ހޮރްމޫޒް ކަނޑު އޮޅިން ބައެއް ޓޭންކަރުތައް ދަތުރު ކުރުމާ އެކު، ތެލުގެ އަގު ދަށަށް

ހޮރްމޫޒް ކަނޑު އޮޅިން ބައެއް ތެޔޮ ޓޭންކަރުތައް ދަތުރު ކުރަން ފެށިކަމުގެ ޚަބަރާ އެކު، ދުނިޔޭގެ ބާޒާރުގައި ތެލުގެ އަގުތައް ދަށަށް ދާން ފަށާފައިވާ ކަމަށް ހޯމަ ދުވަހު ރެކޯޑު ކުރެވިއްޖެ އެވެ.

ވިޔަފާރިތައް ދަށްވެފައިވާ މި ދަނޑިވަޅުގައި ތެލުގެ އަގުތައް ދަށަށް ދާން ފަށާފައި ވަނީ، އީރާން އިން ދަތުރު ކުރުން ދަތި ކޮށްފައިވާ ހޮރްމޫޒް ކަނޑު އޮޅިން ބައެއް އުޅަނދު ފަަހަރު ދަތުރު ކުރަން ފެށުމުން އިންވެސްޓަރުންނަށް ލިބުނު އުންމީދަކާ ގުޅިގެންނެވެ. 

އެސްއީބީގެ އެނަލިސްޓް އޮލެ އާރް ހުވަލްބީ އޭއެފްޕީ އަށް މައުލޫމާތު ދެއްވަމުން ވިދާޅުވީ، ކަނޑު އޮޅިން މިހާރު ބައެއް އުޅަނދު ފަހަރު ދަތުރު ކުރަމުންދާ ކަމަށެވެ. މިއީ އާންމު ޙާލަތަކަށް އައުން ކަމަށް ނުބެލެވުނު ނަމަވެސް، މިއީ ރަނގަޅު މިސްރާބަކަށް އެޅުނު ފިޔަވަޅެއްގެ ގޮތުގައި އޭނާ ވަނީ ފާހަގަ ކުރައްވައިފަ އެވެ. 

ހޯމަ ދުވަހު ޖީއެމްޓީ އިން 10:50 ހާއިރު ބްރެންޓް ކްރޫޑްގެ އަގު ވަނީ 0.8 އިންސައްތަ ދަށަށް ގޮސް، ފީފާއެއްގެ އަގު 108.20 އެމެރިކާ ޑޮލަރަށް ދަށްވެފަ އެވެ. އަދި އެމެރިކާގެ ވެސްޓް ޓެކްސަން އިންޓަމީޑިއަޓް (ޑަބްލިއުޓީއައި)ގެ އަގު 1.4 އިންސައްތަ ދަށަށް ގޮސް، ފީފާއެއްގެ އަގު ވަނީ 110.01 އެމެރިކާ ޑޮލަރަށް ދަށްވެފަ އެވެ. 

ތެލުގެ އަގު ތަކަށް މި ބަދަލު އައިސްފައި ވަނީ، ހަނގުރާމައިގެ ނުރައްކާ އޮތް ހޮރްމޫޒް ކަނޑު އޮޅިން ތުރުކީގެ ތިން ވަނަ އުޅަނދު ހުރަސްކޮށްފައިވާ ކަމަށް އެ ޤައުމުގެ ޓްރާންސްޕޯޓް މިނިސްޓަރު ވިދާޅުވެފައި ވަނިކޮށެވެ. ތުރުކީ އިން ބުނި ގޮތުގައި އިރާގުން މެލޭޝިޔާ އަށް ސާފު ނުކުރާ ތެޔޮ ހިފައިގެން ދަތުރު ކުރި "އޯޝަން ތަންޑާ" ނަމަކަށް ކިޔާ ޓޭންކަރު ވަނީ އާދީއްތަ ދުވަހު ރައްކާތެރިކަމާ އެކު ހޮރްމޫޒް ކަނޑު އޮޅި ހުރަސްކޮށްފަ އެވެ. ބައިނަލްއަޤުވާމީ އުޅަނދު ފަހަރު މޮނިޓާ ކުރާ "މެރިން ޓްރެފިކް" އިން ބުނާ ގޮތުގައި މި އުޅަނދު ދަތުރު ފެށީ އިރާގުގެ ބަސަރާ އިންނެވެ. 

މީގެ އިތުރުން ޖަޕާންގެ ޝިޕިން ކުންފުންޏެއް ކަމުގައިވާ މިޓްސުއީ އޯއެސްކޭ ލައިންސް އިން ހޯމަ ދުވަހު ބުނި ގޮތުގައި، އެ ކުންފުނީގެ ދަށުން ހިންގާ އިންޑިއާގެ ދިދަ ޖަހާފައިވާ އެލްޕީޖީ ޓޭންކަރެއް ވެސް ވަނީ ކާމިޔާބުކަމާ އެކު ހޮރްމޫޒް ކަނޑު އޮޅި ހުރަސްކޮށްފަ އެވެ. މިދިޔަ ހަފުތާ ބަންދުގައި އިތުރު ދެ އުޅަނދެއް ވެސް ވަނީ ރައްކާތެރިކަމާ އެކު އެ ސަރަހައްދުން ނިކުމެފަ އެވެ. 

އީރާން އިން ހޮރްމޫޒް ކަނޑު އޮޅި ބަންދު ކޮށްފައި ވަނީ އެމެރިކާ އާއި އިޒްރޭލް އިން މިދިޔަ ފެބްރުވަރީ މަހުގެ 28 ވަނަ ދުވަހު އީރާނާ ދެކޮޅަށް ދޭން ފެށި ހަމަލާތަކާ ގުޅިގެންނެވެ. މި ހަމަލާ ތަކުގެ ސަބަބުން، ކުރިން ފީފާއެއް 60 އެމެރިކާ ޑޮލަރުގައި ހުރި ތެލާއި ގޭހުގެ އަގުތައް ވަނީ އިންތިހާ އަށް އުފުލިގެން ގޮސްފަ އެވެ. 

އީރާންގެ ރިވޮލިއުޝަނަރީ ގާޑްސް އިން އާދީއްތަ ދުވަހު ބުނެފައި ވަނީ، ކަނޑު އޮޅީގައި އުޅަނދު ފަހަރު ދަތުރު ފަތުރު ކުރުމުގައި އަމަލު ކުރާނެ އައު އުސޫލު ތަކެއް ތަންފީޒު ކުރުމުގެ ތައްޔާރީތައް ވަމުންދާ ކަމަށެވެ.