ހަނގުރާމަ ހުއްޓާލުމުގެ ހުށަހެޅުމަށް ރައްދު ދީފައިވާ ކަމަށް އީރާން އިން ބުނެފި

އެމެރިކާ އާއި އިޒްރޭލް އިން އީރާންއާ ދެކޮޅަށް ކުރަމުން އަންނަ ހަނގުރާމަ ނިންމުމަށް މެދުވެރިންގެ ފަރާތުން ލިބިފައިވާ ހުށަހެޅުން ތަކަށް އީރާން އިން ރައްދު ދީފައިވާ ކަމަށާއި، މަޝްވަރާތައް ކުރިއަށް ގެންދަނީ އަލްޓިމޭޓަމް ދީގެންނާއި، ހަނގުރާމައިގެ ކުށްތައް ހިންގުމުގެ ބިރު ދެއްކުމާ އެއްގޮތަކަށް ނޫން ކަމަށް އީރާން އިން ބުނެފި އެވެ. 

އީރާންގެ ފޮރިން މިނިސްޓްރީގެ ތަރުޖަމާނު އިސްމާއީލް ބަޣާއީ ވިދާޅުވީ، އީރާން އިން ޤައުމީ މަސްލަޙަތަށް ބިނާކޮށް ބައެއް ބޭނުންތައް ކަނޑައަޅާފައިވާ ކަމަށާއި، އެކަންކަން މެދުވެރިން މެދުވެރިކޮށް ކުރިއަށް އެމެރިކާ އަށް ހުށަހަޅާފައިވާ ކަމަށެވެ. އެމެރިކާ އިން ކުރިން ހުށަހެޅި 15 ނުކުތާގެ ޕްލޭން ވަނީ ވަރަށް ބޮޑަށް ހައްދުފަހަނަ އަޅާފައި ކަމަށް ވެސް އޭނާ ވަނީ ވިދާޅުވެފަ އެވެ. 

ނޫސްވެރިންގެ ބައްދަލުވުމެއްގައި ބަޣާއީ ވިދާޅުވީ، އީރާން އިން ޤާނޫނީ ގޮތުން ބޭނުންވާ ކަންކަން ބުނުމުގައި ދެބަސްވުމެއް ނެތް ކަމަށެވެ. އެކަންކަން ބުނުން ވިސްނަން ޖެހޭނީ މަޑު ޖެހުމުގެ ނިޝާނެއްގެ ގޮތުގައި ނޫން ކަމަށް ވެސް ބަޣާއީ ވިދާޅުވެފައިވެ އެވެ. އެއީ އީރާންގެ ވިސްނުންތަކާއި ޕޮޒިޝަންތައް ދިފާއު ކުރުމުގައި އޮންނަ އިތުބާރުގެ ހެކި ތަކެއް ކަމަށް އޭނާ ވިދާޅުވި އެވެ. 

އީރާން އާއި އެމެރިކާއާ ދެމެދު ހަނގުރާމަ ހުއްޓާލުމަށް ކުރަމުންދާ މަސައްކަތްތަކާ ގުޅޭ ގޮތުން އީރާންގެ ނޫސްވެރިޔަކު ކުރި ސުވާލަކަށް ޖަވާބު ދެއްވަމުން ބަޣާއީ ވިދާޅުވީ، އީރާން އިން އެ ޤައުމުގެ ރައްދުތައް ތައްޔާރު ކޮށްފައިވާ ކަމަށާއި، ވަގުތު ލިބޭއިރު އެކަންކަމުގެ ތަފްސީލު އިއުލާން ކުރާނެ ކަމަށެވެ. 

މި ބަޔާން އައިސްފައި ވަނީ އެމެރިކާ އާއި އީރާންއާ ދެމެދު އުފެދިފައިވާ ޓެންޝަން ބޮޑުވަމުން އަންނަ ދަނޑިވަޅެއްގަ އެވެ. އީރާން އިން ބުނީ، ވަކި ޝަރުތު ތަކެއް ކަނޑައަޅައިގެން ބިރު ދައްކަން އުޅޭ ފަރާތްތަކާ މަޝްވަރާ ކުރުމަކީ އެ ޤައުމުގެ ސިޔާސަތެއް ނޫން ކަަމަށެވެ. އީރާންގެ ފޮރިން މިނިސްޓަރު އައްބާސް އަރާގްޗީގެ ތަރުޖަމާނު ވިދާޅުވީ، އީރާން އިން އަބަދު ވެސް ހަނގުރާމަ ހުއްޓުވުމަށް ތާއީދު ކުރާ ކަމަށާއި، ނަމަވެސް އެކަން ކުރަން ޖެހޭނީ އީރާންގެ ޤައުމީ މަސްލަހަތާއި ސަލާމަތާ ގުޅޭ ކަންކަން ރައްކާތެރި ކޮށްގެން ކަމަށެވެ.