތަކަށް އަރައިގަތުމެވެ. މަޖިލީހުގެ ރަސްމީ މަސައްކަތްތައް ހުއްޓިފައި އޮތުމުގެ ސަބަބުން، ދައުލަތުގެ މުހިންމު ކަންކަމުގައި ނިންމަންޖެހޭ ނިންމުންތައް ވަނީ މަޑުޖެހިފައެވެ.

މަޖިލީހުގެ މަސައްކަތްތައް މެދުކަނޑާލާފައިވާ އެންމެ ބޮޑު ސަބަބަކީ ނިމުނު އިންތިޚާބުގެ ކެމްޕޭނެވެ. މެންބަރުން ދައުލަތުން ބޮޑު މުސާރައާއި އިނާޔަތްތައް ނަންގަވައިގެން ތިއްބަވައި، މަޖިލީހަށް ހާޒިރުވުމުގެ ބަދަލުގައި މުޅި ވަގުތު ހުސްކުރެއްވީ ދާއިރާތަކުގެ ކެމްޕޭން ހަރަކާތްތަކަށެވެ. ސަރުކާރު ހިންގާ ޕާޓީއަށް މަޖިލީހުގެ ކޮންޓްރޯލް އޮތުމުން، މަޖިލިސް ހިންގާނީ ސަރުކާރުން ބޭނުންވާ ވަގުތަކު، ބޭނުންވާ ގޮތަކަށް ކަމަށް މިއަދު މި ސަރުކާރަށް ހީވާކަހަލަ އެވެ.

މަޖިލިސް ތަޅު އަޅުވާފައި އޮތް އިރު 20 ވަނަ މަޖިލިސް އެންމެ ބޮޑަށް ފާހަކުރެވެނީ ދައުލަތުގެ ބާރެއްގެ ގޮތަށް ވުރެ ރައީސް ޑރ. މުހައްމަދު މުއިއްޒުގެ އޮފީހެއްގެ ގޮތުގައެވެ. ސަރުކާރުގެ ފަރާތުން މަޖިލީހަށް ހުށަހަޅާ ބިލުތަކަކީ ވެސް އެއްވެސް ދިރާސާ އެއް ނުކޮށް، އެކަށީގެންވާ ވަގުތު ހޭދަކުރުމެއް ނެތި ތަޅުމުގައި ބަހުސެއް ވެސް ކުރުމެއް ނެތި ފާސް ކޮށްލާ ބިލުތަކަކަށް ވަނީ ވެފަ އެވެ. 

ރައްޔިތުންގެ މަޖިލީހުގެ އެންމެ މުހިންމު ޒިންމާއަކީ ސަރުކާރު ޖަވާބުދާރީކުރުވުމާއި، ހުށަހެޅޭ ބިލްތައް ދިރާސާކޮށް، ރައްޔިތުންނަށް އެންމެ ފައިދާހުރި ގޮތަކަށް އެ ބިލްތައް ފާސްކުރުމެވެ. މަޖިލީހުގެ މެޖޯރިޓީ ސަރުކާރު ކޮންޓްރޯލްކުރާ ޕާޓީއަށް އޮތުމުން، މަޖިލީހަކީ ސަރުކާރުގެ އިދާރާއެއްގެ ގޮތުގައި މިއަދު ސިފަވާން ފަށާފައިވާ މަޖިލީހުން ރައީސް އޮފީހުން ފޮނުވާ ކޮންމެ ބިލަކީ، އެއްވެސް އުނި އިތުރެއް ނެތި ފާސް ކުރަންޖެހޭ ބިލުތަކެއް ކަމަށް ސަރުކާރުން މެންބަރުން ވަނީ ނިންމާފަ އެވެ. 

ކޮމިޓީއަކަށް ބިލެއް ފޮނުވުމެކޭ ނުފޮނުވުމެކޭ ވެސް ތަފާތެއް ނެތެވެ. ބިލެއްގައި ހުރި ނުރަނގަޅު ކަންކަން އިސްލާހު ކުރުމުގެ ބަދަލުގައި، ސަރުކާރު މެންބަރުން ބޭނުންވަނީ "އަވަސް އަރުވާލައިގެން" ބިލް ފާސް ކުރުމަށެވެ. މަޖިލީހުގެ ތަޅުމުގައި ކުރެވޭ ބަހުސްތަކަކީ ހަމައެކަނި ސަރުކާރަށް ސަނާ ކިޔުމަށް ބޭނުންކުރާ ވަގުތުތަކެކެވެ. ބިލުގެ ސަބަބުން ރައްޔިތުންނަށް ކުރާނެ އަސަރަކަށްވުރެ ބޮޑަށް، ސަރުކާރުގެ މެންބަރުންގެ އަމާޒަކީ ސަރުކާރުގެ "ރުހުން" ހޯދުމެވެ.

މަޖިލީހުގެ މެންބަރުންނަށް ބޮޑު މުސާރަދެނީ ރައްޔިތުންގެ ޓެކްސް ފައިސާއިންނެވެ. އެހެންކަމުން، އެ މެންބަރުން ޖަވާބުދާރީވާން ޖެހޭނީ ސަރުކާރަކަށް ނޫނެވެ. ރައްޔިތުންނަށެވެ. ބޭނުން ބިލެއް ބޭނުން ގޮތަކަށް ފާސްކޮށްލާ، ބޭނުންވީމާ ޖަލްސާތައް ކެންސަލް ކޮށް، ފޫހިވީމާ ޖަލްސާތައް ބާއްވާލަން ރައްޔިތުންގެ މަޖިލީހަކީ ސަރުކާރުގެ އަމިއްލަ ހަރު މުދަލެއް ނޫނެވެ. އެއީ ޕީއެންސީ މެންބަރުގެ އަމިއްލަ ގެ އެއް ވެެސް ނޫނެވެ. 

ބަތް ކައްކާ ކުޅޭ އުސޫލުން ކުރިއަށް ދާ 20 ވަނަ ރައްޔިތުންގެ މަޖިލީހުގެ މި ހިނގާ 2026 ވަނަ އަހަރުގެ ޖަލްސާތައް ވާއެއް ނުވާއެއް ނޭނގި ކެންސަލް ކުރަމުންގޮސް ޖަލްސާއެއް ނުބާއްވާތާ 35 ދުވަހަށް ފަހު މަޖިލީހުގެ ޖަލްސާތައް ފަށަން ތައްޔާރު ވެފައިވާ ކަމަށް މަޖިލީހުގެ އިދާރާއިން މިވަނީ ބުނެފަ އެވެ. ސުވާލަކީ ޖަލްސާތައް ކެންސަލް ނުކޮށް މިފަހަރު ކުރިއަށްދާނީ ކިތައް ދުވަހަށް ތޯ އެވެ.