ހަނގުރާމަ ހުއްޓާލުމަށް އެމެރިކާ އިން ހުށަހެޅީ އެންމެ ފަހުގެ އަދި އެންމެ ރަނގަޅު ހުށަހެޅުން ކަމަށް ބުނެފި

އެމެރިކާ އާއި އީރާންއާ ދެމެދު ކުރިއަށްދާ ހަނގުރާމަ ހުއްޓާލުމަށް، އެމެރިކާ އިން ހުށަހެޅީ އެންމެ ފަހުގެ އަދި އެންމެ ރަނގަޅު ހުށަހެޅުން ކަމަށް އެ ޤައުމުގެ ނައިބު ރައީސް ޖޭޑީ ވޭންސް ވިދާޅުވެއްޖެ އެވެ.

އެމެރިކާގެ ވަފުދުގެ އެންމެ އިސް ވެރިޔަަކަށް ހުންނެވި ވޭންސް މިހެން ވިދާޅުވެފައި ވަނީ، މަޝްވަރާ ތަކަށް ފަހު ނޫސްވެރިންނާ ބައްދަލު ކުރައްވައި ދެއްކެވި ވާހަކައިގަ އެވެ. 

ވޭންސް ވިދާޅުވީ މަޝްވަރާތައް ކުރިއަށް ދިޔަ ވަގުތު މަޝްވަރާ ކުރާ އެމެރިކާގެ ޓީމުން، އެ ޤައުމުގެ ރައީސް ޑޮނަލްޑް ޓްރަމްޕްއާ މެދު ކެނޑުމެއް ނެތި ގުޅުއްވަމުން ގެންދެވި ކަމަށެވެ. އެގޮތުން މަޝްވަރާ ތަކުގައި ހޭދަވި 21 ގަޑިއިރުގެ ތެރޭގައި އެކި ފަހަރު މަތިން އެމެރިކާގެ ރައީސް ޓްރަމްޕްއާ ވާހަކަ ދައްކަވާފައި ވާނެ ކަމަށާއި، ގާތް ގަނޑަަކަށް ހަ ފަަހަރު ނުވަތަ 12 ފަހަރު ޓްރަމްޕްއާ ވާހަކަ ދައްކަވާފައިވާ ކަމަށް ވޭންސް ވިދާޅުވި އެވެ. 

މަޝްވަރާ ތަކުގެ ތަފްސީލަށް އަލިއަޅުވާލައްވަމުން ވޭންސް ވިދާޅުވީ، އެމެރިކާގެ ޓީމުން މަޝްވަރާ ތަކުގައި ބައިވެރިވެފައި ވަނީ އިޚުލާސްތެރިކަމާ އެކު ކަމަށެވެ. އަދި މިހާރު އެމެރިކާ އިން ހުށަހަޅާފައި ވަނީ ވަރަށް ސާދާ ހުށަހެޅުމެއް ކަމަށާއި، މިއީ އެމެރިކާގެ ފަރާތުން ހުށަހަޅާނެ އެންމެ ފަހުގެ އަދި އެންމެ ފުރިހަމަ ހުށަހެޅުން ކަމަށް ވެސް ވޭންްސް ވަނީ ވިދާޅުވެފަ އެވެ. 

މީގެ އިތުރުން ވޭންސް ވިދާޅުވީ، އެމެރިކާގެ އެ ހުށަހެޅުމަކީ ދެ ފަރާތުގެ ދެމެދުގައި އޮތް ދެބަސްވުން ތަަކަށް ހައްލު ހޯދުމަށް އޮތް އެންމެ ރަނގަޅު ފުރުސަތު ކަމަށެވެ. އަދި މި ހުށަހެޅުން އީރާން އިން ޤަބޫލު ކުރާނެތޯ ނުވަތަ، ނޫންތޯ ކުރިއަށް އޮތް ތަނުގައި އެނގިގެން ދާނެ ކަމަށް ވެސް ވޭންސް ފާހަގަ ކުރެއްވި އެވެ. 

އެެމެރިކާގެ ނައިބު ރައީސް ވޭންސްގެ މި ވާހަކަ ތަކުން ސާފު ވަނީ، އީރާން އާއެކު ކުރިއަށްދާ މަޝްވަރާ ތަކުގައި އެމެރިކާ އިން އިތުރު ދޫތަކެއް ދޭން ބޭނުން ނުވާ ކަމަށެވެ. އަދި މި މައްސަލައިގައި އެމެރިކާގެ ރައީސް ޓްރަމްޕްގެ ސަރުކާރުން ގެންގުޅޭ ހަރުކަށި ސިޔާސަތު މި ހުށަހެޅުމުން ހާމަވެގެންދާ ކަމަށް މަސްރަހު ދިރާސާ ކުރާ ފަރާތް ތަކުން ބުނެ އެވެ.