ޓްރަމްޕްގެ އިންޒާރާ އެކު، އިންސާނީ ބޮޑު ކާރިސާއަކާ ގާތްވި: ސްޕެއިންގެ ފޮރިން މިނިސްޓަރު

މުޅި އީރާން އެއްކޮށް ސުންނާފަތި ކޮށްލާނެ ކަމަށް ވިދާޅުވެ އެމެރިކާގެ ރައީސް ޑޮނަލްޑް ޓްރަމްޕް ދެއްވި އިންޒާރުތަކާ އެކު، މުޅި އިންސާނިއްޔަތު ބޮޑު ކާރިސާއަކާ ނުހަނު ގާތަށް ދިޔަ ކަމަށް ސްޕެއިންގެ ފޮރިން މިނިސްޓަރު ހޯސޭ މެނުއަލް އަލްބަރޭސް ވިދާޅުވެއްޖެ އެވެ. 

އީރާން އާއި އެމެރިކާއާ ދެމެދު އޮތް ހަމަ ނުޖެހުން ތަކަށް ފަހު، ހަނގުރާމަ މެދު ކަނޑާލިކަން އިއުލާން ކުރުމާ ގުޅިގެން އާރުއެންއީ ރޭޑިއޯ އަށް ދެއްވި ބަސްދީގަތުމެއްގައި އަލްބަރޭސް ވިދާޅުވީ، ޓްރަމްޕް ދެއްވި އިންޒާރު ތަކަކީ އިންސާނިއްޔަށް އެއްގޮތަކަށް ވެސް ބަަލައި ގަނެވޭނެ ކަންތައް ތަކެއް ނޫން ކަމަށެވެ. އަދި މި ހަމަނުޖެހުން މުޅިން ނިމުމަކަށް އައީތޯ ކަނޑައެޅުމަކީ އަދި މާ އަވަސް ކަމެއް ކަމަށް ވެސް އޭނާ ފާހަގަ ކުރެއްވި އެވެ. 

ސްޕެއިންގެ ފޮރިން މިނިސްޓަރު އިތުރަށް ވިދާޅުވީ، ދުނިޔޭގެ އަސްކަރީ ބާރެއްގެ ވެރިޔަކު އެފަދަ ނުރައްކާތެރި އިންޒާރު ތަކެއް ދެއްވުމުން، އެކަމާ މެދު ނުހަނު ސީރިއަސްކޮށް ވިސްނަން ޖެހޭ ކަމަށެވެ. ޓްރަމްޕްގެ އިންޒާރު ތަކުގެ ސަބަބުން ދުނިޔެ އޮތީ ބިރުވެރި އަދި ބޮޑު ނުރައްކަލެއްގެ ތެރޭގައި ކަމަށް ވެސް އޭނާ ސިފަ ކުރެއްވި އެވެ. 

މި މައްސަލަ ދިމާވެފައި ވަނީ، އެމެރިކާގެ ހުށަހެޅުން ތަކަށް އީރާން އިން އެއްބަސް ނުވެއްޖެ ނަމަ، އެ ޤައުމުގެ ތާރީޚީ އަދި ސަގާފީ މުހިންމު ބިނާތަކާއި، އެހެނިހެން ތަންތަން ފުނޑު ފުނޑު ކޮށްލާނެ ކަމުގެ އިންޒާރު ޓްރަމްޕް ދެއްވުމާ ގުޅިގެންނެވެ. މި ވާހަކަތަކާ ގުޅިގެން ބައިނަލްއަޤުވާމީ މުޖުތަމައުގެ ފާޑު ކިޔުން ވަނީ އެމެރިކާގެ ސަރުކާރު އަދި ޓްރަމްޕް އަށް އަމާޒުވެފަ އެވެ. 

ހަނގުރާމަ މެދު ކަނޑާލުމުގެ އެއްބަސްވުމަކަށް އާދެވިފައި ވީ ނަމަވެސް، މަސްރަހު އަދިވެސް އޮތީ ނުތަނަވަސް ކަމެއްގެ ތެރޭގައި ކަމަށް ގިނަ ފަރާތް ތަކުން ދެކެ އެވެ. ސްޕެއިންގެ ސަރުކާރުން ބުނެފައި ވަނީ، ސަރަހައްދީ ހަމަ ޖެހުން ޤާއިމު ކުރުމަށްޓަކައި ހުރިހާ ފަރާތް ތަކަކުން ވެސް ކެތްތެރިކަން އިސްކުރަން ޖެހޭ ކަމަށެވެ.