އެއްކޯ މަތީގައި ޖެހުމުން އަނެއް ކޯ ދިއްކޮށްލާ ދަރަޖައަށް ރައްޔިތުންގެ ހާލަތު ބަދަލު ކުރަން މިސަރުކާރުން ބޭނުންވޭ: ފައްޔާޒު

ރައީސް ޑރ. މުހައްމަދު މުއިއްޒުގެ ސަރުކާރުން ބޭނުންވަނީ ރައްޔިތުންގެ އެއްކޯ މަތީގައި ޖެހުމުން އަނެއް ކޯ ދިއްކޮށްލާ ދަރަޖަށް ރައްޔިތުންގެ ހާލަތު ބަދަލު ކުރަން ކަމަށް އެމްޑީޕީގެ ކުރީގެ ޗެއާޕާސަން ފައްޔާޒު އިސްމާއިލް ވިދާޅުވެއްޖެ އެވެ. 

ހުކުރު ދުވަހުގެ ރޭ ފުވައްމުލަކު ސިޓީގައި އެމްޑީޕީން ބޭއްވި ޖަލްސާގައި ފައްޔާޒު ވިދާޅުވީ 30 އަހަރުގެ ކުރީގެ ވެރިކަން ބަދަލުކޮށް، ގައުމުގެ ހާލަތު ރަނގަޅު ކުރުމަށް މަސައްކަތްތަކެއް ކުރި ކަމަށާއި، ލެޔާއި ދާ އޮހޮރައިގެންނާއި، ކުރި މުޒާހަރާތަކާއެކު ފެހި ގާނޫނު އަސާސީ ހޯދި ކަމަށެވެ. އަދި ރާއްޖޭގެ ވެރިންނަކީ ރައްޔިތުން ކަމަށް ނިންމައި، ހައްގުތައް ގާނޫނުން ކަށަވަރު ކުރި ކަމަށް އޭނާ ވިދާޅުވި އެވެ. 

ނަމަވެސް 2023 ވަނަ އަހަރުގެ ރިޔާސީ އިންތިޚާބަށް ފަހު މިހާރު މިގައުމަށް ނާންނަވަރުގެ ބަދަލުތަކެއް އައިސްފައިވާ ކަމަށާއި، މިހާރު މިއޮތީ ހަލާކުވެފައިވާ ގައުމެއް ކަމަށެވެ. 

އެގޮތުން ހައްގަކުން، ހައްގެއް މިސަރުކާރުން ނިގުޅައި ގަންނަމުންދާ ކަމަށާއި، މިސަރުކާރުގެ ދެ އަހަރާއި ބައިގެ ތެރޭގައި ރައްޔިތުން ނިކަމެތި ކޮށްފައިވާ ކަމަށް ފައްޔާޒު ވިދާޅުވި އެވެ. އަދި ވިދާޅުވީ ދިވެހި ރައްޔިތުންގެ ފުދުންތެރިކަން ވެސް ފޭރިގަންނަމުންދާ ކަމަށެވެ. 

މި ސިޓީގެ ރައްޔިތުންނަށް ފުދުންތެރިކަމެއް ހޯދުމަށްޓަކައި އެމްޑީޕީން ތައާރަފުކުރި ލޯކަލް ޓުއަރިޒަމްގެ މަންފާ އެ ދަނީ ބޮޑުތަނުން މި ރަށަށް ލިބެމުން. އަޅުގަނޑުމެންގެ ފުރަތަމަ ސަރުކާރުގައި މިޔަރު ހިފުން މަނާކުރުމުގެ ސަބަބުން މިއަދު އެ ކުރުން މި ވަނީ މި ރަށަށް ބޮޑު ރަންވަޅަކަށް ވެފަ. އެހެނަސް، މިހާރު ކޮބައިތޯ ކިހިނެއްތޯ މި ވަނީ؟ އަޅުގަނޑުމެންނަށް މި ފެންނަނީ އަނެއްކާވެސް މިޔަރު ހިފުން މި އޮތީ ހުއްދަކޮށްފަ. އޭގެ އަސަރު މި ރަށަށް ނުކުރާނެ ގޮތަކީ ނެތް ގޮތެއް އިނގޭތޯ. ތިޔަބޭފުޅުން އަމިއްލައަށް ތި ކުރައްވާ މަސައްކަތުން ތި ލިބޭ އާމްދަނީ ހަލާކުކޮށްލުމަށްޓަކައި ކުރާ ކަމެއް އެއީ. އަޅުގަނޑުމެންނަށް ފެންނަނީ ހަމަ އެގޮތަށް ދިވެހި ރައްޔިތުންގެ ފުދުންތެރިކަން ނައްތާލުމަށްޓަކައި ކެޔޮޅެއް ހުރިއްޔާ އެ ކެޔޮޅެއް ގެންގޮސް ފެނަކައިގެ ވަޒީފާއަށް ދޭ ތަން. މަސްވެރިކަން ދިވެހި ރައްޔިތުން ކުރުން ހުއްޓުވާލަން މި ސަރުކާރުން މަސައްކަތްކުރާ ތަން. ކުޑަ މެދު ފަންތީގެ ވިޔަފާރިއެއް އޮތިއްޔާ އެ ދަނީ ފުނޑުފުނޑުކޮށްލަމުން ރައީސް، މުއިއްޒުގެ ހަމައެކަނި އިގްތިސާދީ ސިޔާސަތަކީ، އިގްތިސާދު ހަލާކުކޮށްލައި، ދިވެހި ރައްޔިތުން އެންމެންނަށް ވަޒީފާ ދިނުން. ވަޒީފާ ދިނުމުގެ ބޭނުން ވަރަށް ސާފުކޮށް މިއަދު އެބަފެނޭ. ވަޒީފާގެ ކަރުމަޅި ދިވެހި ރައްޔިތުން އެދަނީ ދުވަހެއް ދުވަހަކަށް އަޅުވަމުން، ގިނަކުރަމުން.

