އެމްއޭސީއެލްއާއި ހަވާލުކުރި ކެނދިކުޅުދޫ ފިޓްނެސް އެންޑް ރެކްރިއޭޝަން ސެންޓަރުގެ އަމަލީ އެއްވެސް މަސައްކަތެއް ނުފަށާ
ނ. ކެނދިކުޅުދޫގައި ފިޓްނެސް އެންޑް ރެކްރިއޭޝަން ސެންޓަރެއް އެޅުމަށް މިދިޔަ އަހަރުގެ އެޕްރީލް މަހު އެމްއޭސީއެލްއާ ބިން ހަވާލުކުރި ނަމަވެސް، އެ މަސައްކަތް މިހާތަނަށް ފެށިފައި ނުވާކަމަށް އެ ރަށު ކައުންސިލުން ވަނީ ބުނެފަ. މި މަޝްރޫއު ކުރިއަށް ގެންދިއުމަށް ބޭނުންވާ ބިމުގެ ރަޖިސްޓްރީއާއި އެހެނިހެން މައުލޫމާތު ކައުންސިލުން ފޯރުކޮށްދީފައިވާއިރު، މަސައްކަތް ހަވާލުކުރި ބިން މިހާރު އޮތީ ވިނަ ހެދިފައި.
ކެނދިކުޅުދޫގައި ފިޓްނަސް އެންޑް ރެކްރިއޭޝަން ސެންޓަރެއް އަޅަން ހަވާލުކުރި ބިން. | ރާއްޖެ އެމްވީ
ކެނޑިކުޅުދޫ ފިޓްނެސް އެންޑް ރެކްރިއޭޝަން ސެންޓަރު ހަދަން ހަވާލުކުރި ނަމަވެސް މިހާތަނަށް އަމަލީ އެއްވެސް މަސައްކަތެއް ނުފަށާ ކަމަށް ކެނދިކުޅުދޫ ކައުންސިލްގެ ރައީސް މުހައްމަދު ރައޫފް ވިދާޅުވެއްޖެ އެވެ.
ކެނދިކުޅުދޫ ރެކްރިއޭޝަން ސެންޓަރާއި ގުޅޭގޮތުން ރާއްޖެޓީވީ އަށް މައުލޫމާތު ދެއްވަމުން ރައޫފް ވިދާޅުވީ ސަރުކާރުން ފިޓްނެސް އެންޑް ރެކްރިއޭޝަން ސެންޓަރެއް ގާއިމް ކުރަން ބޭނުން ވެގެން މިދިޔަ އަހަރުގެ އެޕްރީލް މަހުގެ 1 ވަނަ ދުވަހު އެމްއޭސީއެލްއާއި ބިން ހަވާލުކޮށްފައިވާނެ ކަމަށެވެ. ރައޫފް ވިދާޅުވީ ބިން ދެއްކުމަށް ކޮންޓްރެކްޓަރު ގުޅާ ކަމަށާާއި، އެ މައުލޫމާތު ވެސް ދީފައިވާނެ ކަމަށެވެ. އަދި އެ ބިމަކީ ސްޕޯޓްސް މިނިސްޓްރީގެ ބިމެއް ކަމަށާއި، އެތަން ބަލަހައްޓަނީ ކައުންސިލުން ކަމަށެވެ.
ރައޫފް ވިދާޅުވީ އެމްއޭސީއެލްއާއި ހަވާލުކުރި ޕްރޮޖެކްޓް އޮތީ އެހެން ކޮންޓްރެކްޓަރަކާއި ހަވާލުކޮށްފައި ކަމަށެވެ. އެހެންމެ ބިން ހޯދާ އެތަނުގައި މަސައްކަތް ކުރަން ގުޅަނީ ތާޑް ޕާޓިއަކުން ކަމަށް ރައޫފް ވިދާޅުވި އެވެ.
ބިމުގެ ރަޖިސްޓްރީ ވެސް އޮންނާނެ. ދެން އަޅުގަނޑުމެން ކައިރީގައި އެދޭތާ ހަފްތާއެއްހާ ދުވަސް ތެރޭގައި ރަޖިސްތްރީ ހަދާފައި ހަވާލުކޮށްފައި އޮންނާނީ.ކެނދިކުޅުދޫ ކައުންސިލްގެ ރައީސް މުހައްމަދު ރައޫފް
ކެނދިކުޅުދޫގައި ފިޓްނެސް ސެންޓަރެއް ގާއިމް ކުރުމަށް ހަވާލު ކުރި ބިމުގައި މިހާރު އޮތީ ބޯކޮށް ވިނަ ހެދިފަ އެވެ. އަދި މިއިން ދުވަހެއްގައި އެތަނުގައި އެއްވެސް މަސައްކަތެއް ކުރިއަށް ގެންގޮސްފައި ނުވެ އެވެ.
ފިޓްނަސް އެންޑް ރެކްރިއޭޝަން ސެންޓަރުތައް ގާއިމުކުރުމަށް މޯލްޑިވްސް އެއަރޕޯޓްސް ކޮމްޕެނީ ލިމިޓެޑް އާއި ހަވާލުކުރީ މިިދިޔަ އަހަރުގެ އެޕްރީލް މަހުގަ އެވެ. އެއީ ރައީސް ޑރ. މުހައްމަދު މުއިއްޒު އެރަށަށް ވަޑައިގަންނަވާތީ އެވެ.
