ހަނގުރާމަ ހުއްޓާލުމުގެ އެއްބަސްވުން މަތީ ދެމި ތިބުމަށް، އެމެރިކާ އާއި އީރާން އަށް ޕާކިސްތާން އިން ގޮވާލައިފި

އެމެރިކާ އާއި އީރާން އިން ވެސް، ހަނގުރާމަ ހުއްޓާލުމުގެ އެއްބަސްވުމުގެ މަތީ ގައި ދެމި ތިބުމަށް ޕާކިސްތާން އިން ގޮވާލައިފި އެވެ.

ޕާކިސްތާންގެ ވެރި ރަށް އިސްލާމްއާބާދުގައި ކުރިއަށް ގެންދިޔަ މަޝްވަރާ ތަކުގައި، ދެ ފަރާތަށް ވެސް އެއްބަސްވުމަކަށް އާދެވިފައި ނުވެ އެވެ. އެ މަޝްވަރާ ތަކުގެ ފަހުން ޕާކިސްތާންގެ ބޮޑު ވަޒީރުގެ ނައިބު އަދި އެ ޤައުމުގެ ފޮރިން މިނިސްޓަރު އިސްހާގު ދާރް ވިދާޅުވީ، ހަނގުރާމަ ހުއްޓުމަށް ވެފައިވާ އެއްބަސްވުމަށް ދެ ޤައުމުން ވެސް ވަފާތެރިވާން ޖެހޭ ކަމަށެވެ.

މެދު އިރުމަތީގެ ސަރަހައްދުގެ އިތުރުން، ދުނިޔޭގެ އެހެނިހެން ހިސާބު ތަކަށް ދެމެހެއްޓެނިވި ސުލްޙަ އާއި ތަރައްޤީ ގެނެސްދިނުމަށް ދެ ފަރާތުން ވެސް ހިތްހެޔޮ ނިޔަތެއްގައި މަސައްކަތް ކުރާނެ ކަމަށް އުންމީދު ކުރައްވާ ކަމަށް، އިސްހާގް ދާރް ވިދާޅުވި އެވެ. 

މީގެ އިތުރުން އޭނާ ވިދާޅުވީ، އެމެރިކާ އާއި އީރާންއާ ދެމެދު ކުރިއަށްދާ މަޝްވަރާ ތަކުގައި ޕާކިސްތާން އިން ކުރިއަށް އޮތް ތަނުގައި ވެސް މަސައްކަތް ކުރާނެ ކަމަށާއި، އެކަން ކުރުމުގައި އެ ޤައުމު ދެމި އޮންނާނެ ކަމަށެވެ. އަދި ކުރިއަށް އޮތް ދުވަސް ތަކުގެ ތެރޭގައި ދެ ޤައުމުގެ ދެ މެދުގައި މަޝްވަރާތައް ފަސޭހަ ކޮށްދިނުމަށް ޕާކިސްތާން އަށް ކުރެވެން އޮތް ކޮންމެ ކަމެއް ކޮށްދެއްވާނެ ކަމަށް ވެސް އޭނާ ވިދާޅުވި އެވެ. 

ހަނގުރާމަ ހުއްޓުމަށް ޕާކިސްތާން އިން ކުރި މަސައްކަތަށް އެމެރިކާ އާއި އީރާން އިން ވެސް ޝުކުރު އަދާ ކޮށްފައިވާއިރު، އިސްހާގް ދާރް ވަނީ އެ ދެ ޤައުމަށް ވެސް ޝުކުރު އަދާ ކުރައްވައިފަ އެވެ. އޭނާ ވިދާޅުވީ ހަނގުރާމަ ހުއްޓުވުމަށް ޕާކިސްތާން އިން ކުރި މަސައްކަތަށް އެމެރިކާ އާއި އީރާން އިން އިޙުތިރާމް ކުރި ކަމަށާއި، އެކަމަށްޓަކައި އެ ދެ ޤައުމަށް ޝުކުރުވެރިވާ ކަމަށެވެ. 

އިތުރަށް އޭނާ  ވިދާޅުވެފައި ވަނީ، އެމެރިކާ އާއި އީރާން އިން ވެސް ހިތް ހެޔޮ ނިޔަތުގައި މަސައްކަތް ކުރުން ކުރިއަށް ގެންދަވައި، ސުލްޙަވެރިކަން ޤާއިމު ކުރުމަށް އުންމީދު ކުރައްވާ ކަަމށެވެ.