އެމްޑީޕީގެ ކުރީގެ ޗެއާޕާސަން ފައްޔާޒު އިސްމާއިލް

މިހާރު ކުރިމަތިކޮށްފައިވާ ހާލަތުން ގިނަ ދިވެހީންނަށް ސަރުކާރުގެ ވަޒީފާއަށް ދާން މަޖުބޫރުވެފައިވާކަން ފާހަގަކުރައްވައި ފައްޔާޒު ވިދާޅުވީ އެއީ ގަދަބާރުން ވެރިކަމުގައި ހުންނެވުމަށް ރައީސް މުއިއްޒު ކުރައްވާ ކަމެއް ކަމަށެވެ. އަދި ވިދާޅުވީ ރައްޔިތުންގެ އެއްކޯ މަތީގައި ޖެހުމުން އަނެއް ކޯ ދިއްކޮށްލާ ދަރަޖަށް ރައްޔިތުންގެ ހާލަތު ބަދަލު ކުރަން މިސަރުކާރުން ބޭނުންވާ ކަމަށެވެ. 

މިއަދުގެ ސަރުކާރުން ބޭނުންވަނީ ތިޔަބޭފުޅުންގެ އެއް  ކޯ މަތީގައި ޖެހީމަ އަނެއް ކޯ ދިއްކޮށްލަން. އާދެ! އެއީ ވަރަށް ބޮޑު ކުންހީޔެއް. އެހެންވާނެ ކަމަށް ރައީސް މުއިއްޒު ހީފުޅުކުރެއްވި ކަމުގައި ވިޔަސް، އެއީކީ ދިވެހި ރައްޔިތުން ގަބޫލުކުރާނެ ހަމައެއް ނޫން. އާދެ! އަޅުގަނޑުމެންނަށް ނިންމަންޖެހިފައި މި އޮތީ، މި ޚައްސާސީ ދަނޑިވަޅުގައި އަޅުގަނޑުމެން ދާނީ ކޮންމަގަކުންތޯ؟ 2023 ވަނަ އަހަރު އަޅުގަނޑުމެން ދާސްތުކުރީ، ޚިޔާރުކުރީ ފަހަތަށް ދާން. 2024 ވަނަ އަހަރަށް އަޅުގަނޑުމެން ޚިޔާރުކުރީ ފަހަތަށް ދާން. ކޮންމެ ސަބަބަކާ ހެދި ނަމަވެސް. މި ސަރުކާރުން އޮޅުވާލައިގެން އަދި އަޅުގަނޑުމެންގެ އެތެރޭގައި ޖެހިފައި ހުރި ހިތްހަމަނުޖެހުމެއްގެ ތެރޭގައި ދިވެހި ރައްޔިތުންނަށް ދޫކޮށްލެވުނީ ވަރަށް ބޮޑު ނިއުމަތެކޭ އަޅުގަނޑު ދަންނަވާނީ. މިއަދު ދެ އަހަރު ބައިވެގެން މި ސަރުކާރަށް ދާއިރުގައި، ހަމަ އެންމެ ދިވެހި ރައްޔިތެއް ވެސް މިހާރަކު ނުހުންނާނެ މި ސަރުކާރުގެ ދޮގާއި، މަކަރާއި، ހީލަތްތެރި ކަމާއި، ނާގާބިލުކަމާއި، ނުބައިނުލަފާކަން ނޭނގޭނެ. އެންމެ ދިވެހި ރައްޔިތަކުވެސް މިހާރު ނުހުންނާނެ.

އެމްޑީޕީގެ ކުރީގެ ޗެއާޕާސަން ފައްޔާޒު އިސްމާއިލް

މީގެ އިތުރުން ފައްޔާޒު ވަނީ ކުރިއަށް އޮތް އިންތިޚާބަށް އަލިއަޅުއްވާލައްވާ ވާހަކަ ދައްކަވާފަ އެވެ. 

ފައްޔާޒު ވިދާޅުވީ ލޯކަލް ކައުންސިލް އިންތިޚާބުގައި ދޫންޏަށް ވޯޓު ދޭން ޖެހޭ އެއްވެސް ސަބަބެއް ނެތް ކަމަށާއި، އެއީ ރައްޔިތުން އަޅުވެތިކޮށް ނިކަމެތި ކުރާ ދޫންޏެއް ކަމަށެވެ. އަދި ރައްޔިތުން އިތުރަށް ނިކަމެތި ކުރުމަށްޓަކައި ނަގާ ރިފެރެންޑަމް ވޯޓަށް ވެސް ނޫނެކޭ ބުނުމަށް އޭނާ ގޮވާލެއްވި އެވެ.