އީރާން އިން ހަނގުރާމަ ކުރާކަށް ބޭނުމެއް ނޫން، އެކަމަކު ޤާނޫނީ ޙައްގު ދުލެއް ނުކުރާނެ: ރޫހީ ލީޑަރު

އީރާން އިން އެއްވެސް ޤައުމަކާ ދެކޮޅަށް ހަނގުރާމަ ކުރަން ބޭނުން ނުވާ ކަމަށާއި، ނަމަވެސް އެމެރިކާ އާއި އިޒްރޭލް އިން ކުރިމަތި ކުރާ ނުރައްކާ ތަކުގެ ކުރިމަތީގައި އެ ޤައުމުގެ ޤާނޫނި ހައްގު ދޫކޮށް ނުލާނެ ކަމަށް އީރާންގެ ރޫހީ ލީޑަރު މުޖުތަބާ ޚާމަނައީ ވިދާޅުވެއްޖެ އެވެ. 

އީރާންގެ އައު ރޫހީ ލީޑަރު މުޖުތަބާ ޚާމަނާއީ މިހެން ވިދާޅުވެފައި ވަނީ އެ ޤައުމުގެ ދައުލަތުގެ މީޑިއާ މެދުވެރިކޮށް އާންމު ކުރި ޚާއްސަ މެސެޖެއްގަ އެވެ. 

އީރާންގެ ދައުލަތުގެ ޓީވީ އިން އާންމު ކުރި އެ މެސެޖުގައި މުޖުތަބާ ޚާމަނާއީ ވިދާޅުވީ، އީރާންގެ ސިޔާސަތަކީ ސަރަހައްދީ ހަމަޖެހުން ޤާއިމު ކުރުން ކަމަށާއި، އެއްވެސް ފަރާތަކާއެކު ކުރިމަތި ލުމަކަށް ދިޔުމަީ އީރާން އިން އެދޭ ގޮތެއް ނޫން ކަމަށެވެ. އެހެން ނަމަވެސް ޤައުމުގެ އިސްތިޤުލާލާއި، ރައްޔިތުންގެ ރައްކާތެރި ކަމަށް އުނިކަން އަންނަ ފަދަ އެއްވެސް ކަމެއްގައި ދޫ ނުދޭނެ  ކަމުގެ ޔަޤީންކަން އޭނާ ވަނީ ދެއްވައިފަ އެވެ. 

މީގެ އިތުރުން އެމެރިކާ އާއި އިޒްރޭލް އިން އީރާން އަށް އަމާޒުކޮށް ދެމުންދާ އިންޒާރު ތަކަށް އިޝާރާތް ކުރައްވައި މުޖުތަބާ ޚާމަނާއީ ވިދާޅުވީ، ބޭރުގެ ބާރު ތަކުން ކުރިމަތި ކުރާ ފިއްތުން ތަކަށް އީރާން އިން ބޯ ނުލަނބާނެ ކަމަށެވެ. އަދި ބައިނަލްއަޤުވާމީ ޤާނޫނު ތަކުގެ ދަށުން އީރާން އަށް ލިބިދީފައިވާ ހައްގުތައް ހިމާޔާތް ކުރުމުގައި ސާބިތުކަމާ އެކު ދެމި އޮންނާނެ ކަމަށް ވެސް އެ މެސެޖުގައި މުޖުތަބާ ޚާމަނާއީ ވަނީ ވިދާޅުވެފަ އެވެ. 

މިއީ އީރާންގެ އެންމެ މަތީވެރިޔާގެ މަގާމާ ހަވާލުވެ ވަޑައިގެންެވުމަށް ފަހު، ބޭރުގެ ޤައުމުތަކާ މެދު ގެންގުޅޭނެ ސިޔާސަތާ ގުޅޭ ގޮތުން މުޖުތަބާ ޚާމަނާއީ ދެއްވި ފުރަތަމަ މެސެޖެވެ. މި މެސެޖު އައިސްފައި މި ވަނީ މެދު އިރުމަތީގެ މަސްރަހު އިތުރަށް ގޯސްވެ، އީރާން އާއި ހުޅަނގުގެ ޤައުމު ތަކާ ދެމެދު އޮތް ގުޅުން އިތުރަށް ގޯސްވެފައިވާ ވަގުތެއްގަ އެވެ. 

މުޖުތަބާ ޚާމަނާއީ އަކީ އީރާންގެ ކުރީގެ ރޫހީ ލީޑަރު އާޔަތުﷲ އަލީ ޚާމަނާއީގެ ދަރިކަލުންނެވެ. އޭނާ އެ މަގާމާ ހަވާލުވެ ވަޑައިގެންނެވީ، އެމެރިކާ އާއި އިޒްރޭލް އިން ދިން ހަމަލާ ތަކެއްގައި އާޔަތުﷲ ޚާމަނާއީ އަވަހާރަ ކޮށްލި ފަހުންނެވެ. މަގާމާ ހަވާލުވެ ވަޑައިގެންނެވި ނަމަވެސް، މިހާތަނަށް މުޖުތަބާ ޚާމަނާއީ އާންމުންގެ ތެރެއިން ފެނިފައި ނުވެ އެވެ.