އެމެރިކާ އާއެކު މަޝްވަރާ ކުރިޔަސް، އިތުބާރެއް ނެތް: އަރާގްޗީ

ހަނގުރާމަ ހުއްޓާލުމަށް އީރާން އިން އެމެރިކާ އާއެކު މަޝްވަރާ ކުރި ނަމަވެސް، އެމެރިކާ އަށް އިތުބާރެއް ނެތް ކަމަށް އީރާންގެ ފޮރިން މިނިސްޓަރު އައްބާސް އަރާގްޗީ ވިދާޅުވެއްޖެ އެވެ.

އީރާންގެ މެހެރު ނިއުސް އެޖެންސީ އިން ރިޕޯޓު ކޮށްފައިވާ ގޮތުގައި، އަރާގްޗީ މިހެން ވިދާޅުވެފައި ވަނީ ޖަރުމަނުގެ ފޮރިން މިނިސްޓަރު ޔޯހާން ވަޑެފުލްއާ ބައްދަލު ކުރައްވައި ދެއްކެވި ވާހަކަައިގަ އެވެ. މި ބައްދަލުވުމުގައި އަރާގްޗީ ވަނީ އެމެރިކާ މެދު އީރާން އިން ގެންގުޅޭ ހަރުކަށި ސިޔާސަތު ތަކަށް އަލި އަޅުވާލައްވައިފަ އެވެ. 

އަރާގްޗީ ވިދާޅުވީ އީރާންގެ ރައްޔިތުންގެ ހައްގުތަކާއި، މަސްލަޙަތު ހިމާޔަތް ކުރުމަށްޓަކައި ފުރިހަމަ ބާރާ އެކު އީރާން އިން މަސައްކަތް ކުރާނެ ކަމަށެވެ. އަދި އެމެރިކާ އާއެކު ބާއްވާ މަޝްވަރާ ތަކުގައި އީރާން އިން ދޫ ނުދޭނެ ކަމުގެ ޔަޤީންކަން ވެސް އަރާގްޗީ ވަނީ ދެއްވައިފަ އެވެ. 

މީގެ އިތުރުން އަރާގްޗީ ވަނީ، އެމެރިކާ އަކީ މީގެ ކުރިން ވެސް އެތައް ފަހަރެއްގެ މަތިން ވައުދުތަކާ ޚިލާފު ވެފައިވާ ޤައުމެއް ކަމަށް ފާހަގަ ކުރައްވައިފަ އެވެ. އޭނާ ވިދާޅުވީ އެެމެރިކާ އިން ވަނީ ޑިޕްލޮމެސީގެ އުސޫލުތަކާ ޚިލާފުވެ، ޚިޔާނާތްތެރި ވެފައި އެވެ. އެހެންކަމުން އެމެރިކާ އަށް އިތުބާާރު ކުރުމަކީ މިވަގުތު އީރާން އަށް ކުރެވޭނެ ކަމެއް ނޫން ކަމަށް ވެސް އަރާގްޗީ ވިދާޅުވި އެވެ.

އީރާން އާއި އެމެރިކާއާ ދެމެދު އޮތް ގުޅުން ގޯސްވެފައި ވަނީ ނިއުކްލިއާ އެއްބަސްވުމުން އެމެރިކާ ވަކިވެ، އީރާންއާ ދެކޮޅަށް ދަތި ކުރުމުގެ ފިޔަވަޅުތައް އެޅުމާ ގުޅިގެންނެވެ.