ސުލްޙައިގެ މަޝްވަރާ ތަކަށް އެމެރިކާ އާއި އީރާންގެ އިސްވެރިން ޕާކިސްތާން އަށް

އެމެރިކާ އާއި އީރާންއާ ދެމެދު ކުރިއަށް ގެންދާ ސުލްޙައިގެ މަޝްވަރާ ތަކުގައި ބައިވެރިވެ ވަޑައިގެންނެވުމަށް އެމެރިކާ އާއި އީރާންގެ އިސްވެރިން ޕާކިސްތާން އަށް ވަޑައިގަންނަވާނެ ކަމަށް އެ ޤައުމުގެ ބޮޑު ވަޒީރު ޝެހްބާޒް ޝަރީފް ވިދާޅުވެއްޖެ އެވެ. 

ޤައުމާ މުޚާތަބު ކުރައްވައި ދެއްވި ތަޤުރީރުގައި ބޮޑު ވަޒީރު ޝެހްބާޒް ވިދާޅުވީ، އޭނާ ދެއްވި އިޚުލާސްތެރި ދައުވަތު ޤަބޫލު ކުރައްވައި އެމެރިކާ އާއި އީރާންގެ އިސްވެރިން ޕާކިސްތާންގެ އިސްލާމްއާބާދަށް ވަޑައިގަންނަވާ ކަމަށެވެ. އެ ބައްދަލުވުމުގައި މައިގަނޑު ގޮތެއްގައި މަޝްވަރާ ކުރާނީ ސަރަހައްދީ ސުލްޙަ ޤާއިމު ކުރުމާ ގުޅޭ ގޮތުން ކަމަށް ވެސް ބޮޑު ވަޒީރު ވަނީ ވިދާޅުވެފަ އެވެ. 

މި މަޝްވަރާ ތަކުގައި ބައިވެރިވެ ވަޑައިގެންނެވުމަށް އެމެރިކާގެ ނައިބު ރައީސް ޖޭޑީ ވޭންސް މިހާރު ވަނީ ޕާކިސްތާން އަށް ވަޑައިގެންފަ އެވެ. މަޝްވަރާ ތަކުގައި އީރާންގެ ވަފުދު ބައިވެރިވާނެ ކަމާ މެދު މީގެ ކުރިން ސުވާލު ތަކެއް އުފެދުނު ނަމަވެސް، އީރާން އިން ވެސް މަޝްވަރާ ތަކުގައި ބައިވެރިވެ އެވެ. 

ޕާކިސްތާންގެ ބޮޑު ވަޒީރު ވިދާޅުވީ، މަޝްވަރާގެ މޭޒަށް އައުމަށް ދެ ޤައުމުން ވެސް އެއްބަސްވުމަކީ ލިބުނު ކުރިއެރުމެއް ކަމަށެވެ. އެހެން ނަމަވެސް، ކުރިއަށް އޮތީ އުނދަގޫ މަރުޙަލާއެއް ކަމަށް ވެސް އޭނާ ވިދާޅުވި އެވެ. އެގޮތުން ވަގުތީ ގޮތުން ހަނގުރާމަ މެދު ކަނޑާލުމަށް މިހާރު އެއްބަސްވެފައިވާ ކަމަށާއި، ދާއިމީ ސުލްޙައެއް ޤާއިމު ކުރަން ޖެހޭ މަސައްކަތްތައް މާ ބޮޑު ވާނެ ކަމަަށް ވެސް ބޮޑު ވަޒީރު ވަނީ ފާހަގަ ކުރައްވައިފަ އެވެ. 

އެ ތަޤުރީރުގައި ބޮޑު ވަޒީރު ވަނީ ޕާކިސްތާންގެ އަމިއްލަ ބައެއް ސިޔާސަތު ތަކަށް ގެނެސްފައިވާ ބަދަލުތައް ވެސް އިއުލާން ކުރައްވައިފަ އެވެ. ސުލްޙައިގެ މަޝްވަރާ ތަކަަށް އެމެރިކާ އާއި އީރާާން އިން އެއްބަސްވުމުގެ ކުރިން، ޕާކިސްތާން އިން ވަނީ ދެ ޤައުމުގެ ދެ މެދުގައި މެސެޖު ބަދަލު ކޮށްދީފަ އެވެ.