ފުރިހަމަ އެއްބަސްވުމެއް އެކުލަވާ ލެވެންދެން ސަރަހައްދުގައި އެމެރިކާގެ ސިފައިން ތިބޭނެ: ޓްރަމްޕް

އެމެރިކާ އާއި އީރާންއާ ދެމެދު ހަގީގީ ނުވަތަ ފުރިހަމަ އެއްބަސްވުމެއް އެކުލަވާ ލެވެންދެން އެ ސަރަހައްދުގައި އެމެރިކާގެ ސިފައިން ދެމި ތިބޭނެ ކަމަށް، އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެ އެވެ.

ބުރާސްފަތި ދުވަހު ޓްރަމްޕް މިހެން ވިދާޅުވެފައި މި ވަނީ، އެމެރިކާ އާއި އީރާންއާ ދެމެދު ހަނގުރާމަ ހުއްޓާލުމުގެ އެއްބަސްވުމެއް ޤާއިމު ކުރުމުގެ މުހިންމު މަސައްކަތްތައް ކުރަމުން އަންނަ ވަގުތެއްގަ އެވެ. މިފަހުން އެމެރިކާ އާއި އީރާން އިން ވަނީ ދެ ހަފުތާގެ މުއްދަތަކަށް ހަނގުރާމަ މެދު ކަނޑާލުމަށް އެއްބަސްވެފަ އެވެ. 

ޓްރުތު ސޯޝަލް މީޑިއާގައި ކުރެއްވި ޕޯސްޓެއްގައި ޓްރަމްޕް ވިދާޅުވީ، އީރާން އާއި އެެ ޤައުމު ވަށައިގެންވާ ސަރަހައްދު ތަކުގައި އެމެރިކާގެ ހުރިހާ މަނަވަރު ތަކާއި، މަތިންދާ ބޯޓު ތަކާއި، ސިފައިންގެ އިތުރުން، ބޭނުންވާ ހުރިހާ ހަތިޔާރަކާއި ގޮވާ ތަކެތި ވެސް ދެމި ހުންނާނެ ކަމަށެވެ. އެއާ އެކު ޓްރަމްޕް ވިދާޅުވީ، މި ތަކެތި ބޭނުން ކުރާނީ މިހާރު ވެސް ބޮޑު ތަނުން ބަލި ކޮށްލެވިފައިވާ ދުޝްމަނުން ފުނޑު ފުނޑު ކޮށްލުމަށް ކަމަށާއި، އެ ލަޝްކަރު އެ ސަރަހައްދުން ފޭބުމަށް އޮތް ހަމައެކަނި ޝަރުތަކީ ހަގީގީ އެއްބަސްވުމަކަށް އަމަލު ކުރަން ފެށުން ކަމަށެވެ. 

ޓްރަމްޕް ވިދާޅުވީ އެއްބަސްވުން ނާކާމިޔާބު ވެދާނެ ކަމަށް އޭނާ ޤަބޫލު ނުކުރައްވާ ކަމަށެވެ. ނަމަވެސް، އެއްބަސްވުމަކަށް ނާދެވިއްޖެ ނަމަ، މީގެ ކުރިއަށް ވުރެ މާ ވަރުގަދަ އަދި ނުރައްކާތެރި ހަމަލާ ތަކެއް ދޭނެ ކަމުގެ އިންޒާރު ޓްރަމްޕް ވަނީ ދެއްވައިފަ އެވެ. މީގެ އިތުރުން އެމެރިކާގެ ސިފައިން މިވަގުތު ވެސް ތިބީ ތަައްޔާރީ ޙާލަތުގައި ކަމަށާއި، އެމެރިކާ އަލުން އެނބުރި އަތުވެފައިވާ ކަމަަށެވެ.  

ދެ ހަފުތާގެ މުއްދަތަކަށް ހަނގުރާމަ މެދު ކަނޑާލާފައިވާ މި ދަނޑިވަޅުގައި، ދުނިޔޭގެ ތެލުގެ ފަސްބައި ކުޅަ އެއްބައި ދަތުރު ކުރާ ހޮރްމޫޒް ކަނޑު އޮޅި އަލުން ހުޅުވާލުމަށް ވެސް އީރާން އިން އެއްބަސްވެފައިވެ އެވެ. އަދި އެ ސަރަހައްދުން ދަތުރު ކުރެވޭނީ އީރާންގެ ފުރިހަަމ ބެލުމުގެ ދަށުން ކަމަށް ވެސް އެ ޤައުމުން ބުނެފައިވެ އެވެ. އީރާން އިން ބުނެފައި ވަނީ ލުބުނާން އަށް ހަމަލާ ދޭ ނަމަ، ހޮރްމޫޒް ކަނޑު އޮޅި އަނެއްކާ ވެސް ބަންދު ކުރާނެ ކަމަށެވެ. 

އެމެރިކާ އާއި އީރާންއާ ދެމެދު ހަނގުރާމަ މެދު ކަނޑާލުމުގެ އެއްބަސްވުމެއް ޤާއިމު ކުރުމުގައި އެންމެ އިސް ދައުރެއް އަދާ ކުރި ޤައުމަކީ ޕާކިސްތާން އެވެ. މި ދެ ހަފުތާގެ މުއްދަތުގެ ތެރޭގައި އެމެރިކާ އާއި އީރާން އިން އިތުރު މަޝްވަރާ ތަކެއް ކުރިއަށް ގެންގޮސް، ދާއިމީ ގޮތެއްގައި ހަނގުރާމަ ހުއްޓާލުމަށް ގޮތެއް ނިންމާނެ އެވެ.