މަޝްވަރާ ތަކުގައި ބައިވެރިވުމަށް އެމެރިކާގެ ނައިބު ރައީސް ވޭންސް ވެސް ޕާކިސްތާން އަށް ވަޑައިގެންފި

އެމެރިކާ އާއި އީރާންއާ ދެމެދު ކުރިއަށްދާ ހަނގުރާމަ ހުއްޓާލުމުގެ މަޝްވަރާ ތަކުގައި ބައިވެރިވެ ވަޑައިގެންނެވުމަށް، އެމެރިކާގެ ނައިބު ރައީސް ޖޭޑީ ވޭންސް ވެސް ޕާކިސްތާން އަށް ވަޑައިގެންފި އެވެ.

ހޮނިހިރު ދުވަހު ވޭންސް ވަނީ ޕާކިސްތާންގެ ވެރި ރަށް އިސްލާމްއާބާދަށް ވަޑައިގެންފަ އެވެ. އެމެރިކާގެ ވަފުދުގައި އެންމެ އިސްކޮށް ހުންނެވީ ވޭންސް އެވެ. ވޭންސްގެ އިތުރުން އެމެރިކާގެ ރައީސް ޑޮނަލްޑް ޓްރަމްޕްގެ ޚާއްސަ މަންދޫބު ސްޓީވް ވިޓްކޮފް އާއި، ޓްރަމްޕްގެ ދަރިކަލުން ޖެރާޑް ކުޝްނާ ވެސް ވަނީ ޕާކިސްތާން އަށް ވަޑައިގެންފަ އެވެ. 

މި މަޝްވަރާ ތަކުގައި އީރާންގެ ފަރާތުން ބައިވެރި ވަނީ އެ ޤައުމުގެ ޤާނޫނު ޖަދާ މަޖިލީހުގެ ރައީސް މުޙައްމަދު ބާގިރު ޣަލިބާފް އާއި، އީރާންގެ ފޮރިން މިނިސްޓަރު އައްބާސް އަރާގްޗީ އެވެ. އެ ބޭފުޅުން ވެސް ވަނީ މިހާރު ޕާކިސްތާން އަށް ވަޑައިގެންފަ އެވެ. މަޝްވަރާ ތަކުގައި ބައިވެރިވާ އީރާން އާއި އެމެރިކާގެ ވަފުދަށް މަރުޙަބާ ދަންނަވާފައި ވަނީ ޕާކިސްތާންގެ އާމީ ޗީފް އާސިމް މުނީރް އެވެ. އާސިމް މުނީރު އަކީ އެމެރިކާގެ ރައީސް ޓްރަމްޕްއާ ވެސް ގާތް ގުޅުމެއް އޮަންނަ ބޭފުޅެކެވެ. 

އެމެރިކާގެ ނައިބު ރައީސް ވޭންސް ޕާކިސްތާންގެ ޚާން އެއާ ބޭސް އަށް ވަޑައިގެންނެވުމާ އެކު، ޕާކިސްތާން އިން ވަނީ ރަތް ދޫލައިގެ މަރުޙަބާއެއް ދަންނަވައިފަ އެވެ. 

އެމެރިކާ އާއި އީރާންއާ ދެމެދު މި ފެށޭ މަޝްވަރާ ތަކުގެ މައިގަނޑު ބޭނުމަކީ، ހަ ހަފުތާ އަށް ވުރެ ގިނަ ދުވަސްވެފައިވާ އީރާން ހަނގުރާމަ ނިމުމަކަށް ގެނައުމެވެ. މި ހަނގުރާމައިގެ ސަބަބުން މެދު އިރުމަތީގެ އެކި ސަރަހައްދުގައި ވަނީ ނުތަނަވަސްކަން ބޮޑުވެފަ އެވެ.