އީރާންގެ ރޫހީ ލީޑަރު މުޖުތަބާ ޚާމަނާއީގެ މޫނާއި ފައިގައި ބޮޑެތި ޒަޚަމު ތަކެއް

އީރާންގެ ރޫހީ ލީޑަރު މުޖުތަބާ ޚާމަނާއީގެ މޫނާއި ފަޔަށް ބޮޑެތި ޒަޚަމު ތަކެއް ލިބިވަޑައިގެންފައިވާ ކަމަށާއި، އެމަނިކުފާނުގެ ސިފަ ވަރަށް ބޮޑަށް ބަދަލުވެފައިވާ ކަމަށް ރޮއިޓާސް ނިއުސް އެޖެންސީ އިން ރިޕޯޓު ކޮށްފި އެވެ.

ރޮއިޓާސްގައި ބުނެފައި ވަނީ މި ޒަޚަމު ތަކަކީ، އެމެރިކާ އާއި އިޒްރޭލް އިން އީރާންއާ ދެކޮޅަށް ފެށި ހަނގުރާމައިގެ ކުރީ ކޮޅު ދިން ހަމަލާ ތަކެއްގެ ސަބަބުން ލިބިފައިވާ ޒަޚަމުތަކެކެވެ. އެގޮތުން އީރާންގެ ކުރީގެ ރޫހީ ލީޑަރު އަދި މުޖުތަބާ ޚާމަނާއީގެ ބައްޕާފުޅު، އާޔަތުﷲ އަލީ ޚާމަނާއީ އަވަހާރަ ކޮށްލަން ދިން ހަމަލާގައި މުޖުތަބާ ޚާމަނާއީ އަށް ވެސް އަނިޔާވެފައިވާ ކަމަށް ވަނީ ބުނެފަ އެވެ. 

އީރާންގެ ވެރި ރަށް ތެހެރާންގެ މެދު ތެރޭގައި ހުންނަ ރޫހީ ލީޑަރުގެ ގަނޑުވަރަށް ދިން މި ހަމަލާގައި، މުޖުތަބާ ޚާމަނާއީގެ މޫނަށް ބޮޑެތި ގެއްލުން ތަކެއް ލިބި، ސިފަ ބަދަލުވެފައިވާއިރު، އެމަނިކުފާނުގެ އެއް ފައި ނުވަތަ ދެ ފަޔަށް ވެސް ބޮޑެތި ޒަޚަމު ތަކެއް ލިބިފައިވާ ކަމަށް ވަނީ ރިޕޯޓު ކޮށްފަ އެވެ. ރޮއިޓާސް އިން މި ޚަބަރު ރިޕޯޓު ކޮށްފައި ވަނީ ތިން މަސްދަރަކާ ހަވާލާދީ އެވެ.

އުމުރުފުޅުން 58 އަހަރުގެ މުޖުތަބާ ޚާމަނާއީ މިހާރު އަންނަނީ، އެމަނިކުފާނަށް ލިބިފައިވާ އަނިޔާ ތަކުން ފަސޭހަ ވަމުން ކަމަށާއި، އެމަނިކުފާނުގެ ޙާލު ކޮޅު މިހާރު ރަނގަޅު ކަމަށް ވެސް ވަނީ ރިޕޯޓު ކޮށްފަ އެވެ. މީގެ އިތުރުން، މިވަގުތު އެމަނިކުފާނު މުހިންމު ބައްދަލުވުން ތަކުގައި ބައިވެރިވެ ވަޑައިގަންނަވަމުން އަންނަނީ އޯޑިއޯ ކޮންފަރެންސް މެދުވެރިކޮށް ކަމަށާއި، ހަނގުރާމަ އާއި އެމެރިކާ އާއެކު ކުރެވޭ މަޝްވަރާ ތަކުގައި އިސް ދައުރެއް އަދާ ކުރައްވަމުން ގެންދަވާ ކަމަށް ވަނީ ބުނެފަ އެވެ. 

އީރާންގެ ކުރީގެ ރޫހީ ލީޑަރު އާޔަތުﷲ ޚާމަނާއީ އަވަހާރަ ކޮށްލުމާ އެކު، އީރާންގެ ރޫހީ ލީޑަރުގެ މަގާމަށް މުޖުތަބާ ޚާމަނާއީ އައްޔަން ކުރެއްވި ފަހުން މިހާތަނަށް އެމަނިކުފާނު އާންމުންގެ ތެރެއިން ފެނިވަޑައިގެންފައި ނުވެ އެވެ. އަދި އެމަނިކުފާނުގެ ފޮޓޯއެއް، ނުވަތަ ވީޑިއޯއެއް ވެސް މިހާތަނަށް އާންމު ކޮށްފައި ނުވެ އެވެ. 

އެމެރިކާ އާއި އިޒްރޭލް އިން އީރާންއާ ދެކޮޅަށް ކުރަމުން އަންނަ ހަނގުރާމަ ހުއްޓުމަކަށް ގެނައުމުގެ މަޝްވަރާތައް ޕާކިސްތާންގައި ފެށުމަށް މިހާރު އަންނަނީ ތައްޔާރު ވަމުންނެވެ. ދެ ހަފުތާގެ މުއްދަތަކަށް ހަނގުރާމަ މެދު ކަނޑާލާފައިވާއިރު، ދާއިމީ ގޮތެއްގައި ހަނގުރާމަ ހުއްޓާލުމުގެ އެއްބަސްވުމެއް ޤާއިމު ކުރުމަށް މެދުވެރިންް އަންނަނީ ގިނަ މަސައްކަތް ތަކެއް ކުރަމުންނެވެ.