ހަމަލާ ބަދަލު ކުރުން މެދު ކަނޑާލައި، މަޝްވަރާ ތަކަށް އީރާން އާއި އެމެރިކާ އިން އެއްބަސްވެއްޖެ

އެމެރިކާ އާއި އިޒްރޭލް އިން އީރާންއާ ދެކޮޅަށް ކުރަމުން އަންނަ ހަނގުރާމަ ވަގުތީ ގޮތުން މެދު ކަނޑާލައި، މަޝްވަރާތައް ކުރިއަށް ގެންދިޔުމަށް އީރާން އާއި އެމެރިކާ އިން އެއްބަސްވެއްޖެ އެވެ. 

އީރާންގެ ސުޕްރީމް ނެޝަނަލް ސެކިއުރިޓީ ކައުންސިލް އިން ނެރެފައިވާ ބަޔާނެއްގައި ބުނެފައި ވަނީ ދެ ހަފުތާގެ މުއްދަތަކަށް ހަމަލާ ބަދަލު ކުރުން މެދު ކަނޑާލަން އެއްބަސްވެފައިވާ ކަމަށާއި، އެ މުއްދަތުގެ ތެރޭގައި އިތުރު މަޝްވަރާތައް ވެސް ކުރިއަށް ގެންދަން އެއްބަސްވެފައިވާ ކަމަށެވެ. އެމެރިކާއާ މެދު ފުރިހަމަ އަށް އިތުބާރު ނެތް ކަމަށް ބަޔާނުގައި ބުނެފައިވާއިރު، ޕާކިސްތާންގެ ވެރި ރަށް އިސްލާމްއާބާދުގައި މަޝްވަރާތައް ކުރިއަށް ގެންދިޔުމަށް ވަނީ އެއްބަސްވެފަ އެވެ. 

ބަޔާނުގައި ބުނެފައި ވަނީ މި މަޝްވަރާ ތަކަށް ދެ ފަރާތުގެ އެއްބަސްވުމުގެ މަތިން މުއްދަތު އިތުރު ވެސް ކުރެވިދާނެ ކަމަށެވެ. މި މުއްދަތުގައި ފުރިހަމަ އަށް ޤައުމީ އެކުވެރިކަން ދެމެހެއްޓުމާއި، ހޯދި ކާމިޔާބީގެ އުފާ ފާޅު ކުރުން ވަރުގަދަ އަށް ކުރިއަށް ގެންދިޔުމަށް ވެސް ގޮވާލާފައިވެ އެވެ. 

މިހާރު ކުރިއަށްދާ މަޝްވަރާ ތަކަކީ ޤައުމީ މަޝްވަރާ ތަކެއް ކަމަށް ބުނެފައިވެ އެވެ. އެހެންކަމުން ރައްޔިތުންނާއި، ތަޖުރިބާކާރުންނާއި، ސިޔާސީ ގުރޫޕު ތަކުން މި މަރުހަލާ އަށް އިތުބާރުކޮށް އަަދި ތާއީދު ކުރުމަށް ވެސް ގޮވާލާފައިވެ އެވެ. މި މަޝްވަރާ ތަކަކީ އިންޤިލާބީ ލީޑަރުންނާއި، ނިޒާމުގެ އެންމެ މަތީ ފެންވަރުގެ ބެލެނިވެރި ކަމުގެ ދަށުން ކުރިއަށްދާ ކަމެއް ކަމަށް ބުނެފައިވެ އެވެ. 

މީޑިއާ ތަކުގައި ބުނެފައި ވަނީ އެމެރިކާ އިން އީރާންގެ ޝަރުތުތައް ޤަބޫލު ކޮށްފައިވާ ކަމަށެވެ. އެގޮތުން ހޮރްމޫޒް ކަނޑު އޮޅީގެ ކަންކަން އީރާންގެ ބެލުމުގެ ދަށުން ކުރިއަށް ގެންދިޔުމާއި، ޔުރޭނިއަމް އެންރިޗު ކުރުމާާއި، އީރާންއާ ދެކޮޅަށް އަޅާފައިވާ، އަދި އެހެން ފިޔަވަޅުތައް ވެސް ހިމެނެ އެވެ. 

(އިތުރު ތަފްސީލު)