ޕާކިސްތާންގައި ކުރިއަށްދާ މަޝްވަރާ ތަކުގެ ބޭނުން ހިފުމަށް ގުޓަރޭސް ގޮވާލައްވައިފި

އެމެރިކާ އާއި އީރާންއާ ދެމެދު ސުލްޙަ ޤާއިމު ކުރުމަށް ޕާކިސްތާންގައި ކުރިއަށް ގެންދާ މަޝްވަރާ ތަކުގެ ބޭނުން ހިފައި، ދެ ޤައުމުގެ ދެ މެދުގައި އޮތް ހަމަ ނުޖެހުންތައް ކުޑަ ކުރުމަށް އދ.ގެ ސެކްރެޓަރީ ޖެނަރަލް އެންޓޯނިއޯ ގުޓަރޭސް ގޮވާލައްވައިފި އެވެ. 

ގުޓަރޭސް މިހެން ގޮވާލައްވާފައި ވަނީ، އެމެރިކާ އާއި އީރާންއާ ދެމެދު ސުލްޙަ ޤާއިމު ކުރުމަށް ޕާކިސްތާންގެ ވެރި ރަށް އިސްލާމްއާބާދުގައި މަޝްވަރާތައް ފެށުމަށް ތައްޔާރު ވަމުން އަންނަ ވަގުތެއްގަ އެވެ. 

އދ. ގެ ތަރުޖަމާނު ސްޓެފާން ޑުޖަރިކް ވިދާޅުވީ، ޕާކިސްތާންގައި މިހާރު ކުރިއަށްދާ ވާހަކަ ތަކަކީ މަސްލަޙަތު ޤާއިމު ކުރުމަށާއި، އަލުން ހަނގުރާމައެއްގެ ތެރެއަށް ދިޔަ ނުދީ ހިފެހެއްޓުމަށް ލިބިފައިވާ ވަރަށް މުހިންމު ޑިޕްލޮމެޓިކް ފުރުސަތެއް ކަމަށް ސެކްރެޓަރީ ޖެނަރަލް ގުޓަރޭސް ޤަބޫލު ކުރައްވާ ކަމަށެވެ. 

އެހެންކަމުން މި ފުރުސަތުގެ ބޭނުން ހިފައިގެން ދެ ޤައުމުގެ ދެ މެދުގައި އޮތް ނުތަނަވަސްކަން ކުޑަ ކުރުމަށް ގުޓަރޭސް ބާރު އަޅުއްވާފައިވާ ކަމަށް ވެސް ޑުޖަރިކް ވަނީ ވިދާޅުވެފަ އެވެ. 

މި މަޝްވަރާ ތަކާ ގުޅޭ ގޮތުން އިތުރަށް ތަފްސީލު ދެއްވަމުން ޑުޖަރިކް ވިދާޅުވީ، ސެކްރެޓަރީ ޖެނެރަލްގެ ޚާއްސަ މަންދޫބު ޖޯން އަރްނޯލްޓް މިވަގުތު ހުންނެވީ އީރާންގެ ވެރި ރަށް ތެހެރާންގައި ކަމަށެވެ. އަދި ސަރަހައްދީ ފެންވަރުގައި ކުރިއަށްދާ ޑިޕްލޮމެޓިކް މަސައްކަތް ތަކަށް އެހީތެރިކަން ފޯރުކޮށްދިނުމަށް ޓަކައި އޭނާ އެ ސަރަހައްދުގައި މަޑު ކުރައްވާނެ ކަމަށް  ވެސް ޑުޖަރިކް ވިދާޅުވި އެވެ. 

ޕާކިސްތާންގެ އިސްލާމްއާބާދުގައި ކުރިއަށްދާ މަޝްވަރާ ތަކަށް އދ. ގެ މަންދޫބަކު ފޮނުވުމަށް ގަސްދުކުރޭތޯ ނޫސްވެރިޔަކު ސުވާލު ކުރުމުން ޑުޖަރިކް ވިދާޅުވީ، ވަކިން ޚާއްސަކޮށް އެ މަޝްވަރާ ތަކަށް މަންދޫބަކު ފޮނުވުމަށް އަދި ނިންމާފައި ނުވާ ކަމަށެވެ. ނަމަވެސް، މަޝްވަރާ ތަކުގައި ހިނގަމުންދާ ކަންކަމުގެ މައުލޫމާތު ލިބެމުންދާ ކަމަށާއި، އެކަންކަން ވަރަށް ގާތުން ބަލަމުން އަންނަ ކަމަށް ވެސް އޭނާ ފާހަގަ ކުރެއްވި އެވެ. 

މިދިޔަ ފެބްރުވަރީ މަހުގެ 28 ވަނަ ދުވަހު އެމެރިކާ އާއި އިޒްރޭލް އިން ވަނީ އީރާންއާ ދެކޮޅަށް ހަނގުރާމަ ފަށައިފަ އެވެ. އޭގެ ރައްދުގައި އީރާން އިން ވެސް ވަރުގަދަ ހަމަލާ ތަކެއް ދޭން ފެށުމާ އެކު، ސަރަހައްދުގެ މަސްލަހަތު ވަނީ ވަރަށް ބޮޑަށް ގޯސްވެފަ އެވެ.