އީރާންގެ ރޫހީ ލީޑަރު ހޭނެތިގެން ފަރުވާ ދެމުން އަންނަ ކަމަށް ބުނެފި

އީރާންގެ ރޫހީ ލީޑަރު މުޖުތަބާ ޚާމަނާއީ ހޭނެތިގެން ފަރުވާ ދެމުން އަންނަ ކަމަށް ރިޕޯޓު ކޮށްފި އެވެ. 

އިންޓެލިޖެންސް ރިޕޯޓަކާ ހަވާލާދީ މީޑިއާ ތަކުގައި ހޯމަ ދުވަހު ރިޕޯޓު ކޮށްފައިވާ ގޮތުގައި، އީރާންގެ ރޫހީ ލީޑަރު މުޖުތަބާ ޚާމަނާއީ އަށް ފަރުވާ ދެމުން އަންނަނީ އެ ޤައުމުގެ ގޯމް ސިޓީގަ އެވެ. އަދި މުޖުތަބާ ޚާމަނާއީގެ ހާލު ކޮޅު ސީރިއަސް ކަމަށް ވެސް ރިޕޯޓު ކޮށްފައިވެ އެވެ. 

އެމެރިކާ އާއި އިޒްރޭލް އިން އީރާން އަށް ދިން ހަމަލާ ތަކެއްގައި އެ ޤައުމުގެ ކުރީގެ ރޫހީ ލީޑަރު އާޔަތުﷲ އަލީ ޚާމަނާއީ އަވަހާރަ ކޮށްލާފައިވާއިރު، އޭގެ ހަފުތާއެއް ފަހުން އީރާން އިން ވަނީ އައު ރޫހީ ލީޑަރަކަށް މުޖުތަބާ އައްޔަން ކުރައްވައިފަ އެވެ. މުޖުތަބާ އަކީ، އީރާންގެ ކުރީގެ ރޫހީ ލީޑަރު އާޔަތުﷲ އަލީ ޚާމަނާއީގެ ދަރިކަލުންނެވެ. 

ދި ޓައިމްސްގައި މި ޚަބަރު ރިޕޯޓު ކޮށްފައި ވަނީ އެމެރިކާ އާއި އިޒްރޭލްގެ އިންޓެލިޖެންސް މައުލޫމާތުގެ މައްޗަށް ބިނާކޮށް ތައްޔާރު ކޮށްފައިވާ ޑިޕްލޮމެޓިކް މެމޯ އަކުން ކަމަށް ބެލެވޭ ކަމުގައި މާހިރުން ބުނެފައިވެ އެވެ. 

އީރާންގެ ރޫހީ ލީޑަރު މުޖުތަބާ ޚާމަނާއީ އަށް ފަރުވާ ދެމުންދާ ކަމަށް ބުނާ ރިޕޯޓެއް ފެންމަތިވެފައި މި ވަނީ، އީރާންގެ ސިޔާސީ މަސްރަހު ވަރަށް ބޮޑަށް ނުތަނަވަސްވެފައިވާ ދަނޑިވަޅެއްގަ އެވެ. ޚާއްސަކޮށް އެމެރިކާ އާއި އިޒްރޭލް އިން ދިން ހަމަލާ ތަކުގައި ކުރީގެ ލީޑަރު އަވަހާރަ ވުމަކީ އީރާންގެ ވެރިކަމުގެ ނިޒާމަށް ކުރިމަތިވި ނުތަނަވަސް ކަމެއް ކަމަށް ބައެއް ފަރާތްތަކުން ސިފަ ކޮށްފައިވެ އެވެ. 

މިކަމާ ގުޅޭ ގޮތުން އީރާންގެ ރަސްމީ އިދާރާ ތަކުން މިހާތަނަށް ވަކި އެއްޗެއް ބުނެފައި ނުވެ އެވެ. ނަމަވެސް، އީރާންގެ ރޫހީ ލީޑަރު މުޖުތަބާ އަށް ފަރުވާ ދެމުން އަންނަ ކަމަށް ބުނާ ޚަބަރުތަކާ އެކު، އީރާންގެ ކުރިމަގާ މެދު ބައިނަލްއަޤުވާމީ މުޖުތަމައުގައި ސުވާލު އުފެދިފައިވާ ކަމަށް ބުނެފައިވެ އެވެ. ގޯމް ސިޓީ އަކީ އީރާންގެ ދީނީ ގޮތުން އެންމެ މުހިންމު އެއް ސިޓީ އަށްވާއިރު، އެ ސިޓީގައި މުޖުތަބާ އަށް ފަރުވާ ދެމުން އަންނަ ކަމަށް ރިޕޯޓު ކުރުމާ އެކު، ގިނަ ބައެއްގެ ސަމާލުކަން ވަނީ އެކަމަށް ހުއްޓިފަ އެވެ.