ނިއުކްލިއާ ހަތިޔާރު އުފެއްދުމުގެ މަސައްކަތް ނުކުރާނެ ކަމުގެ ޔަޤީންކަން އީރާންގެ ކިބައިން ބޭނުންވޭ: އެމެރިކާގެ ނައިބު ރައީސް

އީރާންގެ ނިއުކްލިއާ މައްސަލައިގައި، އެ ޤައުމުން ނިއުކްލިއާ ހަތިޔާރު އުފެއްދުމުގެ މަސައްކަތް ނުކުރާނެ ކަމުގެ ޔަޤީންކަމާއި، އެކަމުގެ ސާފު ޖަވާބެއް އެމެރިކާ އިން ބޭނުންވާ ކަމަށް، އެމެރިކާގެ ނައިބު ރައީސް ޖޭޑީ ވޭންސް ވިދާޅުވެއްޖެ އެވެ. 

ޕާކިސްތާންގެ އިސްލާމްއާބާދުގައި ކުރިއަށް ގެންދިޔަ މަޝްވަރާތައް ނިމިފައިވާއިރު، އެމެރިކާ އާއި އީރާންއާ ދެމެދު އެއްބަސްވުމެއް ޤާއިމު ކުރެވިފައި ނުވެ އެވެ. އެމެރިކާގެ ޝަރުތުތައް އީރާން އިން ޤަބޫލު ކޮށްފައި ނުވާއިރު، އީރާން އިން އެއްބަސްވެފައި ނުވަނީ ކޮން ޝަރުތު ތަކަށްތޯ ސުވާލު ކުރުމުން ވޭންސް ވިދާޅުވީ، އެކަމުގެ ތަފްސީލު ދެއްވަން ބޭނުން ނުވާ ކަމަށެވެ. 

ނަމަވެސް، އެމެރިކާ އިން ބޭނުން ވަނީ ނިއުކްލިއާ ހަތިޔާރު އުފެއްދުމުގެ މަސައްކަތް އީރާން އިން ނުކުރާނެ ކަމުގެ ޔަޤީންކަމާއި، ކަށަވަރުކަން ކަަމަށް ވޭންސް ވަނީ ފާހަގަ ކުރައްވައިފަ އެވެ. 

މި މައުލޫމާތު ހާމަ ކުރައްވަމުން އެމެރިކާގެ ނައިބު ރައީސް ވޭންސް ވިދާޅުވީ، އެއްބަސްވުމަކަށް އައުމުގެ ކުރިން އެމެރިކާ އިން ބޭނުންވާ ކަންކަން ހުރި ކަމަށެވެ. އޭގެ ތެރެއިން އެއް ކަމަކީ، އީރާން އިން ނިއުކްލިއާ ހަތިޔާރު އުފެއްދުމުގެ މަސައްކަތް ނުކުރާނެ ކަމުގެ ޔަޤީންކަން ދިނުމެވެ. އަދި ހަމަ އެހެންމެ، ކުރު މުއްދަތެއްގެ ތެރޭގައި ނިއުކްލިއާ ހަތިޔާރެއް އުފެއްދުމަށް މަގު ފަހި ވާނެ ފަދަ ވަސީލަތްތައް ހޯދުމަށް ވެސް އެ ޤައުމުން މަސައްކަތް ކޮށްގެން ނުވާނެ ކަމަށް ވޭންސް ވިދާޅުވި އެވެ. 

އެއީ އެމެރިކާގެ ރައީސް ޑޮނަލްޑް ޓްރަމްޕްގެ އެންމެ މުހިންމު އަމާޒު ކަމަށާއި، ކުރިއަށްދާ މަޝްވަރާ ތަކުގެ ތެރެއިން ހާސިލު ކުރަން ބޭނުންވާ ނަތީޖާ އަކީ އެއީ ކަމަށް ވެސް ވޭންސް ވިދާޅުވި އެވެ. މަޝްވަރާ ތަކުގައި އެމެރިކާގެ ފަރާތުން އެންމެ އިސްކޮށް ބައިވެރިވެ ވަޑައިގެންނެވީ ވޭންސް އެވެ. 

އީރާންގެ ނިއުކްލިއާ ޕްރޮގްރާމްއާ ގުޅޭ ގޮތުން އިތުރަށް ވާހަކަ ދައްކަވަމުން ވޭންސް ވިދާޅުވީ، އެ ޤައުމުގައި ކުރިން ހުުރި ޔުރޭނިއަމް މުއްސަނދި ކުރާ މަރުކަޒުތައް މިހާރު ވަނީ ހަލާކުވެފައި ކަމަށެވެ. ނަމަވެސް މިހާރު އުފެދޭ އެންމެ ބޮޑު ސުވާލަކީ، ނިއުކްލިއާ ހަތިޔާރު އުފެއްދުމާ ދުރުގައި ތިބުމަށް އީރާންގެ ކިބައިގައި ހަގީގީ އަޒުމެއް ނުވަތަ ނިޔަތެއް އޮތްތޯ ބެލުން ކަމަށް އޭނާ ވިދާޅުވި އެވެ. 

އެމެރިކާ އާއި އީރާން އިން ވަނީ ދެ ހަފުތާގެ މުއްދަތަކަށް ހަނގުރާމަ މެދު ކަނޑާލުމަށް އެއްބަސްވެފަ އެވެ. މި މުއްދަތުގެ ތެރޭގައި ދާއިމީ ގޮތެއްގައި ހަނގުރާމަ ނިންމާލުމާ މެދު ދެ ޤައުމުން އެއްބަސްވުމަކަށް ދާން ޖެހޭނެ ކަމަށް ވަނީ ބުނެފަ އެވެ.