ނިއުކްލިއާ ބާރު ދޫކޮށްލުމަށް އީރާން އަށް މަޖުބޫރު ވާނެ: ޓްރަމްޕް

ނިއުކްލިއާ ބާރު ނުވަތަ ނިއުކްލިއާ ހަތިޔާރު އުފެއްދުން ދޫކޮށްލުމަށް އީރާން އަށް މަޖުބޫރު ވާނެ ކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެ އެވެ. 

ޓްރަމްޕް މިހެން ވިދާޅުވެފައި ވަނީ، އެމެރިކާ އާއި އީރާންއާ ދެމެދު ސުލްޙަ ޤާއިމު ކުރުމަށް ޕާކިސްތާންގެ ވެރި ރަށް އިސްލާމްއާބާދުގައި މަޝްވަރާތައް ފެށުމަށް ތައްޔާރުވެފައި ވަނިކޮށެވެ. 

ޓްރަމްޕް ވިދާޅުވީ، އީރާންއާ ދެމެދު ބާއްވާ މަޝްވަރާތައް ނުވަތަ ދެކެވޭ ވާހަކަ ތަކުގައި އެއްވެސް އެއްބަސްވުމެއް ޤާއިމު ކުރާ ނަމަ، އެއީ ނިއުކްލިއާ ހަތިޔާރު ފުރިހަަަމަ އަށް ނައްތާލާ އެއްބަސްވުމަކަށް ވާން ޖެހޭ ކަމަށެވެ. އަދި އެކަން ކުރިއަށް ދާނީ ރަނގަޅަށް ކަމަށާއި، އެއް ގޮތަކަށް ނުވަތަ އަނެއް ގޮތަކުން އެކަން ރަނގަޅަށް ކުރިއަށް ދާނެ ކަމަށް ވެސް ޓްރަމްޕް ވިދާޅުވި އެވެ. 

އީރާންއާ ދެމެދު ވާހަކަ ދެއްކުމަށް ތައްޔާރަށް ހުންނެވި ކަމަށް އެމެރިކާގެ ރައީސް ޓްރަމްޕް ވިދާޅުވި އިރު، މި ވާހަކަ ތަކުގެ ނަތީޖާ އަކީ ކޮބައި ކަމެއް ކަށަވަރެއް ނުވެ އެވެ. ނަމަވެސް، އެމެރިކާގެ ލަނޑު ދަނޑި އަކީ ނިއުކްލިއާ ހަތިޔާރު ފުރިހަމަ އަށް ނައްތާލުން ކަމަށް ޓްރަމްޕް ވަނީ ސާފުކޮށް ވިދާޅުވެފަ އެވެ. 

މީގެ އިތުރުން ޓްރަމްޕް ވަނީ، ހޮރްމޫޒް ކަނޑު އޮޅިއާ ގުޅޭ ގޮތުން ވެސް ވާހަކަ ދައްކަވައިފަ އެވެ. ޓްރަމްޕް ވިދާޅުވީ ހޮރްމޫޒް ކަނޑު އޮޅިން އެއްވެސް އަގެއް ނުވަތަ ފީއެއް ނެގުމަށް އެމެރިކާ އިން ހުއްދަ ނުދޭނެ ކަމަށެވެ. އެ ކަނޑު އޮޅި މެދުވެރިކޮށް ދުނިޔޭގެ ތެލުގެ ވިޔަފާރީގެ ބޮޑު ބައެއް ކުރިއަށް ދާތީވެ، އެ ސަރަހައްދުގައި އެއްވެސް ފީއެއް ނުނެގޭނެ ކަމަށް ވެސް ޓްރަމްޕް ވަނީ ވިދާޅުވެފަ އެވެ. 

ހޮރްމޫޒް ކަނޑު އޮޅީގެ މައްސަލަ އަކީ އެމެރިކާ އާއި އީރާންއާ ދެމެދު އޮންނަ ބޮޑު މައްސަލަ އަކަށް ވާތީ، މި ސަރަހައްދުގައި އެމެރިކާ އިން ވަރުގަދަ ފިޔަވަޅު ތަކެއް އަޅާނެ ކަމުގެ އިންޒާރު ޓްރަމްޕް ވަނީ ދެއްވައިފަ އެވެ.