ރައްކާތެރިކަމާ އެކު ހޮރްމޫޒް ކަނޑު އޮޅިން ދަތުރު ކުރެވޭނެ ކަމަށް އީރާން އިން ބުނެފި

އެމެރިކާ އާއި އީރާން އިން ހަނގުރާމަ މެދު ކަނޑާލަން އެއްބަސްވެފައިވާއިރު، ހޮރްމޫޒް ކަނޑު އޮޅިން ރައްކާތެރި ކަމާ އެކު ދަތުރު ކުރެވޭނެ ކަމަށް އީރާން އިން ބުނެފި އެވެ. 

ބުދަ ދުވަހު އީރާން އިން ހާމަ ކޮށްފައިވާ ގޮތުގައި ހޮރްމޫޒް ކަނޑު އޮޅީގެ މުހިންމު ކަނޑު މަގުން ދަތުރު ކުރާ ކަނޑު ދަތުރު ތަަކަށް، ދެ ހަފުތާގެ މުއްދަތަކަށް ރައްކާތެރި ދަތުރު ދަތުރުގެ ޔަގީންކަން ދޭނެ ކަމަށެވެ. މި ވަގުތީ މުއްދަތު އެމެރިކާ އާއެކު ހަނގުރާމަ ނިންމުމަށް ބާއްވާ މަޝްވަރާ ތަކަށް ބޭނުން ކުރާނެ ކަަމަށް އީރާން އިން ބުނެފައިވެ އެވެ. 

އީރާންގެ ފޮރިން މިނިސްޓަރު އައްބާސް އަރާގްޗީ އެކްސްގައި ކުރެއްވި ޕޯސްޓުގައި ވިދާޅުވީ، ދެ ހަފުތާގެ މުއްދަތަކަށް ހޮރްމޫޒް ކަނޑު އޮޅީގެ ތެރެއިން ރައްކާތެރި ދަތުރުތައް ކުރެވޭނީ، އީރާންގެ ސިފައިންގެ ބާރުތަކާ ގުޅިގެން، ޓެކްނިކަލް ކަންކަމަށް ސަމާލުކަން ދީގެން ކަމަށެވެ. 

އިސްލާމިކް ރިޕަަބްލިކްގެ ސުޕްރީމް ނެޝަނަލް ސެކިއުރިޓީ ކައުންސިލް އިން ވަކި ބަޔާނެއްގައި ބުނެފައި ވަނީ، މަޝްވަރާތައް ކުރިއަށް ގެންދާނީ ދެ ހަފުތާގެ މުއްދަތަކަށް ކަމަށާއި، ނަމަވެސް ދެ ފަރާތުގެ އެއްބަސްވުމުގެ މަތިން މި މުއްދަތު އިތުރު ވެސް ކުރެވިދާނެ ކަމަށެވެ. 

ހޮރްމޫޒް ކަނޑު އޮޅި އަކީ ދުނިޔޭގެ ތެލުގެ ވިޔަފާރީގައި ވަރަށް މުހިންމު ދައުރެއް އަދާ ކުރާ ކަނޑު މަގެކެވެ، މި ކަނޑު އޮޅީގެ ތެރެއިން ދުނިޔޭގެ ތެލިގެ ވިޔަފާރީގެ ބޮޑު ބައެއް ކުރިއަށް ގެންދާކަން ފާހަގަވެ އެވެ. މި ހަނގުރާމައިގެ ސަބަބުން އީރާން އިން ކަނޑު އޮޅި ބަންދު ކޮށްފައިވާތީ، ދުނިޔޭގެ ބާޒާރުގައި ތެލުގެ އަގު އުފުލި، ދުނިޔޭގެ އިޤްތިޞާދަށް ވަނީ އެކަމުގެ އަސަރު ކޮށްފަ އެވެ. 

އީރާން އާއި އެމެރިކާއާ ދެމެދު ކުރިއަށް ގެންދާ މަޝްވަރާތައް ކާމިޔާބު ވެއްޖެ ނަމަ، ސަރަހައްދީ ސުލްޙަ އަށް ވެސް މުހިންމު ދައުރެއް އަދާ ކުރެވިދާނެ ކަމަށް ބައިނަލްއަޤުވާމީ މަސްރަހު ދިރާސާ ކުރަމުން އަންނަ ފަރާތް ތަކުން އަންނަނީ ބުނަމުންނެވެ.