އެމެރިކާ އާއި އީރާންގެ މަޝްވަރާތައް ހުކުރު ދުވަހު ޕާކިސްތާންގައި ބާއްވަނީ

އެމެރިކާ އާއި އީރާންއާ ދެމެދު ހިނގަމުން އަންނަ ހަނގުރާމަ ހުއްޓުމަކަށް ގެނައުމުގެ މަޝްވަރާތައް، ހުކުރު ދުވަހު ޕާކިސްތާންގައި ބޭއްވުމަށް ހަމަޖެހިއްޖެ އެވެ. 

މިކަން ހާމަ ކޮށްފައި ވަނީ ޕާާކިސްތާންގެ ބޮޑު ވަޒީރު ޝަހްބާޒް ޝަރީފް އެވެ. ބުދަ ދުވަހު ސޯޝަލް މީޑިއާގައި ކުރެއްވި ޕޯސްޓެއްގައި ޝަހްބާޒް ޝަރީފް ވިދާޅުވީ، މެދު އިރުމަތީގައި ހަނގުރާމަ ހުއްޓުމަށް އިއުލާން ކުރި ފަހުން، އެމެރިކާ އާއި އީރާންއާ ދެމެދު ކުރިއަށް ގެންދާ މަޝްވަރާތައް ހުކުރު ދުވަހު ޕާކިސްތާންގެ އިސްލާމްއާބާދުގައި ބޭއްވުމަށް ހަމަޖެހިފައިވާ ކަމަށެވެ. 

އެގޮތުން ޝެހްބާޒް ވިދާޅުވީ މިހާރު ކުރިމަތިވެފައިވާ ދެކޮޅުވެރިކަމަށް ހައްލެއް ހޯދުމަށް އިތުރު މަޝްވަރާތައް ކުރިއަށް ގެންދިޔުމަށް އެއްބަސްވެފައިވާތީ، އެމެރިކާ އާއި އީރާންގެ ލީޑަރުންނަށް ޝުކުރު އަދާ ކުރައްވާ ކަމަށެވެ. އަދި އޭޕްރީލް މަހުގެ 10 ވަނަ ދުވަހު މަޝްވަރާތައް ކުރިއަށް ގެންދިޔުމަށް ދެ ޤައުމުގެ ލީޑަރުންނަށް ދައުވަތު އަރުވާ ކަމަށް ވެސް އޭނާ ވިދާޅުވި އެވެ. 

ފާއިތުވި ދުވަސް ތަކުގައި އެމެރިކާ އާއި އީރާންއާ ދެމެދު މެސެޖު ބަދަލު ކޮށްފައި ވަނީ ޕާކިސްތާން އިންނެވެ. ޕާާކިސްތާން އަކީ އެމެރިކާއާ ގާތް ގުޅުމެއް އޮންނަ ޤައުމަކަށްވާއިރު، ޕާކިސްތާންގެ ބޮޑު ވަޒީރު ޝަހްބާޒް ޝަރީފް އާއި އެމެރިކާގެ ރައީސް ޑޮނަލްޑް ޓްރަމްޕްއާ ދެމެދު ގާތް ގުޅުމެއް އޮވެ އެވެ. އަދި ޕާކިސްތާން އިން އަންނަނީ އީރާންގެ ކަންކަން ވެސް ވަރަށް ކައިރިން ބަލަމުންނެވެ.

ޕާކިސްތާންގެ ބޮޑު ވަޒީރު ވިދާޅުވީ އެ ޤައުމުގައި ބާއްވާ ވާހަކަ ތަކުން ދެމެހެއްޓެނިވި ސުލްޙައެއް ހާސިލު ކުރެވޭނެ ކަމަށް އުންމީދު ކުރައްވާ ކަމަށާއި، ކުރިއަށް އޮތް ދުވަސް ތަކުގައި އިތުރު ހެޔޮ ބަދަލުތައް އަދި ރަނގަޅު ޚަބަރުތައް ހިއްސާ ކުރެވޭނެ ކަމަށް އުންމީދު ކުރައްވާ ކަމަށެވެ. އީރާން އަށް ހަމަލާ ދިނުމަށް އެމެރިކާގެ ރައީސް ކަނޑައެޅި ސުން ގަޑި ހަމަވާން ކައިރި ވެފައި ވަނިކޮށް، އެ ހަމަލާ ދިނުން ފަސް ކޮށްފައި ވަނީ ވެސް ޕާކިސްތާން އިން އެދިގެންނެވެ. 

އެމެރިކާ އާއި އިޒްރޭލް އިން އީރާންއާ ދެކޮޅަށް ފެށި ހަނގުރާމައިގެ ތެރެއަށް ހިޒްބުﷲ ޖަމާއަތުން ވެސް ވަދެފައިވާއިރު، އިޒްރޭލް އިން ވަނީ ލުބުނާން އަށް އަމާޒުކޮށް ހަަމަލާ ދޭން ފަށައިފަ އެވެ. ނަމަވެސް، މި އެއްބަސްވުމުގެ ދަށުން ލުބުނާން ހިމެނޭހެން، ހުރިހާ ސަރަހައްދެއްގައި ހަނގުރާމަ ހުއްޓޭނެ ކަމަށް ޕާކިސްތާންގެ ބޮޑު ވަޒީރު ވިދާޅުވެފައިވެ އެވެ. އޭގެ ފަހުން އިޒްރޭލް އިން ބުނެފައި ވަނީ، ލުބުނާން އަށް ހަމަލާ ދިނުން ނުހުއްޓޭނެ ކަމަށެވެ.