ފަސޭހަ ގޮތް ހޯދައިދޭން އައި ސަރުކާރުން ރޯދަ މަހު ވެސް ޖެއްސީ ބޮޑު ތަކުލީފެއް، ''އޯޓީ ވެސް ދެނީ ޕްރެޝަރު ބޮޑުވެ އިތުރު ގޮތެއް ނެތިގެން ''

ޒަމާނުއްސުރެ ރާއްޖޭގައި ރަމަޟާން މަހު މަސައްކަތް ކުރަން ޖެހޭ ވަގުތު ކުޑަވެ އެވެ. ސަރުކާރުގެ އޮފީސްތަކާއި، ކުންފުނިތައް އަދި އަމިއްލަ ކުންފުނިތަކުން ވެސް މުވައްޒަފުންނަށް ލުއި ދެ އެވެ. އޭގެ އިތުރުން ރޯދައާ ގުޅުވައި، އިނާއަތް ދިނުމާއި، މުވައްޒަފުންނަށް ދަތި ނުވާނެހެން ހުރިހާ ކުންފުންޏަކުން ވެސް ބައެއް އުސޫލުތަކަށް ވެސް ބަދަލު ގެނެ އެވެ. ރަމަޟާން މަހާއެކު ވަޒީފާގެ މާހައުލަށް އުފާވެރިކަން ގެނައުވި ނަމަވެސް މިފަހަރުގެ ރަމަޟާން މަހާއި ދިމާކޮށް ސަރުކާރުގެ ބައެއް ކުންފުނިތަކުން މުވައްޒަފުން އުޅެން ޖެހުނީ ވަރަށް ބޮޑު ތަކުލީފެއްގަ އެވެ. އެންމެ ކުޑަ މިނުން އިތުރު ގަޑީގެ ފައިސާ ވެސް ހޯދަން ޖެހުނީ ހަނގުރާމަ ކުރާށެވެ.

ރަމަޟާން މަހުގެ ރަސްމީ މަސައްކަތުގެ ގަޑިއަކީ 4 ގަޑިއިރު ކަމަށް ރައީސް އޮފީހުގެ ދެންނެވުމަކުން ކަނޑައެޅި ނަމަވެސް ބައެއް މުވައްޒަފުން 8 ގަޑިއިރު ނުވަތަ 6 ގަޑިއިރު މަސައްކަތް ކުރަން މަޖުބޫރުވެ އެވެ. ނަމަވެސް އެ މުވައްޒަފުންނަށް އެހެން މަސްތަކެކޭ ވެސް އެއްފަދައިން އިތުރު ގަޑީގެ ފައިސާ ދޭން ނިންމި ނިންމުން ބަލައެއް ނުގަނެވޭނެ އެވެ.

އެގޮތަށް ކަނޑައެޅި އެއް ކުންފުންޏަކީ އެމްއޭސީއެލް އެވެ. އެމްއޭސީއެލްގައި ޝިފްޓް ޑިއުޓީ ކުރާ މުވައްޒަފުން ނިސްބަތުން ގިނައިރު، ރަމަޟާން މަހު އިތުރުގަޑީގެ ފައިސާ ލިބޭނީ އެހެން މަސްތަކެކޭ ވެސް އެއްފަދައިން ހަފްތާއަކު 48 ގަޑިއިރަށްވުރެ އިތުރަށް މަސައްކަތް ކޮށްފައިވާ ވަގުތަށް ކަމަށް ރަމަޟާން މަހާ ގުޅިގެން ފުރަތަމަ ނެރުނު ސާކިއުލަރގައި ބުނެފައިވެ އެވެ. އަދި އެމުވައްޒަފުން 6 ގަޑިއިރުގެ ޑިއުޓީ ކުރުމަށްފަހު އެވަގުތަކު ހުންނަ ސްޕަވައިޒަރެއްގެ ހުއްދައާއެކު ޑިއުޓީ ކުރުކޮށްލެވޭ ގޮތަށް އޮތީ ނިންމާފަ އެވެ.

މި ނިންމުންތަކާ ގުޅިގެން މުވައްޒަފުންގެ މެދުގައި އިންތިހާއަށް ކަންބޮޑުވުންތައް އުފެދި، މަސްލަހަތު ގެއްލިގެން ދިޔަ އެވެ. އަދި ހޯމަ ދުވަހު އެމްއޭސީއެލުން މިހާރު ވަނީ ޝިފްޓް ޑިއުޓީ ކުރަންޖެހޭ ހުރިހާ މުވައްޒަފުން ވެސް 8 ގަޑިއިރު ޑިއުޓީ ކުރަން ޖެހޭ ގޮތަށް ކަނޑަައަޅައި، އިތުރު ގަޑީގެ ފައިސާ ދޭން ނިންމާފަ އެވެ.

