އެމެރިކާ އާއި އީރާންގެ މަޝްވަރާތަކާ ދިމާކޮށް، ދެ ދުވަހަށް އިސްލާމްއާބާާދުގައި ސަރުކާރު ބަންދު ކޮށްފި

އެމެރިކާ އާއި އީރާންއާ ދެމެދު ހަނގުރާމަ ހުއްޓާލުމުގެ އެއްބަސްވުމެއް ޤާއިމު ކުރުމުގެ މަޝްވަރާތައް ފެށުމަށް ތައްޔާރު ވަމުން އަންނައިރު، ޕާކިސްތާންގެ ވެރި ރަށް އިސްލާމްއާބާދުގައި ދެ ދުވަހުގެ މުއްދަތަކަށް ސަރުކާރު ބަންދު ކުރަން ނިންމައިފި އެވެ.

ބުރާސްފަތި ދުވަހު މި ނިންމުން ނިންމާފައިވާއިރު، އެމެރިކާ އާއި އީރާންގެ މަޝްވަރާތައް އިސްލާމްއާބާދުގައި ކުރިއަށް ދާނީ ހުކުރު ދުވަހު އެވެ. އެ ބައްދަލުވުމުގައި ބައިވެރިވުމަށް އީރާންގެ ވަފުދު ބުރާސްފަތި ދުވަހު ޕާކިސްތާން އަށް ދަތުރު ކުރާނެ ކަމަށް ބުނެފައިވާއިރު، އެމެރިކާގެ ވަފުދު ވެސް ޕާކިސްތާން އަށް އަންނާނެ ކަމަށް ވަނީ ބެލެވިފަ އެވެ. 

ބުދަ ދުވަހުގެ ރޭ އިސްލާމްއާބާދުގެ ޑިސްޓްރިކްޓް އިދާރާ އިން ނެރުނު އިއުލާންގައި ސަރުކާރު ބަންދު ކުރުމުގެ ވަކި ސަބަބެއް ބަޔާން ކޮށްފައި ނުވެ އެވެ. ނަމަވެސް، މުހިންމު ސިޔާސީ ބައްދަލުވުން ތަކުގެ ކުރިން، ސަލާމަތީ ސަބަބުތަކާ ދިމާކޮށް ސަރުކާރު ބަންދު ކުރުމަކީ އިސްލާމްއާބާދުގައި އާންމު ގޮތެއްގައި ކުރާ ކަމެކެވެ. 

މެދު އިރުމަތީގެ ސަަރަހައްދުގައި ހިނގަމުން އަންނަ ހަނގުރާމައާ ގުޅިގެން، އެމެރިކާ އާއި އީރާންގެ އިސް އޮފިޝަލުން ބައިވެރިވާ މުހިންމު މަޝްވަރާ ތަކަށް ޕާކިސްތާން ތައްޔާރު ވަމުން އަންނައިރު، އެމެރިކާގެ ރިޔާސީ ގަނޑުވަރު ވައިޓް ހައުސް އިން ބުނެފައި ވަނީ ޕާކިސްތާންގައި އޮންނަ މަޝްވަރާ ތަކުގައި އެމެރިކާގެ ޓީމުގައި އިސްކޮށް ހުންނަވާނީ އެ ޤައުމުގެ ނައިބު ރައީސް ޖޭޑީ ވޭންސް ކަމަަށެވެ. 

އިސްލާމްއާބާދުގެ ޑިސްޓްރިކްޓް އިދާރާ އިން ނެރުނު އިއުލާންގައި ބުނެފައި ވަނީ، ފުލުހުންނާއި، ހޮސްޕިޓަލް ތަކާއި، ކަރަންޓު އަދި ގޭހުގެ ޚިދުމަތް ހިމެނޭހެން މުހިންމު ޚިދުމަތްތައް ދެމުން އަންނަ އޮފީސްތައް ހުޅުވިފައި ހުންނާނެ ކަމަށެވެ. ޑެޕިއުޓީ ކޮމިޝަނަރުގެ އޮފީހުން އެކްސްގައި ކުރި ޕޯސްޓެއްގައި ބުނީ، މުހިންމު ޚިދުމަތްތައް ދެމެހެއްޓެނިވި ގޮތުގައި ހިނގަމުން ދާނެ ކަމަށާއި، ރައްޔިތުން އެކަންކަމަށް ސަމާލުވުމަށް އިލްތިމާސް ކުރާ ކަމަށެވެ.