ހަނގުރާމައާ ގުޅިގެން ހަރަދު ކުޑަ ކުރުމަށް ފިޔަވަޅެއް ނަޅާ ކަމަށް ބުނެ ގިނަ ބައެއްގެ ފާޑު ކިޔުން އަމާޒުވުމާއި ގުޅިގެން އީދު ލައިޓް ހަމައެކަނި ސިޓީތަކުގައި ދިއްލަން ނިންމައިފި

މެދުއިރުމަތީ ހަނގުރާމައާ ގުޅިގެން ހަރަދު ކުޑަ ކުރުމަށް ފިޔަވަޅެއް ނަޅާ ކަމަށް ބުނެ ގިނަ ބައެއްގެ ފާޑު ކިޔުން އަމާޒުވުމާއި ގުޅިގެން އީދު ލައިޓް ހަމައެކަނި ސިޓީތަކުގައި ދިއްލަން ނިންމާފައިވާ ކަމަށް ސަރުކާރުން ބުނެފި އެވެ. 

ހަނގުރާމައިގެ ކަންކަން ވިލަރެސް ކުރުމަށް ރައީސް ޑރ.މުހައްމަދު މުއިއްޒު އެކުލަވާލެއްވި ކޮމެޓީން ބުރާސްފަތި ދުވަހު ބޭއްވި ނޫސްވެރިންގެ ބައްދަލުވުމުގައި، ފޮރިން މިނިސްޓަރު އަބްދުﷲ ހަލީލް ވިދާޅުވީ، ކެބިނެޓްގައި މަޝްވަރާ ކުރުމަށްފަހު، ހަމައެކަނި ސިޓީތަކުގައި އީދު ލައިޓް ދިއްލަން ނިންމާފައިވާ ކަމަށެވެ.

ހަނގުރާމަ ދިގުލައިގެން ކުރިއަށްދާނަމަ ދަތިތައް ކުރިމަތިވާނެކަން ފާހަގަކުރައްވައި މިނިސްޓަރު ހަލީލު ވިދާޅުވީ ހާލަތަށް އަބަދުވެސް ބަލާނެ ކަމަށާއި، ހަރަދު ކުޑަ ކުރުމުގެ ގޮތުން އިތުރު ފިޔަވަޅުތައް ވެސް އަޅަމުންދާ ކަމަށެވެ.

ނަމަވެސް ދެން އިތުރަށް އެޅި ފިޔަވަޅެއް ވިދާޅެއް ނުވެ އެވެ. 

އީދު ލައިޓްގައި މިހާރު ކެބިނެޓްގައި މަޝްވަރާކޮށް ރައީސް ނިންމާފައި އެއޮތީ ފިތުރު އީދު ދިއްލުން ރަށްރަށުގައި މިވަގުތު ނުބާއްވާ ގޮތަށް. ހަމައެކަނި ރާއްޖޭގެ ފަސް ސިޓީގައި މިކަން ކުރިއަށް ގެންދާ ގޮތަށް. އެވެސް ކަނޑައެޅޭ ވަކި ލޮކޭޝަންތަކެއްގައި އެނގޭތޯ. 

ފޮރިން މިނިސްޓަރު އަބްދުﷲ ހަލީލް

މީގެ އިތުރުން ރަމަޟާން މަހުގެ ކަރަންޓު ބިލު 400 ރުފިޔާ އަށް ވުރެ ބޮޑު ނުވާނެހެން ޑިސްކައުންޓް ދިނުމަށް ރައީސް ޑރ.މުހައްމަދު މުއިއްޒު ނިންމަވާފައިވާތީ އެކަމާ ގުޅިގެން ނޫސްވެރިއަކު ކުރި ސުވާލަށް ފިނޭންސް މިނިސްޓަރު މޫސާ ޒަމީރު ވިދާޅުވީ ޑިސްކައުންޓް ލިބޭނެ ކަމަށާއި، އެއީ ބަޖެޓުގައި ހިމަނާފައިވާ ހަރަދެއް ކަމަށެވެ.

އެހެންކަމުން އޭގެން އެއްވެސް ދައްޗެއް ކުރިމަތިނުވާނެ ކަމަށް އޭނާ ވިދާޅުވި އެވެ. ނަމަވެސް އެހެނިހެން ހަރަދުތައް ކުރުމުގައި ވަރަށް ބޮޑަށް ހިފަހައްޓާފައިވާ ކަމަށް މިނިސްޓަރު ޒަމީރު ވިދާޅުވި އެވެ. 

ރައީސުލްޖުމްހޫރިއްޔާ މިދިޔަ އަހަރުގެ ބަޖެޓު އަޅުގަނޑުމެންނާ އެކު މަޝްވަރާ ކުރައްވާފައި އަޅުގަނޑަށް އިންސްޓްރަކްޝަން ދެއްވިއިރު، ބަޖެޓް ކުރައްވާފައި އޮތް ހަރަދެއް އެއީ މިއަހަރުގެ ޑިސްކައުންޓަކީ. ކުރީއްސުރެ ރޭވިގެން ކުރަން ނިންމާފައި އޮތް ކަމެއް. އެހެންވީމަ އޭގެން ސީދާ ޑައިރެެކްޓްލީ ބަޖެޓަކަށް ބަދަލެއް ނާންނާނެ.

 ފިނޭންސް މިނިސްޓަރު މޫސާ ޒަމީރު 

ހަނގުރާމައާ ގުޅިގެން ދުނިޔޭގެ ބޮޑެތި ގައުމުތަކުން ދަނީ ހަރަދު ކުޑަ ކުރުމުގެ ގޮތުން ގިނަ ފިޔަވަޅުތައް އަޅަމުންނެވެ. ނަމަވެސް ރާއްޖެއިން އެކަށީގެންވާ އެއްވެސް ފިޔަވަޅެއް ނާޅާ ކަމަށް ބުނެ ގިނަ ބައެއް ފާޑު ކިޔުން ވަނީ އަމާޒުވެފަ އެވެ. އީދު ލައިޓް ހަމައެކަނި ސިޓީތަކުގައި ދިއްލަން ނިންމާފައިވާއިރު، މާލެސިޓީގައި ތިން ދުވަހަށް ކުލަ ގޮދަކޮށް އީދު ފާހަގަކުރަން ނިންމާފައިވާތީ މި ހަނގުރާމައާ ގުޅިގެން ސަރުކާރުގެ އެއްވެސް ކަހަލަ ސީރިއަސް ކަމެއް ނެތް ކަމަށް ގިނަ އާއްމު ރައްޔިތުން ދަނީ ބުނަމުންނެވެ.