މި ނިންމުން ނިންމީ ސްޕެޝަލް ސަރވިސްގައި މަސައްކަތް ކުރާ ގިނަ އަދަދެއްގެ މުވައްޒަފުން ސަލާމަށް ދާން ވެސް ނިންމުމާއި ގުޅިގެންނެވެ.

ރާއްޖޭގެ މައިދޯރާށިން ޚިދުމަތް ދޭން ތިބި މުވައްޒަފުން މިފަދަ ހާލަތަކަށް ވެއްޓުނުއިރު، ރާއްޖޭގެ ސިއްހީ ނިޒާމުގައި މަސައްކަތް ކުރާ މަސައްކަތްތެރިން ވެސް ތިބީ މި ކަންބޮޑުވުމުގެ ތެރޭގަ އެވެ.

ސިއްހީ ދާއިރާގެ މުވައްޒަފުންގެ ތެރެއިން ވަކި ގިންތިތަކަކަށް ނިސްބަތްވާ މުވައްޒަފުންތަކެއްގެ ރަސްމީ މަސައްކަތުގެ ގަޑިއަކީ 6 އާއި 8 ގަޑިއިރާއި ދެމެދުގެ ވަގުތުތަކެއް ކަމުގައި ވަނީ ކަނޑައާޅާފަ އެވެ. އަދި މިފަދަ ތަފާތުތައް ގެންގުޅޭއިރު، މިރަމަޟާން މަހު ރަސްމީގަޑީގެ ގޮތުގައި ރައީސް މުއިއްޒު ކަނޑައަޅުއްވާފައިވާ 4 ގަޑިއިރަށް ވުރެ އިތުރަށް މަސައްކަތް ކުރުމަށް ހޮސްޕިޓަލުތަކުން އަންގާފައިވާ މުވައްޒަފުންނަށް 4 ގަޑިއިރަށް ވުރެ އިތުރުވާ ވަގުތުތަކަށް އިތުރު އެއްވެސް އިނާއަތެއް ނުދީ މަސައްކަތް ކުރުމަކީ ވެސް އެމަސައްކަތްތެރިންނާ މެދު ވެވޭ ވަރަށް ބޮޑު ބޭއިންސާފެއް ނުންތޯ އެވެ.

މީގެ އިތުރުން ތިނަދޫގެ ޑރ. އަބްދުއްސަމަދު މެމޯރިއަލް ހޮސްޕިޓަލް ގެ މުވައްޒަފުންގެ މެދުގައި ވަރަށް ބޮޑަށް ތަފާތު ކުރުންތައް ގެންގުޅޭ ކަމަށް ބުނެ، ހަމަހަމަ އުސޫލުން ''އޮފް ދުވަސް'' ނުދޭ މައްސަލާގައި މުޒާހަރާ ކުރަން ވެސް ވަނީ ނިންމާފަ އެވެ.

މިދިޔަ އަހަރުގެ ނޮވެންބަރު މަހުން ފެށިގެން އޮފް ދުވަސް ދޭ އުސޫލަށް ބަދަލު ގެނެސްފައިވާއިރު، މުވައްޒަފުން ބުނާ ގޮތުގައި، ނޮވެންބަރު މަހުން ފެށިގެން ލިބެނީ އެންމެ އޮފް ދުވަހެއް ކަމަށާއި، ރަމަޟާން މަހާ އެކު ވެސް އެއްވެސް ލުޔެއް ނުލިބެ އެވެ. އަދި ކުއްލި އަކަށް އުސޫލު ބަދަލު ކުރީ ކިހިނެއް ކޮން ގޮތަކަށްކަން ނޭނގޭ ކަމަށާއި، މުވައްޒަފުންގެ މެދުގައި ވަރަށް ބޮޑަށް ތަފާތު ކުރުންތައް ގެންގުޅޭއިރު، މިހާރު ވެސް ލެބޯޓްރީގައި މަސައްކަތް ކުރާ ނަރުހުންނާއި، އެޓެންޑެންޓުންނަށް ދެ އޮފް ލިބޭ އެވެ.

ރަމަޟާން މަހު ހުރިހާ މުވައްޒަފުންނަށް އެއްހަމައެއްގައި ލުއިދޭން ޖެހެ އެވެ. އެގޮތަށް ލުއި ނުދެވުނަސް އިތުރު ވަގުތުގެ ފައިސާ ދޭން ޖެހެ އެވެ. ނޫންނަމަ މުވައްޒަފުންގެ މެދުގައި ވެސް މަސްލަހަތު ގޯސްވެ، ޚިދުމަތްތަކަށް ބުރޫ އެރުމަކީ ދުރުގައި އޮތް ކަމެއް ނޫނެވެ.