ޓްރަމްޕް މަގާމުން ދުރު ކުރުމަށް އެމެރިކާގެ ކޮންގްރެސް މެމްބަރަކު ގޮވާލައްވައިފި

އީރާން އަށް އަމާޒުކޮށް އެމެރިކާގެ ރައީސް ޑޮނަލްޑް ޓްރަމްޕް ދެއްވާފައިވާ އިންޒާރުތަކާ ގުޅިގެން، އޭނާ މަގާމުން ދުރު ކުރުމަށް އެމެރިކާގެ ކޮންގްރެސް މެމްބަރަކު ގޮވާލައްވައިފި އެވެ. 

މިފަދައިން ގޮވާލައްވާފައި ވަނީ ޗިކާގޯގެ ކޮންގްރެސް މެމްބަރު މައިކް ކުއިގްލީ އެވެ. އިލިނޯއިގެ ފަސް ވަނަ ޑިސްޓްރިކްޓް ތަމްސީލު ކުރައްވާ ކުއިގްލީ މިހެން ގޮވާލެއްވީ ގޮވާލެއްވީ، އެމެރިކާގެ ރައީސް ޓްރަމްޕްގެ އަމަލު ތަކަކީ ރައީސަކު ކޮށްގެން ވާނެ ފަދަ ކަންކަން ނޫން ކަމަށް ވިދާޅުވެ އެވެ. އެގޮތުން އެމެރިކާގެ ޤާނޫނު އަސާސީގެ 25 ވަނަ މާއްދާގެ ދަށުން، ޓްރަމްޕް މަގާމުން ދުރު ކުރުމަށް އޭނާ ވަނީ ބާރު އަޅުއްވައިފަ އެވެ. 

އެކަމާ ގުޅިގެން ކުއިގްލީ ނެރުއްވި ބަޔާނެއްގައި ވިދާޅުވީ، ކޮންމެ ދުވަހަކު ވެސް ޓްރަމްޕް ގެންދަވަނީ ރައީސްގެ މަގާމާ ނުބައްދަލު އެތައް އަމަލެއް ހިންގަވަމުން ކަމަަށެވެ. އަދި އެންމެ ފަހުން ޓްރަމްޕް ދެއްވި އިންޒާރަކީ، މުޅި ޤައުމެއް އެއްކޮށް ދުނިޔެ އިން ފޮހެލާނެ ކަމުގެ ބިރުވެރި އިންޒާރެއް ކަމަށާއި، މިއީ އޭނާގެ ނަފްސާނީ ދުޅަހެޔޮކަމާ މެދު ސުވާލު އުފެދޭ ފަދަ ނުރައްކާތެރި ދަރަޖައެއް ކަމަށް ވެސް، ކުއިގްލީ ވަނީ ސިފަ ކުރައްވައިފަ އެވެ. 

އިތުރަށް ކުއިގްލީ ވިދާޅުވީ، ޓްރަމްޕްގެ މިފަދަ އިންޒާރު ތަކުގެ ސަބަބުން އެމެރިކާގެ ސަލާމަތާއި ރައްކާތެރިކަން ގެއްލި، ޤައުމު އަނެއްކާ ވެސް ބޮޑު އިޤްތިޞާދީ ހީނަރުކަމަކާ ދިމާލަށް މިސްރާބު ޖަހާފައިވާ ކަމަށެވެ. އެހެންކަމުން، ކެބިނެޓުގެ ވަޒީރުން ގުޅިގެން ޤާނޫނު އަސާސީގެ 25 ވަނަ މާއްދާގެ ދަށުން ޓްރަމްޕް މަގާމުން ދުރު ކުރުމަށް ރަސްމީކޮށް އޭނާ ވަނީ ގޮވާލައްވައިފަ އެވެ. އަދި ކެބިނެޓަށް އެކަން ނުކުރެވޭ ނަމަ، ކޮންގްރެސްގެ ޗުއްޓީ މެދު ކަނޑާލުމަށް ފަހު ވަގުތުން އެނބުރި އައިސް، ޓްރަމްޕް އަޒުލު ކުރުން ނުވަތަ މަގާމުން ދުރު ކުރުމުގެ މަރުހަލާ ފެށުމަށް ވެސް އޭނާ ގޮވާލެއްވި އެވެ. 

ޓްރަމްޕްގެ ރިޔާސީ ފުރަތަމަ ދައުރުގައި ވެސް އޭނާ މަގާމުން ދުރު ކުރުމުގެ މަރުހަލާގައި އިސް ދައުރެއް އަދާ ކުރެއްވި ކުއިގްލީ ވިދާޅުވީ، ޓްރަމްޕް އަޑު އެހުމުގެ މަރުހަލާ އަށް ހާޒިރު ކުރެވޭނެ ދުވަހަކަށް އިންތިޒާރު ކުރައްވާ ކަމަށެވެ. އަދި މީގެ އިތުރުން އިދިކޮޅު ޑިމޮކްރަޓިކް ޕާޓީގެ މެމްބަރުންނާއި، ވެރިކަން ކުރާ ރިޕަބްލިކަން ޕާޓީގެ މެންބަރުން ވެސް އެކަތި ގަނޑަކަށްވެ، ބުއްދިވެރި ގޮތް އިޚްތިޔާރުކޮށް އަދި ޤައުމުގެ ހައްގުގައި ތެދުވުމަށް އޭނާ އިލްތިމާސް ކުރެއްވި އެވެ.